ពលរដ្ឋជាង៥០០គ្រួសារ រងគ្រោះដោយទឹកជំនន់ បានទទួលអំណោយមនុស្សធម៌ពីលោកលី សាម៉េត និងលោកឧកញ៉ាឌី ប៉ូ

កំពង់ស្ពឺ ៖ លោកលី សាម៉េតនិងលោកឧកញ៉ាឌី ប៉ូ ជាអគ្គនាយកក្រុមហ៊ុនអេងឌីប៉ូអភិវឌ្ឍន៍ បាននាំយកអំណោយមនុស្សធម៌ចែកជូនដល់ប្រជាពលរដ្ឋរងគ្រោះ ដោយទឹកជំនន់កើនឡើងជាង៥០០គ្រួសារមកពី៤ភូមិ គឺភូមិក្រាំងរលួស ភូមិកុមារពេទ្យ ភូមិលួស និងភូមិត្រពាំងក្តុកគ្រួរ ក្នុងឃុំអូរ ស្រុកភ្នំស្រួច ខេត្តកំពង់ស្ពឺ ប្រារព្ធចែកនៅទីធ្លាវត្តក្រោលគោពោធិ៍ព្រឹក្ស ដែលអំណោយចែកជូនបងប្អូនរួមមាន គ្រឿងឧបភោគ បរិភោគមួយចំនួន និងថវិកា២ម៉ឺនរៀលក្នុងមួយគ្រួសារនាព្រឹកថ្ងៃទី២០កក្កដា ឆ្នាំ២០១៨។

លោកលី សាម៉េត អគ្គនាយករងក្រុមហ៊ុនអេងឌីប៉ូអភិវឌ្ឍន៍មានប្រសាសន៍ថា រូបលោកកំពុងព្យាបាលជំងឺនៅបរទេស ប៉ុន្តែបន្ទាប់ពីទទួលព័ត៌មានថា បងប្អូនប្រជាពលរដ្ឋរងគ្រោះដោយទឹកជំនន់លោកក៏បានបញ្ជាមកក្រុមហ៊ុនឱ្យទិញមី ត្រីខប្រអប់ សារុងលេខ១ថៃនិងថវិកាក្នុងមួយគ្រួសារ២ម៉ឺនរៀលដើម្បីមកចែកជូនបងប្អូនសម្រាលការលំបាក។

លោកលី សាម៉េត មានប្រសាសន៍បន្តថា ដោយសារតែទឹកជន់លិចសូមបងប្អូនប្រជាពលរដ្ឋត្រូវចេះថែសុខភាពផ្ទាល់ខ្លួន ត្រូវដាំទឹកឆ្អិនហូបចៀសវាងកុំឱ្យមានជំងឺរាករុសជាន់លើការលំបាក។
លោកអគ្គនាយករង មានប្រសាសន៍បន្តទៀតថា ដោយសារតែបងប្អូនបានសេចក្តីសុខនិងទទួលបានការអភិវឌ្ឍន៍ សូមបងប្អូនអញ្ជើញទៅបោះឆ្នោតជូនគណបក្សណាដែលបងប្អូនស្រឡាញ់នាថ្ងៃទី២៩កក្កដាខាងមុខនេះកុំបីខាន។

លោកស្រីតាំង គឹមចេង មេឃុំអូរបានឱ្យដឹងថា រយៈពេល៣ថ្ងៃមកនេះជំនន់ទឹកភ្លៀងពីភ្នំពេជ្រនិលនិងភ្នំគិរីរម្យហូរជន់លិចភូមិចំនួន៤ក្នុងឃុំអូរ បណ្តាលឱ្យប្រជាពលរដ្ឋជាង៥០០គ្រួសារ(ស្ថិតិបឋម៣៦៧គ្រួសារ)រងគ្រោះលិចលង់ផ្ទះសម្បែងនិងទ្រព្យសម្បត្តិ សត្វពាហនៈ តែមិនរងគ្រោះដល់អាយុជីវិតពលរដ្ឋឡើយ។

លោកស្រីមេឃុំបន្តថា ប្រជាពលរដ្ឋរស់នៅទីនេះ ប្រកបរបរជីកទំពាំងលក់ ហើយបន្ទាប់ពីមានទឹកជំនន់ពួកគាត់មិនអាចទៅជីកទំពាំងបាន ធ្វើឱ្យជួបការខ្វះខាតយ៉ាងខ្លាំង។ ប្រជាពលរដ្ឋមួយចំនួនមកស្នាក់នៅក្នុងវត្តចោលផ្ទះសម្បែង។ តាងនាមពលរដ្ឋរងគ្រោះខ្ញុំសូមថ្លែងអំណរគុណដល់លោកលី សាម៉េតនិងលោកឧកញ៉ាឌី ប៉ូ ដែលបាននាំអំណោយមនុស្សធម៌ជួយដល់ប្រជាពលរដ្ឋរងគ្រោះទាំងអស់។

លោកអ៊ូ យ៉ុង ប្រធានក្រុមប្រឹក្សាស្រុកភ្នំស្រួច បានឱ្យដឹងថា បន្ទាប់ពីមានទឹកជំនន់ប៉ុន្មានថ្ងៃនេះ ក្រុមការងារថ្នាក់ស្រុក និងឃុំបានចុះជួយធ្វើអន្តរាគមន៍ជួយប្រជាពលរដ្ឋពីថ្ងៃដំបូង រហូតដល់ពេលនេះ និង បន្តតាមដានជាប់ជាប្រចាំ។ ទោះយ៉ាងណាក៏ដោយមិនមានបងប្អូនប្រជាពលរដ្ឋរងគ្រោះដល់ជីវិតនោះឡើយ។

លោកអ៊ូ យ៉ុងបន្តថា តាងនាមប្រជាពលរដ្ឋរងគ្រោះដោយទឹកជំនន់ លោកសូមថ្លែងអំណរគុណដល់លោកលី សាម៉េតនិងលោកឧកញ៉ាឌី ប៉ូ ដែលបាននាំអំណោយមនុស្សធម៌ជួយដល់ប្រជាពលរដ្ឋរងគ្រោះនាពេលនេះ ហើយសង្ឃឹមថា នឹងមានសប្បុរសជនដទៃទៀតមកជួយប្រជាពលរដ្ឋជាបន្តបន្ទាប់។ លោកបញ្ជាក់ថា ទោះបីមានទឹកជំនន់យ៉ាងណាក៏មិនប៉ះពាល់ដល់ការបោះឆ្នោតនាថ្ងៃទី២៩ ខែកក្កដា ឆ្នាំ២០១៨នោះទេ។

នាឱកាសនោះលោកលី សាម៉េត និងលោកឧកញ៉ាឌី ប៉ូ បានជួយឧបត្ថម្ភដល់អាជ្ញាធរស្រុក ឃុំ ប៉ូលិស និងព្រះសង្ឃគង់នៅវត្តក្រោលគោពោធិ៍ព្រឹក្ស សរុបប្រមាណ៣០លានរៀលផងដែរ៕