ព្រឹកនេះ សម្តេចតេជោ ហ៊ុន សែន អញ្ជើញទស្សនកិច្ចសង្វាក់ផលិតកម្មរោងចក្រ ថប សាមីត ហ្គាមេន អ៊ីន( Top Summit Garment Inc) មានទីតាំង ស្ថិតនៅផ្លូវជាតិលេខ៤

ភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន អញ្ជើញ ទស្សន កិច្ចសង្វាក់ផលិតកម្មរោងចក្រ ថប សាមីត ហ្គាមេន អ៊ីន( Top Summit Garment Inc) មានទីតាំង ស្ថិតនៅផ្លូវជាតិលេខ ៤ ភូមិត្រពាំងទួល សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ នៅវេលាម៉ោង៩ព្រឹកថ្ងៃទី១៨ ខែកក្កដា។

រោងចក្រ Top Summit Garment Inc ដែលមានអ្នកវិនិយោគជាជនជាតិតៃវ៉ាន់ បានចាប់ផ្តើមដំណើរការកាលពីចុងឆ្នាំ២០១២ ដោយមានកម្មករនិយោជិតសរុប៣.៨៧២ នាក់ ក្នុងនោះ កម្មការិនីមានចំនួន ៣.៥៦៣នាក់។ ជារោងចក្រតែមួយ ដែលផ្គត់ផ្គង់ទៅឲ្យម៉ាក Nike ផលិតផល សម្រេចត្រូវបាននាំចេញទៅ អឺរ៉ុប និង អាមេរិក។ រោងចក្រនេះមានទំហំផ្ទៃដីសរុប ៥០.៦៦៨ ម៉ែត្រការ៉េ មានអគារផលិតកម្មចំនួន ២ ,ឃ្លាំងចំនួន៣ និងមានអាហារដ្ឋាន២ កន្លែង។ ប្រាក់ឈ្នួល និង ប្រាក់អត្ថប្រយោជន៍ផ្សេងៗរបស់កម្មករ និយោជិតទាំងអស់មានប្រមាណ១.០២៣.២២៤ ដុល្លារ ក្នុង១ខែ។ ប្រាក់ឈ្នួលអប្បបរមា១៧០ ដុល្លារ និង បន្តកើនឡើងប្រាក់ឈ្នួលជារៀងរាល់ឆ្នាំ ក្នុង១ឆ្នាំ ១ដុល្លារ។ ប្រាក់សោហ៊ុយធ្វើដំណើរ៧ដុល្លារដាក់បញ្ចូលក្នុងប្រាក់ ឈ្នួលអប្បបរមា ដើម្បីគណនា ប្រាក់ការងារបន្ថែមម៉ោង។ ប្រាក់រង្វាន់ធ្វើការទៀងទាត់ ១០ ដុល្លារ និង ប្រាក់អតីតភាពការងារចាប់ពី ២ ដុល្លារ ដល់ ១២ ដុល្លារ។ ក្រៅពីប្រាក់អត្ថប្រយោជន៍ដែលកំណត់ក្នុងច្បាប់រោងចក្រក៏នៅមានការ ផ្តល់ ប្រាក់អត្ថប្រយោជន៍ផ្សេងៗទៀតជា ច្រើន។

សូមបញ្ជាក់ថាតាមរយៈគោលនយោបាយជំរុញវិស័យឧស្សាហកម្មសម្តេចតេជោ ហ៊ុន សែន បានសម្រេចដាក់ដំណើរចុះជួបសំណេះសំណាលជាមួយកម្មករ កម្មការិនីទាំងនៅក្នុងរាជធានីភ្នំពេញ និង តាមបណ្តាខេត្តចាប់តាំងពីថ្ងៃទី២០ ខែសីហា ឆ្នាំ២០១៧។ គិតមកដល់ថ្ងៃនេះ សម្តេចតេជោ ហ៊ុន សែន បានជួបសំណេះសំណាលជាមួយកម្មករកម្មការិនីចំនួន ៤៩លើកមកហើយ។ ជំនួប៤៩លើកនេះមាន កម្មករ កម្មការិនី សរុបជិត៧០ម៉ឺននាក់ហើយដែល សម្តេចតេ ជោ បានជួបសំណេះសំណាល។

ក្នុងយុទ្ធនាការចុះជួបសំណេះសំណាលជាមួយកម្មករប្រមុខរាជរដ្ឋាភិបាល បានដោះស្រាយបញ្ហាប្រឈមរបស់កម្មករ និងដាក់ចេញ នូវកិច្ចគាំពារសង្គមដល់កម្មករ-និយោជិត រួមមានៈការកំណត់ ផ្តល់ជូននូវរបបថែទាំសុខភាពដល់កកម្មករដោយនិយោជកជាអ្នកបង់ថ្លៃជួស, ការផ្តល់នូវរបបឧបត្ថម្ភ មាតុភាព ចំពោះកម្មការិនីដែលសម្រាលបានកូនមួយចំនួន ៤០ ម៉ឺនរៀល,កើតបានកូនភ្លោះពីរចំនួន ៨០ ម៉ឺនរៀលនិងកូន ភ្លោះបីចំនួន ១២០ ម៉ឺនរៀលនិងការអនុញ្ញាតឈប់លំហែមាតុភាព រយៈពេល ៣ខែដោយទទួលបានប្រាក់ឈ្មួលពលកម្ម ១២០ % ជាដើម។ ការព្យាបាលជំងឺដោយមិនគិត ថ្លៃនៅ តាមមន្ទីរពេទ្យរដ្ឋ។ ការជិះរថយន្តក្រុងដោយមិនគិតថ្លៃ។ ការអន្តរាគមន៍បញ្ចុះតម្លៃទឹកភ្លើង និងថ្លៃផ្ទះជួល និងបានអន្តរាគមន៍ជួយដល់កម្មករ ដែលត្រូវថៅកែរត់ចោល ...។

សម្រាប់អាណត្តិទី៦ ប្រសិនបើគណបក្សប្រជាជនកម្ពុជាបន្តឈ្នះឆ្នោតសម្តេចតេជោ ហ៊ុន សែន ប្រមុខគណបក្សប្រជាជនកម្ពុជា បានអះអាងថា រាជរដ្ឋាភិបាលនៅ តែបន្តយកចិត្តទុក ដាក់ ជំរុញវិស័យឧស្សាហកម្ម និងជំរុញលើកកម្ពស់ជីវភាពរបស់កម្មករ កម្មការិនីផងដែរ៕