បន្ទាយមានជ័យ ៖ មានករណីគ្រោះថ្នាក់ចរាចរណ៍មួយ បានកើតឡើងរវាងរថយន្តបុកម៉ូតូលាន់ដូចរន្ទះបណ្តាលឲ្យស្លាប់ម្នាក់ និង របួសធ្ងន់ម្នាក់ កាលពីវេលាម៉ោង៨និង៣០នាទី ថ្ងៃទី៣០ ខែកក្កដា ឆ្នាំ២០១៨ តាមបណ្តោយលេខ៦៩អា មុខឡឥដ្ឋ ភូមិអូរស្ងួត ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ។
មន្ត្រីនគរបាលមូលដ្ឋានម្នាក់ បានប្រាប់អ្នកយកព័ត៌មានឲ្យដឹងថា ជនរងគ្រោះដែលស្លាប់មានឈ្មោះ ឆុន សុផាន់ ភេទប្រុស អាយុ១៨ឆ្នាំអ្នកបើកបរម៉ូតូនិងជនរងគ្រោះដែលរបួសធ្ងន់ឈ្មោះ រ៉ូ ង៉ា ភេទប្រុស អាយុ១៨ឆ្នាំ ត្រូវជាបងប្អូនជីដូនមួយរស់នៅភូមិពោធិ៍រាង ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ។
មន្ត្រីដដែលបានបញ្ជាក់ទៀតថា នៅមុនពេលកើតហេតុនោះ ជនរងគ្រោះ២នាក់បានជិះម៉ូតូហុងដា ស៊េរីឆ្នាំ២០១៦ ពណ៌ខ្មៅ ពាក់ស្លាក់លេខបន្ទាយមានជ័យ1N-3549 ដែលជិះតាមបណ្តោយផ្លូវជាតិលេខ៥៩អាទិសដៅពីកើតទៅលិច ហើយមានរថយន្តដែលមិនស្គាល់រថយន្តធុនតួរីសកូរ៉េបានបើកក្នុងល្បឿនលឿនក្នុងទិសដៅបញ្ច្រាសទិសគ្នាពីលិចមកកើតបានបុកជនរងគ្រោះជិះម៉ូតូពេញទំហឹងបណ្តាលស្លាប់ម្នាក់ ដែលជាអ្នកបើក និង អ្នកជិះពីក្រោយបណ្តាលរបួសធ្ងន់ហើយរថយន្តបានគេចខ្លួនបាត់។
ក្រោយពេលគ្រោះថ្នាក់ភ្លាមៗឃើញមានមន្ត្រីនគរបាលចរាចរណ៍ជើងគោកស្រុកមង្គលបូរី បានចុះមកពិនិត្យវាស់វែងភ្លាមៗបានហៅរថយន្តសង្គ្រោះមណ្ឌលសុខភាពឃុំអូរប្រាសាទសង្គ្រោះបន្ទាន់ទៅមន្ទីរពេទ្យមិត្តភាពកម្ពុជា ជប៉ុនមង្គលបូរី ចំណែកជនរងគ្រោះស្លាប់ត្រូវបានសាច់ញាតិមកទទួលយកធ្វើបុណ្យតាមប្រពៃណីនៅផ្ទះរងគ្រោះវិញផងដែរ៕
Source: Kampuchea Thmey Daily
0 Comments