ភ្នំពេញ ៖ នារីម្នាក់អុំទូកទៅយកមិត្តភក្តិមកផឹកស៊ីនៅកណ្តាលបឹង ត្រូវខ្យល់ខ្លាំងរលកបោកលិចទូកលង់ទឹកស្លាប់ កាលពីវេលាម៉ោង១៣ និង៣០នាទី នៅថ្ងៃទី២២ ខែកក្កដា ឆ្នាំ២០១៨ នៅចំណុចផ្លូវលំ ក្នុងបឹងសំរោង ភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
ប៉ូលិសមូលដ្ឋានបានឲ្យដឹងថា ជនរងគ្រោះក្នុងហេតុការណ៍នេះឈ្មោះ ឡាយ ស្រីកា ភេទស្រី អាយុ១៨ឆ្នាំ ជនជាតិខ្មែរ មុខរបរលក់ដូរ មានទីលំនៅបច្ចុប្បន្នផ្ទះគ្មានលេខ ភូមិព្រែកអាំង សង្កាត់ដង្កោ រាជធានីភ្នំពេញ។ ស្លាកស្នាមបន្សល់ទុកគ្មាន។
ប្រភពដដែលបានឲ្យដឹងទៀតថា នៅមុនពេលកើតហេតុ ឈ្មោះ ឡាយ រ៉ាហ្វីន និងមិត្តភក្ដិមានគ្នាប្រហែល១០នាក់ បានអុំទូកទៅបឹងសំរោងក្នុងគោលបំណងទៅផឹកស៊ីក្នុងរោងចិញ្ចឹមត្រីរបស់អ្នកភូមិ បានប្រហែល៣០នាទី ជនរងគ្រោះបានទូរស័ព្ទមកឈ្មោះ ឡាយ រ៉ាហ្វីន អោយមកយកខ្លួនទៅផឹកស៊ីដែរ ហើយឈ្មោះឡាយ រ៉ាហ្វីន ក៏មកយកដឹកជនរងគ្រោះនិងមិត្តភក្ដិ២នាក់ទៀត បានប្រហែល៣០០ម៉ែត្រក៏ប៉ះនឹងខ្យល់បក់ខ្លាំងរលកធំៗ ធ្វើអោយលិចទូកតែម្ដង។ ពេលនោះជនរងគ្រោះមិនចេះហែលទឹកក៏លិចក្នុងទឹកបាត់ ឃើញដូចនោះប្រជាពលរដ្ឋនៅក្បែរនោះក៏នាំគ្នាមុជទឹករកឃើញជនរងគ្រោះដេកស្លាប់ក្នុងបាតបឹងបាត់ទៅហើយ។
សន្និដ្ឋាន ៖ ឆ្លងតាមការបំភ្លឺ និងការពិនិត្យរបស់កម្លាំងជំនាញ សពជនរងគ្រោះពិតជាស្លាប់ដោយលង់ទឹកស្លាប់ពិតប្រាកដមែន។ បច្ចុប្បន្នសពជនរងគ្រោះបានប្រគល់ទៅអោយក្រុមគ្រួសារ យកទៅធ្វើបុណ្យនៅភូមិទ័ព ឃុំកន្សោមអក ស្រុកកំពង់ត្របែក ខេត្តព្រៃវែង តែម្ដង៕
Source: Kampuchea Thmey Daily
0 Comments