ប្រទេសថៃ ៖ ថ្នាំញៀនចំនួន២ប្រភេទ ដែលមានរហូតដល់ជាង ១១ លានគ្រាប់ និងកម្របានជួបប្រទះ ត្រូវបានក្រុមតម្រួតថៃចេញប្រតិបត្តិការបង្ក្រាបបានភ្លាមៗ រួមជាមួយនឹងមុខសញ្ញាចំនួន៣នាក់ ផងដែរ បន្ទាប់ពីពួកគេបានស៊ីឈ្នួលដឹកឲ្យឈ្មួញ ចេញពីខ្សែបន្ទាត់ នៃភាគខាងជើងរបស់ប្រទេសថៃ បំណងដឹកយកមកចែកចាយនៅក្នុងខេត្តមួយចំនួន ក្បែៗទីក្រុងបាងកក។
យោងតាមការចេញផ្សាយរបស់សារព័ត៌មានក្នុងប្រទេសថៃបានឲ្យដឹងថា កិច្ចប្រតិបត្តិការនេះ គឺបានធ្វើឡើងបន្ទាប់ពីក្រុមតម្រួតខេត្ត សិង្ហបុរី ទទួលបានសេចក្តីរាយការណ៍យ៉ាងច្បាស់ការមួយ របស់កម្លាំងដែលបានអះអាងថា មានការជួញដូរថ្នាំញៀនដ៏ធំមួយ ចេញពីភាគខាងជើងរបស់ប្រទេសថៃ ឆ្ពោះទៅកាន់ទីក្រុងបាងកក។
នៅពេលនោះដែរ គឺវេលាម៉ោង ២ និង ៤៥ នាទី រសៀល ថ្ងៃទី២៧ ខែកក្កដា ឆ្នាំ២០១៨ ក្រុមតម្រួត នៃស្នងការដ្ឋាន ខេត្តសិង្ហបុរី បានចេញប្រតិបត្តិការចាំស្ទាក់រថយន្ត ២ គ្រឿងដែលនុងនោះមានរថយន្តប្រភេទ កង់ ១០ មួយគ្រឿង និង រថយន្តនីសាន់ មួយគ្រឿងដោយមានការធ្វើដំណើរចេញពីភាគខាងជើងប្រទេសថៃ ឆ្លងកាត់ខេត្ត ផៈយ៉ៅ ឆ្ពោះទៅកាន់ទីក្រុងបាងកក។
មិនយូរប៉ុន្មានមុខសញ្ញាបានបង្ហាញខ្លួននៅលើកំណាត់ផ្លូវ ដែលសមត្ថកិច្ចកំពុងឈរជើងទើបកម្លាំងបានផ្តល់សញ្ញាឲ្យរថយន្តទាំង២ បញ្ឈប់យានដើម្បីត្រួតពិនិត្យ ជំហានទី១ គឺពិនិត្យទៅលើរថយន្តនីសាន់ ដែលបើកនាំមុខ និងបើកបរដោយឈ្មោះ ឆាន់ សាវ៉ាតឌី ភេទប្រុស អាយុ៤៧ឆ្នាំ រស់នៅខេត្ត រៈយ៉ង គឺមិនមានវត្ថុតាងណាមួយដែលគួរឲ្យសង្ស័យ និងពាក់ព័ន្ធទៅនឹងបទល្មើសឡើយ។
នៅពេលនោះដែរ កម្លាំងបានធ្វើការត្រួតពិនិត្យបន្តទៅលើរថយន្តកង់១០ ដែលមានដឹកគ្រាប់ពោតពេញ និងបើកបរដោយឈ្មោះ ចារ៉ាន់ កាណុន ភេទប្រុស អាយុ៤៣ឆ្នាំ និងភរិយាឈ្មោះ សិរីខាំ ប៉ិនដា អាយុ៣៨ឆ្នាំ អ្នកទាំងពីររស់នៅខេត្ត ណាន ដោយសមត្ថកិច្ចបានបញ្ជាឲ្យបំបះរថយន្តដើម្បីចាក់គ្រាប់ពោតចេញពីរថយន្ត ក៏បានប្រទះឃើញមានការុងធ្លាក់ចេញមកជាច្រើនការុង ដែលគេបានដាក់បង្កប់នៅក្រោមគ្រាប់ពោត។
ជាលទ្ធផលនៃការត្រួតពិនិត្យគឺគេសង្កេតឃើញថា នៅក្នុងការុងទាំងនោះ មានថ្នាំញៀនចំនួន២ប្រភេទ ដោយប្រភេទយ៉ាម៉ាចំនួន ៥៩ ការុង មានគ្រាប់ថ្នាំញៀនសរុប ចំនួន១១.៨០០.០០០ គ្រាប់ ( ដប់មួយលាន និង ប្រាំបីសែនគ្រាប់ ) ព្រមទាំងថ្នាំញៀនប្រភេទ ម៉ាទឹកកក ចំនួន ២៧ ការុង ដែលសរុបនៃថ្នាំញៀនប្រភេទម៉ាទឹកកក មានទម្ងន់ ៦៧៥គីឡូក្រាម។
ជុំវិញបញ្ហាករណីខាងលើនេះ ជនសង្ស័យទាំង៣នាក់ បានសារភាពថា មានឈ្មួញជាជនជាតិបរទេស ដែលនៅជាប់ៗនឹងខ្សែបន្ទាត់ព្រំដែនថៃ បានជួលពួកគេអោយដឹកចេញពីភាគខាងជើងនៃប្រទេសថៃ យកទៅចែកចាយអោយម៉ូយនៅក្នុងខេត្តមួយចំនួនដែលនៅជាប់និងទីក្រុងបាងកក ដោយគេបានអោយកម្រៃក្នុងមួយជើង សម្រាប់អ្នកបើកបររថយន្តធំគឺ ៧ សែនបាត និងអ្នកបើករថយន្តតូច បាន ៦សែនបាត ហើយកន្លងមកគឺពួកគេធ្លាប់បានដឹកជាច្រើនជើងមកហើយ។
បច្ចុប្បន្នសមត្ថកិច្ច នៃស្នងការដ្ឋានតម្រួត ខេត្តសិង្ហបុរី បាននិងកំពុងរៀបចំសំណុំរឿងដើម្បីបញ្ជូនខ្លួនពួកគេ រួមជាមួយនិងវត្ថុតាង ទៅកាន់តុលាការ ក្នុងការដាក់វិធានការតាមផ្លូវច្បាប់៕
Source: Kampuchea Thmey Daily
0 Comments