បាត់ដំបង ៖ លុយកាក់ និងគ្រឿងអលង្ការ សរុបប្រមាណ ១០ម៉ឺនបាត ត្រូវបានម្ចាស់ធ្វើការឆោឡោទាំងកណ្តាលថ្ងៃថា ត្រូវបានជនមិនស្គាល់មុខធ្វើសកម្មភាពគាស់ទ្វារក្រោយចូលប្រមូលគ្មានសល់ បន្ទាប់ពីជនរងគ្រោះបានប្រមូលភោគផលពោតដើម្បីលក់ចេញទៅលើទីផ្សាររួចមក។
តាមការអះអាងពីស្ត្រីដែលជាម្ចាស់ផ្ទះ និងក៏ជាជនរងគ្រោះដែលមានឈ្មោះ អ៊ុំ ប៉ុន ភេទស្រី អាយុ៥៦ឆ្នាំ មានមុខរបរជាគ្រូពេទ្យ រស់នៅត្រង់ចំណុចកើតហេតុ នៅភូមិតាស្តាឃុំតាស្តា ស្រុកសំពៅលូន ខេត្តបាត់ដំបង បានលើកឡើងថា ករណីនេះអាចកើតឡើងនៅចន្លោះពីម៉ោង ២ រសៀល ដល់ម៉ោង ៦ ល្ងាច ថ្ងៃទី ២៨ ខែ កក្កដា ឆ្នាំ ២០១៨ខណៈដែលអ្នកស្រីមិនបាននៅផ្ទះ។
សមត្ថកិច្ចមូលដ្ឋានបានបង្ហើបអោយដឹងថា ឆ្លងតាមការពិនិត្យគឺមានជនមិនស្គាល់មុខបានធ្វើសកម្មភាពគាស់ទ្វារខាងក្រោយផ្ទះ ព្រមទាំងបានចូលរើ កកាយ សម្ភារៈក្នុងផ្ទះ ហើយបានយកលុយ និងគ្រឿងអលង្ការមួយចំនួន គេចចេញទៅបាត់ដោយមិនមានបន្សល់ដានអ្វីបន្តិចទាល់តែសោះ សូម្បីតែដីខាងក្រោយផ្ទះដែលសើមទើបនឹងភ្លៀងរួចក៏មិនមានដានជើងដែរ នេះបានពិតជាចោរជើងឆើតមែន។
ទ្រព្យសម្បត្តិដែលបាត់បង់រួមមាន ប្រាក់បាតចំនួន ៥០ ០០០ បាត និងខ្សែដៃ ធ្វើអំពីមាសតម្លៃប្រហែល ៥០ ០០០ បាតដូចគ្នា សរុបអស់ប្រមាណ ១០ម៉ឺនបាត។ គួរបញ្ជាក់ដែរថា នៅខាងមុខផ្ទះរបស់ស្ត្រីរងគ្រោះ គឺមានស្ថានីយប្រេងឥន្ធនៈមួយកន្លែងដែរ ដែលជារបស់កូន ដោយមានបំពាក់កាមេរ៉ាសុវត្ថិភាពផងដែរ ប៉ុន្តែមិនអាចមើលឃើញនោះទេដោយសារចោរចូលពីខាងក្រោយ។
ហើយនៅប៉ុន្មានឆ្នាំមុនអ្នកស្រីក៏ធ្លាប់មានចោរមូលគាស់ផ្ទះម្តងរួចមកហើយដែរ ដោយបានប្រមូលយកលុយកាក់អស់យ៉ាងច្រើនសន្ធឹកសន្ធាប់ បន្ទាប់ពីបានប្រមូលផលពោតរួចដូចគ្នា មានន័យថាចោរនេះពិតជាឆ្លាតមែនពេលលក់ពោតរួច ទើបគេចាប់ផ្តើមលួចដោយបច្ចុប្បន្ន សមត្ថកិច្ចកំពុងធ្វើការស្រាវជ្រាវទៅលើករណីនេះ ដើម្បីអោយដឹងថាចោរនោះជានរណា ?៕
Source: Kampuchea Thmey Daily
0 Comments