មន្ត្រីកសិកម្មខេត្ត ណែនាំកសិករឱ្យដាំបន្លែទៅតាមបច្ចេកទេសដើម្បីទទួលបានផលច្រើន

ស្ទឹងត្រែង ៖ មន្ទីរកសិកម្មរុក្ខាប្រមាញ់ និងនេសាទខេត្តមានគម្រោងសាកវប្បកម្ម បានបង្ហាត់បង្រៀនកសិករឲ្យផ្លាស់ប្តូរការដាំដុះតាមទម្លាប់ ទៅអនុវត្តតាមលក្ខណៈបច្ចេកទេស ដើម្បីឲ្យការផលិតបន្លែបង្ការ ទទួលបានផលច្រើន។

លោកលៀង សេង ប្រធានមន្ទីរកសិកម្មខេត្តស្ទឹងត្រែងបានបញ្ជាក់ថា ៖ នៅរដូវវស្សានេះ បងប្អូនត្រូវតែនឹកឃើញពីបច្ចេសទេស ដែលបានសិក្សាកន្លងមក ហើយលើករងដាំបន្លែឱ្យបានត្រឹមត្រូវទៅតាមបច្ចេកទេស ដើម្បីយើងមានបន្លែទៅផ្គត់ផ្គង់ទីផ្សារបានគ្រប់គ្រាន់ និងលើកតម្កើងជីវភាពខ្លួនឯងផង។

អ្នកស្រីហឿ ស្រ៊ានកសិករដាំបន្លែ នៅឃុំសាមឃួយបានទទួលស្គាល់ថា ៖ កសិករនៅក្នុងឃុំនេះ ក្រោយពីបាន រៀនសូត្រនូវបច្ចេកទេសកសិកម្ម មក កសិករបានបង្កើនការដាំបន្លែ បានច្រើនគ្នា មិនទុកផ្ទៃដីឲ្យទំនេរឡើយ ហើយទទួលបានផលល្អមែនមិនដូចមុនធ្វើតាមទម្លាប់គ្រាន់តែបរិភោគមិនគ្រាន់។

លោកឡុង សារាត កសិករនៅសង្កាត់ព្រះបាតក្រុងស្ទឹងត្រែង បានទទួលស្គាល់ថា ៖ បន្លែបង្ការដែលកសិករដាំដុះបាននាំ យកទៅទីផ្សារងាយស្រួលលក់ ព្រោះ បច្ចុប្បន្នប្រជាពលរដ្ឋយើងបាននិយមបរិភោគបន្លែក្នុងស្រុកច្រើនជាងបន្លែនាំចូល។

លោក តាំងជីផេងមន្ត្រីបច្ចេកទេសនៃមន្ទីរកសិកម្មខេត្តស្ទឹងត្រែងបានបញ្ជាក់ថា ៖ កត្តានេះហើយដែលតម្រូវឱ្យកសិករយើងរួមគ្នាបង្កើនការដាំបន្លែឱ្យបានច្រើនដើម្បីជួយបង្គ្រប់ទៅលើទីផ្សារ និងរកបានប្រាក់ចំណូលផង។

លោកបន្តថា ៖ នៅរដូវវស្សានេះ ចូរបងប្អូនដាំដុះអនុវត្តទៅតាមបច្ចេកទេសដោយលើកដីធ្វើរង និងថែទាំ ឱ្យបានជាប្រចាំ ដើម្បីធ្វើឲ្យដំណាំទទួលបានផល ច្រើននឹងគ្មានជាតិគីមីស្ថិត ក្នុងគម្រោងសាកវប្បកម្មកម្ពុជា៕