សៀមរាប ៖ សមត្ថកិច្ចមូលដ្ឋានបានឲ្យដឹងថា បុរសម្នាក់ខូចចិត្តនឹងប្រពន្ធសុំលែង ហើយបានផឹកស្រារាល់ថ្ងៃរហូតបាត់ម្ចាស់ការ រួចក៏យកក្រមាពោះគោមកចង.ក ទម្លាក់ខ្លួនពីដើមជើងគោកម្ពស់០២ម៉ែត្រកន្លះបណ្តាលឲ្យស្លាប់។
ហេតុការណ៍បង្កការភ្ញាក់ផ្អើលនេះ កើតឡើងនៅវេលាម៉ោង១៥និង៣០នាទី ថ្ងៃទី១៦ ខែកក្កដា ឆ្នាំ២០១៨ ស្ថិតនៅក្នុងភូមិថ្មី ឃុំស្វាយលើ ស្រុកស្វាយលើ ខេត្តសៀមរាប។
លោកវរសេនីយ៍ឯក ស៊ុន អេង អធិការនគរបាលស្រុកស្វាយលើ បានឲ្យដឹងនៅព្រឹកថ្ងៃទី១៧ថា មានករណីចងកធ្វើអត្តឃាតមួយ ដោយ ជនរងគ្រោះឈ្មោះ ធឿន សុផល ភេទប្រុស អាយុ២៧ឆ្នាំ មានស្រុកកំណើតនៅភូមិ៤៥ ឃុំក្រែក ស្រុកពញាក្រែក ខេត្តកំពង់ចាម ស្នាក់នៅបច្ចុប្បន្ន ភូមិត្រពាំងខ្នារ ឃុំស្វាយលើ ស្រុកស្វាយលើ ខេត្តសៀមរាប។
លោកបន្តថា ជនរងគ្រោះបានយកក្រមាពោះគោពណ៌ក្រហមចងទម្លាក់ខ្លួនពីដើមជើងគោកម្ពស់០២ម៉ែត្រកន្លះ។ លោកបញ្ជាក់ថា តាមការបំភ្លឺពីសាច់ញាតិជនរងគ្រោះបានឲ្យដឹងថា ជនរងគ្រោះមានបញ្ហាសតិអារម្មណ៍ ដោយបានលែងលះគ្នាជាមួយប្រពន្ធរយៈពេល០១ឆ្នាំមកហើយ ក្រោយពីលែងលះជនរងគ្រោះបាត់បង់ភាពម្ចាស់ការលើខ្លួនឯង ដោយបានដើរផឹកគ្មានទិសដៅពិតប្រាកដ។ មុនថ្ងៃកើតហេតុ ជនរងគ្រោះបានសុំផ្ទះឈ្មោះ យី វី ស្នាក់នៅ ស្ថិតនៅក្នុងភូមិថ្មី ឃុំស្វាយលើ ស្រុកស្វាយលើ ខេត្តសៀមរាប លុះដល់ម៉ោង១៥និង០០នាទី ជនរងគ្រោះបានផឹកស្រាស្រវឹងហើយបានជិះម៉ូតូចេញពីកន្លែងស្នាក់នៅដោយមិនបានប្រាប់ម្ចាស់ផ្ទះឡើយ លុះដល់វេលាម៉ោង១៥និង៣០នាទី ស្រាប់តែមានក្មេងមួយក្រុមបានរត់មកប្រាប់អ្នកភូមិថា មានមនុស្សចង.ក សម្លាប់ខ្លួននៅក្នុងព្រៃខាងកើតភូមិ ទើបរាយការណ៍ដល់សមត្ថកិច្ច។
លោកបញ្ជាក់ទៀតថា ក្រោយទទួលបានព័ត៌មានយើងបានសហការជាមួយលោក មេភូមិថ្មី ក្រុមប្រឹក្សាឃុំស្វាយលើ ប្រធានមណ្ឌលសុខភាពស្វាយលើ ចុះពិនិត្យដល់កន្លែងកើតហេតុ។ ការពិនិត្យជាក់ស្តែង គឺមានលាមកនិងទឹករំអិល នៅជាប់នឹងអវយវៈរបស់ជនរងគ្រោះ តាមការសន្និដ្ឋានផ្នែកជំនាញនិងគ្រូពេទ្យ គឺពិតជាស្លាប់ដោយការធ្វើអត្តឃាតពិតប្រាកដមែនដោយមិនពាក់ព័ន្ធ នឹង ករណីឃាតកម្មឡើយ។ ក្រោយពីសមត្ថកិច្ចចម្រុះពិនិត្យរួចបានប្រគល់សពជូនសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments