ភ្នំពេញ ៖ គណបក្សប្រជាជនកម្ពុជាសម្តែងសេចក្តីរីករាយ តាមរយៈសេចក្តីប្រកាសបណ្តោះអាសន្នរបស់ គជប ដោយបានដឹងថា ប្រជាជនជាង ៨២,១៧% នៃអ្នកបោះឆ្នោតបានទៅចុះឈ្មោះក្នុងបញ្ជីបោះឆ្នោតបានទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ដើម្បីបង្ហាញពីជម្រើស និងឆន្ទៈរបស់ខ្លួន។ អត្រាអ្នកបោះឆ្នោតខ្ពស់ បានបង្ហាញពីភាពរីករាយ និងសិទ្ធិនយោបាយរបស់ប្រជាជនកម្ពុជា ក្នុងការពង្រឹងប្រព័ន្ធនយោបាយសេរីពហុបក្ស។
នៅក្នុងសេចក្តីថ្លែងការណ៍របស់គណបក្សប្រជាជនកម្ពុជា ធ្វើនៅរាជធានីភ្នំពេញចុះថ្ងៃទី ២៩ ខែកក្កដា ឆ្នាំ២០១៨ ក៏បានសម្តែងនូវការជឿជាក់យ៉ាងមុតមាំថា ប្រព័ន្ធនយោបាយសេរីពហុបក្ស គឺជាមូលដ្ឋានគ្រឹះ នៃសន្តិភាព និងការអភិវឌ្ឍប្រកបដោយចិរភាព។ គណបក្សប្រជាជនកម្ពុជាសូមកោតសរសើរគណៈកម្មាធិការជាតិរៀបចំការបោះឆ្នោតក្នុងការផ្តល់នូវសេវាកម្មប្រកបដោយវិជ្ជាជីវៈ របស់ខ្លួនក្នុងការរៀបចំការបោះឆ្នោតជាសកលប្រកបដោយសេរី យុត្តិធម៌ និងតម្លាភាព។ គណបក្សប្រជាជនកម្ពុជាសូមកោតសរសើរចំពោះប្រជាជនកម្ពុជាទាំងអស់ ដែលបានចូលរួមបោះឆ្នោតនៅថ្ងៃនេះ ដើម្បីទ្រទ្រង់ប្រព័ន្ធនយោបាយ សេរី ពហុបក្សនៅកម្ពុជា។ គណបក្សប្រជាជនកម្ពុជាក៏សូមថ្លែងអំណរគុណផងដែរចំពោះភ្នាក់ងារគណបក្ស អ្នកសង្កេតការណ៍បោះឆ្នោតជាតិ និងអន្តរជាតិមកពីបណ្តាអង្គការមិនមែនរដ្ឋាភិបាល អង្គការសង្គមស៊ីវិល អង្គការអន្តរជាតិ និងអង្គការបណ្តាញគណបក្សនយោបាយអន្តរជាតិ មកពីប្រទេសចំនួន ៥២ ជុំវិញពិភពលោក ដើម្បីធ្វើជាសាក្សី នៃប្រជាធិបតេយ្យពិតប្រាកដនៅកម្ពុជា៕
Source: Kampuchea Thmey Daily
0 Comments