តុលាការកូរ៉េខាងត្បូងបានសម្រេចនៅថ្ងៃព្រហស្បតិ៍ថា រដ្ឋាភិបាលនិងប្រតិបត្តិករសាឡាង Sewol ដែលបានលិចនៅក្នុងឆ្នាំ២០១៤ សម្លាប់មនុស្សចំនួន៣០៤នាក់ ដែលភាគច្រើនជាក្មេងៗសិស្សសាលាគឺត្រូវតែផ្តល់សំណងដល់គ្រួសារជនរងគ្រោះ។
ក្រុមអ្នកស៊ើបអង្កេតកូរ៉េខាងត្បូងបាននិយាយថា សាឡាងនោះគឺមានកំហុស ផ្ទុកលើសចំណុះនិងបត់លឿនពេកនៅពេលដែលវាលិចជិតឆ្នេរភាគនិរតីនៅថ្ងៃទី១៦ខែមេសាឆ្នាំ២០១៤។
សមាជិក៣៥៤នាក់នៃក្រុមគ្រួសាររបស់សិស្សសាលាចំនួន១១៨នាក់បានដាក់ពាក្យបណ្ដឹងមួយកាលពីឆ្នាំ២០១៥ប្រឆាំងរដ្ឋាភិបាលនិងប្រតិបត្តិករសាឡាងឈ្មោះ Chonghaejin Marine ។
តុលាការក្រុងសេអ៊ូលបានបង្គាប់ថា គ្រួសារនីមួយៗត្រូវទទួលបានប្រាក់២០០លានវ៉ុន (១៧៧,០០០ដុល្លារអាមេរិក) ក្នុងជនរងគ្រោះម្នាក់និងសំណងបន្ថែមទៀតចន្លោះ៥លានវ៉ុនដល់៨០លានវ៉ុនសម្រាប់សមាជិកគ្រួសារក្នុងម្នាក់។
វាជាលើកទីមួយហើយដែលតុលាការបានទទួលស្គាល់ការទទួលខុសត្រូវរបស់រដ្ឋចំពោះគ្រោះមហន្តរាយនោះ។
ឯកសាររបស់តុលាការបាននិយាយថា ក្រុមហ៊ុន Chonghaejin Marine បានដាក់ឲ្យាសាឡាង Sewol ផ្ទុកលើសចំណុះហើយក្រុមនាវិករបស់ខ្លួនបានបោះបង់ចោលសាឡាងដែលលិចបន្ទាប់ពីបានណែនាំអ្នកដំណើរឲ្យស្ថិតនៅក្នុងកាប៊ីន។
ឯកសារនេះបាននិយាយទៀតថា ឆ្មាំសមុទ្រក៏បានបរាជ័យក្នុងការគ្រប់គ្រងលើសាឡាងផងដែរ។
ចៅក្រម Lee Sang-hyun បាននិយាយនៅក្នុងឯកសារនេះថា “ជនរងគ្រោះបានស្លាប់ខណៈពេលរង់ចាំការជួយសង្គ្រោះនៅក្នុងសាឡាងដោយមិនដឹងពីស្ថានភាពលម្អិត។ ប៉ុន្តែបន្ទាប់ពីរយៈពេលជាង៤ឆ្នាំមកទល់ពេលនេះ, ជម្លោះនៅតែបន្តអំពីថាតើនរណាជាអ្នកទទួលខុសត្រូវចំពោះការលិចនោះនិងសំណង”៕ REUTERS
Source: Kampuchea Thmey Daily
0 Comments