បន្ទាយមានជ័យ ៖ ពលករខ្មែរទៅរកការងារធ្វើទាំងប្រថុយប្រថានដោយខុសច្បាប់នៅប្រទេសថៃត្រូវតម្រួតថៃចាប់បញ្ជូនមកស្រុកខ្មែរវិញ ក្នុង១ថ្ងៃយ៉ាងតិចក៏១០០នាក់ដែរ តាមច្រកអន្តរជាតិប៉ោយប៉ែត ពេលដែលរាជរដ្ឋាភិបាលថៃ កំពុងរឹតបន្តឹងច្បាប់ការងារអំពីពលករទៅរកការងារធ្វើនៅស្រុកថៃដោយខុសច្បាប់។
នេះជាការលើកឡើងរបស់លោក សួន បវរ អភិបាលខេត្តបន្ទាយមានជ័យ ក្នុងកិច្ចប្រជុំក្រុមប្រឹក្សាខេត្ត កាលថ្ងៃទី១៦ ខែកក្កដា ឆ្នាំ២០១៨នៅសាលប្រជុំក្រុមប្រឹក្សាខេត្តបន្ទាយមានជ័យ។
លោក សួន បវរបានថ្លែងក្នុងកិច្ចប្រជុំនោះបន្តទៀតថា ដោយមានលិខិតពីក្រសួងមហាផ្ទៃជូនដំណឹងរដ្ឋបាលសាលាខេត្តបន្ទាយមានជ័យ គឺរដ្ឋាភិបាលថៃបានរឹតបន្តឹងច្បាប់ការងារនៅប្រទេសថៃ និងចាប់ពលករដែលធ្វើការគ្មានច្បាប់ និងចាប់បញ្ជូន ជាក់ស្តែង រយៈពេល៣ថ្ងៃនេះ ភាគីថៃបានចាប់បញ្ជូនពលករខ្មែរខុសច្បាប់១ថ្ងៃ មាន១០០នាក់ ដូចធម្មតា។
លោកសួន បវរ បានបញ្ជាក់ឲ្យដឹងទៀតថា មូលហេតុដែលភាគីថៃចាប់បញ្ជូនពលករខ្មែរខុសច្បាប់ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យដូចធម្មតា គឺមន្ត្រីច្រកចេញចូលតែមួយ រដ្ឋបាលសាលាខេត្តបន្ទាយមានជ័យ បានទទួលធ្វើប័ណ្ណព្រំដែនជូនប្រជាពលរដ្ឋបានចំនួន១៧.៥០០នាក់ និងផ្តល់ជូនបានចំនួន១៥.០០០ប័ណ្ណកន្លងមកហើយ។
យោងតាមរបាយការណ៍ប្រចាំខែមិថុនា ឆ្នាំ២០១៨ ការងារប្រឆាំងការជួញដូរមនុស្ស និងអាជីវកម្មផ្លូវភេទ គ្រប់គ្រងទេសន្តប្រវេសន៍ពលករខ្មែរ ដែលត្រូវភាគីថៃចាប់បញ្ជូនមកតាមច្រកទ្វារអន្តរជាតិប៉ោយប៉ែត មានចំនួន១.៨៩៣នាក់ ស្រី៦១៧នាក់ និងកុមារ១៧៣នាក់៕
Source: Kampuchea Thmey Daily
0 Comments