ភ្នំពេញ ៖ ចោរឆក់កាបូបលុយចំនួនពីរនាក់ ត្រូវបានជនរងគ្រោះជាម្ចាស់កាបូបចាប់ក្របួចកអាវ ខណៈដែលពួកវាធ្វើសកម្មភាពឆក់បានហើយ តែទាក់ដៃម៉ូតូដួលប្រកាច់ប្រកិន។
យោងតាមប្រភពពីលោកវរសេនីយ៍ទោ ម៉ៅ សឿត អធិការរងនគរបាលខណ្ឌច្បារអំពៅបានរៀបរាប់ពីហេតុការណ៍នេះថា កាលពីវេលាម៉ោង១៦និង៣០នាទីរសៀលថ្ងៃទី២២ ខែកក្កដានេះ ជនរងគ្រោះឈ្មោះឆែម ម៉ាច ភេទស្រី អាយុ២២ឆ្នាំ មានទីលំនៅផ្ទះលេខ១៣៦ ភូមិឫស្សី សង្កាត់ស្ទឹងមានជ័យ២ខណ្ឌមានជ័យ បានជិះម៉ូតូជាមួយប្តី និងកូនស្រី អាយុ២ឆ្នាំ ចេញពីកៀនស្វាយឆ្ពោះទៅផ្ទះជួលនៅស្ទឹងមានជ័យ ដោយធ្វើដំណើរតាមបណ្តោយផ្លូវជាតិលេខ១។ លុះមកដល់ភូមិបឹងឈូក សង្កាត់និរោធ ខណ្ឌច្បារអំពៅ ក៏ស្រាប់តែមានជនសង្ស័យពីរនាក់ជិះម៉ូតូម៉ាកវ៉េវពណ៌ក្រហមពាក់ស្លាកលេខពោធិ៍សាត់1I 2229 មកពីក្រោយអែបខាងឆ្វេង រួចឆក់កាបូបស្ពាយស្ត្រីរងគ្រោះតែចៃដន្យពេលឆក់បានក៏ស្រាប់តែទាក់ដៃម៉ូតូដួលប្រកាច់ប្រកិន ហើយភ្លាមៗនោះជនរងគ្រោះជាប្តីព្រមទាំងប្រជាពលរដ្ឋនៅក្បែរចំណុចកើតហេតុជួយចាប់ប្រគល់ឲ្យនគរបាលភ្លាមៗ។
លោកអធិការរងបានបញ្ជាក់ថា ជនសង្ស័យទាំងពីរនាក់ដែលធ្វើសកម្មភាពឆក់កាបូបគឺទី១ឈ្មោះ ជាតិ ប្រុស ភេទប្រុសអាយុ១៧ឆ្នាំ មានទីលំនៅភូមិដើមស្លែងសង្កាត់ច្បារអំពៅទី២ ខណ្ឌច្បារអំពៅជាអ្នកឆក់ និងទី២ជាអ្នកបើកម៉ូតូឈ្មោះ សុខ សុភ័ក្រ ភេទប្រុស អាយុ២៧ឆ្នាំ ស្នាក់នៅភូមិកំចាត់ព្រាយ ឃុំភ្នំបាត ស្រុកពញាឮ ខេត្តកណ្តាល។ ខណៈពេលដែលនគរបាលត្រួតពិនិត្យ ជនសង្ស័យទាំងពីរនាក់ក៏បានរកឃើញថ្នាំញៀនមួយកញ្ចប់ទៀតផង។
នេះជាបាបកម្មរបស់ចោរឆក់ ដែលឆក់កាបូបបានហើយ តែចំថ្ងៃស៊យទាក់ដៃចង្កូតម៉ូតូដួលប្រកាច់ប្រកិនខ្លួនឯងដោយពុំចាំបាច់ដេញចាប់។ ជនសង្ស័យត្រូវបានបញ្ជូនទៅតុលាការចាត់ការតាមផ្លូវច្បាប់នៅព្រឹកថ្ងៃទី២៣ខែកក្កដានេះហើយ៕
Source: Kampuchea Thmey Daily
0 Comments