រតនគិរី ៖ កូនឈើបីប្រភេទចំនួន៣៥០ដើម ត្រូវបានសាលាក្រុងបានលុង នាំយកទៅ ដាំលើផ្ទៃដីសងខាងព្រលានយន្តហោះក្នុងឱកាសប្រារព្ធធ្វើបុណ្យរុក្ខទិវា ៩កក្កដានាព្រឹកថ្ងៃអាទិត្យទី២២ ខែកក្កដា ឆ្នាំ២០១៨ ក្រោមអធិបភាព លោក ថង សាវុន អភិបាលខេត្ត និងជាប្រធានសហភាពសហព័ន្ធយុវជនកម្ពុជា។
លោក ថង សាវុន មានប្រសាសន៍ថា ពិធីបុណ្យរុក្ខទិវាឆ្នាំនេះ ខេត្តបានឲ្យអាជ្ញាធរស្រុក ក្រុងទាំង៩ សហការជាមួយខណ្ឌរដ្ឋបាលព្រៃឈើខេត្ត ធ្វើការដាំកូនឈើនៅលើទីតាំងផ្ទៃដីសមស្របតាមបណ្តាស្រុកក្រុងរៀងៗខ្លួន។
ជាក់ស្តែងថ្ងៃនេះអាជ្ញាធរក្រុងបានលុងសហការជាមួយ សហភាពសហព័ន្ធយុវជនកម្ពុជាខេត្ត និងយុវជនស្រលាញ់សន្តិភាព បាននាំយកកូនឈើ បីប្រភេទរួមមាន កូនឈើ គគីកូនឈើត្របែកព្រៃ និងកូនឈើលឿងរាជ សរុបចំនួន៣៥០ដើម មកដាំនៅសងខាងព្រលានយន្តហោះខេត្តដើម្បីលម្អសោភណភាពក្រុង ក៏ដូចជាប្រែក្លាយទីក្រុងបានលុងអោយមានបៃតង។
លោកអភិបាលខេត្តបន្តថា ការចលនាដាំដើមឈើនេះគឺអនុវត្តតាមគោលនយោបាយកំណែទម្រង់ព្រៃឈើរបស់រាជរដ្ឋាភិបាលកម្ពុជាក្នុង គោលដៅយូរអង្វែងរបស់ប្រទេសជាតិយើង គឺការអភិរក្ស និងការគ្រប់គ្រងធនធានធម្មជាតិ ជីវចម្រុះ និងប្រព័ន្ធអេកូឡូស៊ីប្រកបដោយប្រសិទ្ធភាព ដើម្បីរួមចំណែកក្នុងការកាត់បន្ថយភាពក្រីក្ររបស់ប្រជាជន និងការអភិវឌ្ឍសេដ្ឋកិច្ចសង្គមឲ្យបានប្រសើរឡើង និង ប្រែក្លាយមូលដ្ឋាននីមួយៗឲ្យមានទេសភាពល្អ ប្រកប ដោយគម្របពណ៌បៃតង កាន់តែស្រស់ត្រកាលឡើង៕
Source: Kampuchea Thmey Daily
0 Comments