ក្រុមអ្នកការទូតបាននិយាយថា ប្រទេសរុស្ស៊ីនិងចិនកាលពីថ្ងៃព្រហស្បតិ៍បានជំរុញឲ្យមានការពន្យាពេលប្រាំមួយខែចំពោះសំណើមួយដែលសហរដ្ឋអាមេរិកដាក់ទៅកាន់ក្រុមប្រឹក្សាសន្តិសុខអង្គការសហប្រជាជាតិដែលឲ្យផ្អាកការដឹកជញ្ជូនទាំងអស់នៃផលិតផលប្រេងចម្រាញ់រួចទៅកាន់ប្រទេសកូរ៉េខាងជើង។
សហរដ្ឋអាមេរិកដែលស្វែងរកការដាក់សម្ពាធលើកូរ៉េខាងជើងឲ្យរំសាយកម្មវិធីនុយក្លេអ៊ែររបស់ខ្លួនគឺបានស្នើសុំកាលពីសប្តាហ៍មុនឲ្យគណៈកម្មាធិការទណ្ឌកម្មអង្គការសហប្រជាជាតិហាមឃាត់ការដឹកជញ្ជូនប្រេងឥន្ធនៈបន្ថែមទៀតបន្ទាប់ពីបានចោទប្រកាន់ក្រុងព្យុងយ៉ាងថាកំពុងប្រើប្រាស់ការនាំចូលខុសច្បាប់លើសពីការអនុញ្ញាត។
សេចក្តីសម្រេចដាក់ទណ្ឌកម្ម UN មួយដែលអនុម័តកាលពីឆ្នាំមុនបានកំណត់ឲ្យកូរ៉េខាងជើងទទួលបានប្រេងឆៅ៤លានបារ៉ែលក្នុងមួយឆ្នាំនិងផលិតផលប្រេងចម្រាញ់រួច៥សែនប៉ារែល។
ការកាត់បន្ថយប្រេងនិងឥន្ធនៈនឹងត្រូវបានអនុវត្តដោយប្រទេសចិនជាមុនសិនដែលជាអ្នកផ្គត់ផ្គង់តម្រូវការថាមពលរបស់កូរ៉េខាងជើងភាគច្រើនបំផុតប៉ុន្តែក៏ដោយប្រទេសរុស្ស៊ីផងដែរដែលបានផ្តល់ប្រេងមួយចំនួនដល់ក្រុងព្យុងយ៉ាង។
ប្រទេសរុស្ស៊ីនិងចិនបានប្រាប់ក្រុមប្រឹក្សាសន្តិសុខថា ពួកគេត្រូវការពេលវេលាបន្ថែមទៀតដើម្បីពិចារណាសំណើររបស់សហរដ្ឋអាមេរិកនិងដើម្បីពិនិត្យមើលឡើងវិញនៃការចោទប្រកាន់របស់ក្រុងវ៉ាស៊ីនតោនអំពីការរំលោភទណ្ឌកម្មដែលត្រូវបានបង្កឡើងដោយកូរ៉េខាងជើង។
រឿងរ៉ាវនេះបានកើតឡើងមុនកិច្ចប្រជុំមួយកាលពីថ្ងៃសុក្ររវាងរដ្ឋមន្ត្រីការបរទេសអាមេរិកលោក Mike Pompeo និងក្រុមប្រឹក្សាសន្តិសុខក្នុងទីក្រុងញូវយ៉កស្តីអំពីការជំរុញរបស់ក្រុងវ៉ាស៊ីនតោនដើម្បីបញ្ចុះបញ្ចូលឲ្យកូរ៉េខាងជើងលុបបំបាត់កម្មវិធីនុយក្លេអ៊ែរនិងមីស៊ីលរបស់ខ្លួន។
យោងតាមឯកសារដែលត្រូវបានមើលឃើញដោយភ្នាក់ងារ AFP បានឲ្យដឹងថា សហរដ្ឋអាមេរិកកាលពីសប្តាហ៍មុនបានផ្ញើររបាយការណ៍មួយទៅគណៈកម្មាធិការទណ្ឌកម្មដែលបាននិយាយថា កូរ៉េខាងជើងបានទទួលផលិតផលប្រេងយ៉ាងហោចណាស់៧៥៩,៧៩៣បារ៉ែលតាមរយៈការផ្ទេរពីនាវាទៅនាវានៅឯសមុទ្រ។
នាវាដឹកប្រេងរបស់កូរ៉េខាងជើងត្រូវបានគេរាយការណ៍ថាបានទទួលការដឹកជញ្ជូនប្រេងខុសច្បាប់នៅក្នុងដែនទឹកអន្តរជាតិពីនាវាដែលជារឿយៗបានបិទប្រព័ន្ធតាមដានផ្កាយរណបរបស់ខ្លួនដើម្បីការពារការត្រួតពិនិត្យសកម្មភាពរបស់ពួកគេ៕ AFP
Source: Kampuchea Thmey Daily
0 Comments