ប្រធាន គ​.​ជ​.​ប ពន្យល់​គណៈប្រតិភូ​សង្កេត​ការណ៍​អន្តរជាតិ ពី​ការវិវឌ្ឍ​ន៏​នៃ​ដំណើការ​បោះឆ្នោត​នៅ​កម្ពុជា

ភ្នំពេញ​ ៖ ការ​ពន្យល់​នេះ បាន​ធ្វើឡើង​ខណៈ​ដែល​លោក ស៊ិ​ក ប៊ុន​ហុក ប្រធាន​គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) បាន​ទទួល​ជួប​គណៈប្រតិភូ អ្នកសង្កេតការណ៍​អន្តរជាតិ​ជាន់ខ្ពស់​ចំនួន​៣២​នាក់ កាលពី​រសៀល​ថ្ងៃទី​២៨ ខែកក្កដា ឆ្នាំ​២០១៨ មកពី​បណ្តា​ប្រទេស​ជាច្រើន​នៅ​ជុំវិញ​ពិភពលោក ដើម្បី​ស្វែងយល់​ពី​ការរៀបចំ និង​ការប្រព្រឹត្តទៅ​នៃ​ការបោះឆ្នោត​នៅ​កម្ពុជា។

លោក ឌឹ​ម សុ​វណ្ណា​រុំ សមាជិក និង​ជា​អ្នកនាំពាក្យ​គ​.​ជ​.​ប បាន​ថ្លែងប្រាប់​អ្នកសារព័ត៌មាន​ក្រោយ​ជំនួប​នោះ​ថា នៅក្នុង​ជំនួប​នោះ លោក ស៊ិ​ក ប៊ុន​ហុក ក្នុងនាម​ប្រធាន គ​.​ជ​.​ប បាន​លើក​ឡើង​ពី​ការងារ​របស់ គ​.​ជ​.​ប និង​បញ្ហា​ដែល​កម្ពុជា បាន​រងគ្រោះ​នូវ​របប​មួយ ពី​អតីតកាល ដ៏​ជូរចត់ ខ្ទេចខ្ទាំ ដល់​ឫសគល់ ហើយ​បាន​ដំណើរការ​រៀបចំ​ការបោះឆ្នោត​កាលពី​ឆ្នាំ​២១៩៩៣ ហើយ​បាន​រៀប​ចំ​ការបោះឆ្នោត​ដោយ​ខ្លួនឯង​នៅ​ឆ្នាំ​១៩៩៨​។ ជាមួយគ្នា​នោះ លោក ស៊ិ​ក ប៊ុន​ហុក បាន​លើក​ឡើង​អំពី​គោលការណ៍ ដែល​ត្រូវ​រៀបចំ​ដំណើរការ​បោះឆ្នោត​មួយ​ឲ្យ​ប្រព្រឹត្ត​ទៅដោយ​សេរី ត្រឹមត្រូវ និង​យុត្តិធម៌​។

តាម​លោក ស៊ិ​ក ប៊ុន​ហុក ដើម្បី​ឲ្យ​ការបោះឆ្នោត​មួយ​ប្រព្រឹត្ត​ទៅដោយ សេរី ត្រឹមត្រូវ និង​យុត្តិធម៌ គឺជា​ការរៀបចំ​មួយ​ឲ្យ​មាន​ការ​ជឿជាក់​ពី​ម្ចាស់​ឆ្នោត ដូច្នេះ​ដើម្បី​ធ្វើការ​ងារ​នេះ​បាន លុះត្រាតែ​យើង​បង្ហាញ​នូវ​តម្លាភាព ហើយ​ក្នុង​នោះ គ​.​ជ​.​ប ក៏បាន​ប្រកាស​ស្វាគមន៍​ចំពោះ​ការចូលរួម​សង្កេតការណ៍​ពី​សំណាក់​ជាតិ និង​អន្តរជាតិ​ផង​ដែរ រហូត​បាន​ស្នើ​ឲ្យ​អង្គការសហប្រជាជាតិ​បង្កើត​ការិយាល័យ​នៅ គ​.​ជ​.​ប ទៀតផង​។ ដើម្បី​ឲ្យ​ដំណើរការ​បោះឆ្នោត​មួយ​បាន​ប្រព្រឹត្ត​ទៅដោយ​រលូន និង​ជោគជ័យ ក្រោយពី​លោក​បាន​ឡើងកាន់​ជា​ប្រធាន គ​.​ជ​.​ប ថ្មី បាន​សិក្សា​ពី​វិធីសាស្ត្រ​គ្រប់បែបយ៉ាង​នៅ​ជុំវិញ​ពិភពលោក ដើម្បី​ឲ្យ​ការបោះឆ្នោត​មួយ បាន​ប្រព្រឹត្ត​ទៅ​ដោយ​ជោគជ័យ រលូន ត្រឹមត្រូវ និង​យុត្តិធម៌ និង​បាន​យក​អ្វី​ដែល​ល្អៗ​មក​អនុវត្ត​នៅក្នុង​ដំណើរការ​បោះឆ្នោត​នៅ​កម្ពុជា ហើយ​អ្វី​ដែលជា​ជោគជ័យ​នោះ គឺ​កន្លងមក​ថ្មីៗ​នេះ មានការ​បោះឆ្នោត​ឃុំ សង្កាត់ និង​ការបោះឆ្នោត​ផ្សេងៗ​ទៀត បាន​ប្រព្រឹត្ត​ទៅ​ដោយ​រលូន ហើយ​ការបោះឆ្នោត ដែល​នឹង​ប្រព្រឹត្តទៅ​នៅ​ថ្ងៃទី​២៩ ខែកក្កដា ឆ្នាំ​២០១៨ នេះ គ​.​ជ​.​ប ក៏បាន​ប្ដេជ្ញាចិត្ត​ធ្វើ​យ៉ាង​ណា ឲ្យ​ទទួល​បាន​ជោគជ័យ​បន្តទៀត​។



តាម​លោក ឌឹ​ម សុ​វណ្ណា​រុំ នៅក្នុង​ជំនួប​ពិភាក្សា​នោះ គណៈប្រតិភូ​អ្នកសង្កេតការ​ណ៍ ក៏បាន​លើកឡើង​ពី​សំណួរ​មួយចំនួន​ផងដែរ ជាពិសេស​ទាក់ទង​ទៅនឹង​មាត្រា​មួយ ដែល​ចែង​អំពី​ការ​ផាកពិន័យ​ទៅលើ​ជនបរទេស ដែលមាន​បំណង​គាំទ្រ ឬ​ប្រឆាំង​ទៅនឹង​គណបក្ស​ណាមួយ ដែល​មាត្រា​នេះ ពួកគាត់​បាន​លើក​ជា​ចម្ងល់​ថា ហេតុ​អី​បានជា​បង្កើត​ឲ្យ​មាន​មាត្រា​នេះ​ឡើង​។

សំណួរ​នេះ​ត្រូវ​បាន​លោក ស៊ិ​ក ប៊ុន​ហុក លើកឡើងថា ការរៀបចំ​មាត្រា​នេះ​ឡើង ដោយសារតែ​យើង​មាន​បទពិសោធន៍​នា​ពេល​កន្លងមក គឺ​នៅ​ឆ្នាំ​២០១៣ ដែល​មាន​ជនបរទេស​មួយចំនួន​មានបំណង​ចូលរួម​ជ្រៀតជ្រែក និង​រំខាន​ដំណើរការ​បោះឆ្នោត​។ ដោយសារតែ​មានបទពិសោធន៍​នៅក្នុង​ឆ្នាំ​២០១៣​នោះ​ហើយ ទើបត្រូវ​យក​មក​អនុវត្ត​នៅក្នុង​ឆ្នាំ​២០១៨​នេះ ហើយ​ជនបរទេស ដែល​មានបំណង​ជ្រៀតជ្រែក និង​រំខាន​ដល់​ការបោះឆ្នោត​នៅ​កម្ពុជា នៅ​មិនទាន់​អស់​នៅឡើយ​ទេ ដូច្នេះ​ចាំបាច់​ត្រូវបង្កើត​ឲ្យ​មាន​មាត្រា​នេះ​ឡើង​។



សូម​បញ្ជាក់​ថា អ្នកសង្កេតការណ៍​បោះឆ្នោត​អន្តរជាតិ ក្រោយពី​បញ្ចប់​ការទទួល កាលពី​ថ្ងៃទី​២៥ ខែកក្កដា ឆ្នាំ​២០១៨ គ​.​ជ​.​ប បានទទួល​ស្គាល់​ជា​ផ្លូវការ​នូវ​ចំនួន​៣២២​នាក់ មកពី​ប្រទេស ស្ថាប័ន និង​ស្ថានទូត​ចំនួន​៤២ ក្នុងនោះ​រួមមាន AIPA-APA-ICAPP-CDI-EUROPEAN COUNCIL TOURISM និង TRADE-EUROPEAN COUNCIL ON INTERNATIONAL RELATIONS ជាដើម​។

ជាមួយគ្នា​នោះ គ​.​ជ​.​ប ក៏​កំពុង​ពិនិត្យ​អ្នកសង្កេតការណ៍​អន្តរជាតិ​ចំនួន​២១៦ នាក់ ទៀត​មកពី​២៨ ស្ថាប័ន ក្នុងនោះ​មាន CENTRIST DEMOCRAT INTERNATIONAL-RUSSIA CIVIC CHAMBER ជាដើម​។

យោងតាម​ប្រការ ៣.៤.៣ នៃ​បទបញ្ជា និង​នីតិវិធី​សម្រាប់​ការបោះឆ្នោត​ជ្រើសតាំង​តំណាងរាស្ត្រ នីតិកាល​ទី​៦ គ​.​ជ​.​ប ត្រូវ​ពិនិត្យ និង​សម្រេច​លើ​ពាក្យសុំ​ចុះឈ្មោះ​អ្នកសង្កេតការណ៍​អន្តរជាតិ ក្នុង​រយៈពេល​យ៉ាងយូរ​៣​ថ្ងៃ បន្ទាប់ពី​បានទទួល​ពាក្យស្នើសុំ ត្រូវ​នឹង​ថ្ងៃទី​២៨ ខែកក្កដា ឆ្នាំ២០១៨ ។ អ្នកសង្កេតការណ៍​ជាតិ និង​អន្តរជាតិ នៃ​សមាគម អង្គការ​មិនមែន​រដ្ឋាភិបាល គឺជា​សាក្សី​នៃ​ការបោះឆ្នោត​ដោយ​សេរី ត្រឹមត្រូវ និង​យុត្តិធម៌ និង​ត្រូវ​ផ្តល់​របាយការណ៍​ជា​លាយលក្ខណ៍អក្សរ​ស្តីពី​ការសង្កេត​ការណ៍ និង​សេចក្តីសន្និដ្ឋាន​របស់ខ្លួន​នៅក្នុង​ដំណើរការ​បោះឆ្នោត ផ្ញើជូន គ​.​ជ​.​ប បន្ទាប់ពី​ដំណើរការ​បោះឆ្នោត​ចប់សព្វគ្រប់៕

 

Source: Kampuchea Thmey Daily