ពានរង្វាន់​លី​គ​កំពូល​កម្ពុជា និង​លី​គ​ហ្វូ​ត​សាល​បន្ត​ប្រកួត​ឡើងវិញ​ក្រោយ​សម្រាក​រយៈពេល​ខ្លី

​ពានរង្វាន់​បាល់ទាត់​លី​គ​ហ្វូ​ត​សាល​ឆ្នាំ​២០១៨ (National Futsal League 2018) និង​ពានរង្វាន់​លីគ​កំពូល​កម្ពុជា (Metfone Cambodian League 2018) នឹង​បន្តសកម្មភាព​ប្រកួត​រៀងៗ​ខ្លួន​ឡើងវិញ​នៅ​ចុង​សប្តាហ៍​នេះ​ក្រោយ​សម្រាក​រយៈពេល​ខ្លី​ដើម្បី​ផ្តល់​ឱកាស​ឲ្យ​កីឡាករ​តាម​ក្រុម​នីមួយៗ​ចូលរួម​បោះឆ្នោត​អាណត្តិ​ទី​៦​កាលពី​ចុង​សប្តាហ៍​កន្លងទៅ​។

ចំពោះ​ពានរង្វាន់​លី​គ​ហ្វូ​ត​សាល​វិញ​ នឹង​ប្រកួត​ចុងក្រោយ​នៃ​វគ្គ​សន្សំ​ពិន្ទុ ដែល​ធ្វើឡើង​នៅ​ថ្ងៃ​សៅរ៍ ទី​០៤ ខែសីហា ឆ្នាំ​២០១៨ ក្រុម Fan Sport FT ជួប​ក្រុម​ឱ​ម៉ា​ល់ នៅ​ម៉ោង​៤​ល្ងាច និង​ក្រុម​ឆន្ទៈ​កីឡា ប៉ះ​ក្រុម Panda FC នៅ​ម៉ោង​៥និង៣០​នាទី​ល្ងាច​។ នៅ​ថ្ងៃអាទិត្យ ទី​០៥ ខែសីហា ឆ្នាំ​២០១៨​ក្រុម Down Town Sport FC ប៉ះ​ក្រុម B.A United នៅ​ម៉ោង​៤​ល្ងាច​និង​នៅ​ម៉ោង​៥:៣០​នាទី​ល្ងាច​ក្រុម Home Sport FC ជួប​ក្រុមយុវជន​៧​មករា​។



​ងាក​មក​មើល​ចំណាត់ថ្នាក់​បណ្តោះអាសន្ន​ក្រោយ​ប្រកួត​បាន​១៧​លើក​ម្នាក់​មក​ឃើញថា​ ក្រុម Down Town Sport FC​ឈរ​លេខ​១ មាន​៣៩​ពិន្ទុ តាម​ពីក្រោយ​ដោយ​ក្រុម Home Sport FC​ឈរ​លេខ​២ មាន​៣៧​ពិន្ទុ ក្រុម ស​.​ស​.​យ​.​ក កំចាយមារ ឈរ​លេខ​៣ មាន​៣៦​ពិន្ទុ ក្រុម​លេខ​៤ ឱ​ម៉ា​ល់ មាន​៣៣​ពិន្ទុ​។ ក្រុម​លេខ​៥ Fan Sport FC មាន​២៣​ពិន្ទុ ហើយ​ក្រុម​លេខ​៦ អាណាចក្រ​បៃតង មាន​២២​ពិន្ទុ​។ លេខ​៧ ឆន្ទៈ​កីឡា មាន​១៥​ពិន្ទុ ហើយ​លេខ​៨ ក្រុម Panda FC និង​ក្រុម​លេខ​៩ យុវជន​៧​មករា មាន​មាន​១៤​ពិន្ទុ​ដូចគ្នា តែ​ខុស​ត្រង់​គ្រាប់​បាល់​ចំណេញ និង​ក្រុម​B.A United លេខ​១០ មាន​៥​ពិន្ទុ​។

លី​គ​ហ្វូ​ត​សាល​ជា​លើកដំបូង​នៅក្នុង​ស្រុក​នេះ​ធ្វើឡើង​ពី​ថ្ងៃ​ទី​០៣ ខែមីនា រហូតដល់​ថ្ងៃទី​២៨ ខែ កក្កដា ឆ្នាំ ២០១៨ ខណៈ​ភាគច្រើន​ប្រកួត​នៅ​ថ្ងៃ​ចុង​សប្ដាហ៍ ដែល​មាន​ក្រុម​ជា​សមាជិក​ចំនួន​១០ក្រុម​លើ​ទីលាន ដឹ​ប្លូ​ស្ព័ត (The Blue Sport) ម្តុំ​ទួលគោក​។ ការប្រកួត​មាន​រូបមន្ត​ជា​លក្ខណៈ​ប្រកួត​បែប​លី​គ តាម​ប្រព័ន្ធ​លី​គ​២​ជុំ (​វិល​ជុំ​សន្សំ​ពិន្ទុ​) ហើយ​ក្រុម​ដែល​មាន​ពិន្ទុ​ច្រើនជាង​គេ​ចំនួន​៤​ក្រុម (Top4) ត្រូវ​ឡើង​ទៅ​ប្រកួត​គ្នា​ដណ្តើម​ជើងឯក​ប្រចាំ​រដូវ​កាល​។ ក្រុម​ជើងឯក​នឹង​ទទួល​បាន​ពានរង្វាន់១ មេដាយមាស​ម្នាក់​១​និង​ប្រាក់រង្វាន់​២០​លាន​រៀល​ផងដែរ​។



​ចំណែក​ពានរង្វាន់​លី​គ​កំពូល​កម្ពុជា​វិញ​នឹង​ប្រកួត​សប្ដាហ៍​ទី​១៦ របស់​ខ្លួន​ក្នុងចំណោម​សប្តាហ៍​ទាំង​២២ នៅ​ចុង​សប្ដាហ៍​នេះ​ដូចគ្នា​ដោយ​នៅ​ថ្ងៃ​សៅរ៍ ទី​៤ ខែសីហា ឆ្នាំ​២០១៨ ក្រុម​អគ្គស្នងការដ្ឋាន​នគរ​បាល​ជាតិ ត្រូវ​ប៉ះ​ក្រុម​សូល​ទី​ឡូ​អង្គរ វេលា​ម៉ោង​៦​ល្ងាច​លើ​ទីលាន​ពហុ​កីឡដ្ឋាន​ជាតិ​ហើយ​ក្រុម​វិសាខា ប៉ះ​វេ​ស្ទើ​ន​ភ្នំពេញ នៅ​ទីលាន​ស្តា​ត​ចាស់ វេលា​ម៉ោង​៦​ល្ងាច​ដូចគ្នា និង​១​គូ​ទៀត​ក្រុម​ភ្នំពេញ​ក្រោ​ន ទទួល​ក្រុម​ព្រះខ័ន​រាជ​ស្វាយរៀង នៅវេលា​ម៉ោង​៦​ល្ងាច​ដែរ​លើ​ទីលាន​កីឡដ្ឋាន RSN​។ ចំណែក​នៅ​ថ្ងៃអាទិត្យ ទី​៥ ខែសីហា វិញ​ក្រុម​អគ្គីសនី​កម្ពុជា ប៉ះ​ក្រុម​អង្គ​រថា​យ​ហ្គឺ​រ វេលា​ម៉ោង​៣​រសៀល​លើ​ទីលាន​កីឡដ្ឋាន​អគ្គីសនី​កម្ពុជា ខណៈ​ក្រុម​អាស៊ី​អឺរ៉ុប ជួប​ក្រុម​ណាហ្គា​វើ​ល វេលា​ម៉ោង​៣​រសៀល​ដែរ​លើ​ទីលាន​កីឡដ្ឋាន AEU Sport Park និង​ក្រុម​ក្រសួងការពារជាតិ ប៉ះ​ក្រុម​បឹងកេត វេលា​ម៉ោង​៦​ល្ងាច​លើ​ទីលាន​កីឡដ្ឋាន​ស្តា​ត​ចាស់​។



ងាក​មក​មើល​ចំណាត់ថ្នាក់​បណ្តោះ​អាសន្ន​ប្រចាំ​ពានរង្វាន់​លី​គ​កំពូល​កម្ពុជា​ឃើញថា​ ក្រុម​បឹងកេត​អែ​ហ្វ​ស៊ី បន្ត​ឡើងឈរ​កំពូល​តារាង មាន​៣៩​ពិន្ទុ តាម​ពីក្រោយ​ដោយ​ក្រុម​លេខ​២ ក្រុម​ណាហ្គា​វើ​ល និង​ក្រុម​វិសាខា មាន​៣៥​ពិន្ទុ ឈរ​លេខ​៣ មាន​៣៥​ពិន្ទុ​ដូចគ្នា​។ ក្រុម​លេខ​៤​ក្រសួងការពារជាតិ មាន​៣៤​ពិ​ន្ទុ ខណៈ​ក្រុម​លេខ​៥ ក្រុម​អគ្គស្នងការដ្ឋាន​នគរ​បាល​ជាតិ មាន​២៣​ពិន្ទុ ក្រុម​លេខ​៦ ភ្នំពេញ​ក្រោ​ន មាន​២១​ពិន្ទុ លេខ​៧ ព្រះខ័ន​រាជ​ស្វាយរៀង មាន​២១​ពិន្ទុ ដែរ ក្រុម​លេខ​៨ អាស៊ី​អឺរ៉ុប មាន​១៨​ពិន្ទុ​។ ក្រុម​លេខ​៩​សូល​ទី​ឡូ​អង្គរ មាន​១៤​ពិន្ទុ ហើយ​ក្រុម​លេខ​១០ អង្គ​រថា​យ​ហ្គឺ​រ មាន​១៣​ពិន្ទុ ស្របពេល​ក្រុម​អគ្គីសនី​កម្ពុជា ឈរ​លេខ​១១ មាន​៥​ពិន្ទុ និង​ក្រុម​វេ​ស្ទើ​ន​ភ្នំពេញ ឈរ​លេខ​១២ មាន​១​ពិន្ទុ​។

ពានរង្វាន់​លី​គ​កំពូល​កម្ពុជា រដូវ​កាល​នេះ​ប្រើប្រាស់​រូបមន្ត​ប្រកួត​សន្សំ​ពិន្ទុ​វិល​ជុំ​ចំនួន​២​ជើង​មាន​២២​សប្ដាហ៍ ដើម្បី​ស្វែងរក​ក្រុម​ខ្លាំង​ ដែល​មាន​ពិន្ទុ​ច្រើន​ជាង​គេ​ដណ្តើម​ជើងឯក​ប្រចាំឆ្នាំ​។ ការប្រកួត​ចាប់ផ្តើម​ពីថ្ងៃ​ទី​៣​ខែមីនា ដល់​ថ្ងៃទី​៣០ ​ខែកញ្ញា ឆ្នាំ​២០១៨ ដែល​មាន​សមាជិក​ចំនួន​១២ក្រុម​។ ក្រុម​ជើងឯក​នឹង​ទទួល​បាន​កៅអី​ទៅ​ចូលរួម​ប្រកួត​ក្នុង​ពានរង្វាន់ AFC Cup 2019, ពានរង្វាន់ Mekong Club Championship ជាដើម៕

   

Source: Kampuchea Thmey Daily