សម្តេច​តេ​ជោ ហ៊ុន សែន ៖ អ្វីដែល​កម្ពុជា​ចង់បាន​នោះ​គឺ​ឲ្យ​អ្នកសង្កេតការណ៍​និយាយ​ការពិត ដែល​ខ្លួន​បានឃើញ​នៅក្នុងពេល​អំឡុងពេល​បោះឆ្នោត

ភ្នំពេញ​ ៖​ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​កម្ពុជា បាន​មានប្រសាសន៍​ទៅកាន់​ក្រុម​អ្នកសង្កេតការណ៍​អន្តរជាតិ​មកពី​ប្រទេស​ផ្សេងៗ​និង​អង្គការ​អន្តរជាតិ​ចំនួន​៥ ថា អ្វីដែល​កម្ពុជា​ចង់បាន​នោះ​គឺ​និយាយ​នូវ​អ្វីដែល​ជាការ​ពិត​ដែល​ខ្លួន​បានឃើញ​នៅក្នុង​អំឡុងពេល​បោះឆ្នោត​ដើម្បី​ឆ្លុះបញ្ចាំង​នូវ​តថភាព​នៃ​ដំណើរការ​បោះឆ្នោត​នៅ​កម្ពុជា។

សម្តេច​តេ​ជោ បាន​មានប្រសាសន៍​លើកឡើង​បែបនេះ​កាលពី​ព្រឹក​ថ្ងៃទី​២៨ ខែកក្កដា ឆ្នាំ២០១៨ ក្នុង​ឱកាស​ដែល​សម្តេច បាន​អនុញ្ញាត​ឲ្យ​ក្រុម​អ្នកសង្កេតការណ៍​អន្តរជាតិ​ចំនួន​ប្រាំ​ក្រុម​ផ្សេង​២​គ្នា ចូល​ជួប​ដាច់ដោយឡែក​ពីគ្នា​ជា​បន្តបន្ទាប់ និង​បាន​ជួប​ជាមួយ​ក្រុម​សង្កេតការណ៍​អន្តរជាតិ​ប្រមាណ​២០០ នាក់​ផ្សេងទៀត​នៅ​វិមាន​សន្តិភាព​ទីស្តីការ​នាយករដ្ឋមន្ត្រី។



គណៈប្រតិភូ​ដំបូង​គេ​គឺ​គណៈប្រតិភូ​សង្កេតការណ៍​នៃ​សាធារណរដ្ឋ​ប្រជាមានិត​ចិន​ដឹកនាំ​ដោយ​លោក ឌី​ង វេន​ចាវ (Ding Wenchao) អគ្គនាយក​គណបក្ស​កុម្មុយនីស្ត​ចិន ,​លោក លី សាញ​ហ្គោ​ន​(Li Zhigong )​អគ្គនាយក​ក្រសួងការបរទេស​ចិន​,​លោក លូ កៃ​យ៉ាង (Liu Kaiyang) អគ្គលេខាធិការរង​អង្គការ CNIE និង​សមាជិក​ជាច្រើនរូប​ទៀត ។ គណៈប្រតិភូ​ឥណ្ឌូនេស៊ី គណបក្ស​ហ្គោល​ការ​និង​សមាគម​ឥស្លាម​ទាំងអស់​នៃ​ឥណ្ឌូនេស៊ី ដឹកនាំ​ដោយ​លោក​បណ្ឌិត Agung Laksono អនុប្រធាន​អង្គការ CAPDI , លោក​សាស្ត្រាចារ្យ​បណ្ឌិត Jimly Asshiddiquie SH ប្រធាន​សមាគម​មូស្លី​ឥណ្ឌូនេស៊ី , លោក​បណ្ឌិត Makarim Wibisino ប្រធាន​មហាសន្និបាត​អង្គការ CAPDI និង​សមាជិក​ជាច្រើនរូប​ទៀត​។ គណៈប្រតិភូ​អង្គការ​អ្នកប្រជាធិបតេយ្យ​និយម​កណ្តាល​អន្តរជាតិ​(CDI) ដឹកនាំ​ដោយ លោក Andres Pastrana ប្រធាន CDI និង​ជា​អតីត​ប្រធានាធិបតី​នៃ​សាធារណរដ្ឋ​កូ​ឡុំ​ប៊ី។ គណៈប្រតិភូ​អ្នកសង្កេតការណ៍​សន្និសីទ​អន្តរជាតិ​នៃ​គណបក្ស​នយោបាយ​នៅ​អាស៊ី​(ICAPP)​និង​អង្គកា​អ្នកប្រជាធិបតេយ្យ​និយម​កណ្តាល​អាស៊ី​ប៉ាស៊ីហ្វិក​អន្តរជាតិ​(CAPDI) ដឹកនាំ​ដោយ​លោក Jose de Venecia ប្រធាន ICAPP និង ជា​អតីត​ប្រធាន​សភា​សាធារណរដ្ឋ​ហ្វីលីពីន​និង​ចុងក្រោយ​គឺ​គណៈប្រតិភូ​អនុប្រធាន​គណៈកម្មាធិការ​កិច្ចការបរទេស​សភា​ឌូ​ម៉ា​រុស្ស៊ី​ដឹកនាំ​ដោយ លោក Alexey Casilievich។



ក្នុង​ជំនួប​នោះ សម្តេច​តេ​ជោ ហ៊ុន សែន បាន​ធ្វើ​ការ​ស្វាគមន៍​និង​ជម្រាប​ជូន​ប្រតិភូ​ទាំងអស់​ថា អ្វី​ដែល​ជា​ការ​ចង់បាន​របស់​កម្ពុជា​នោះ គឺ​ប្រតិភូ​ទាំងអស់​មើលឃើញ​អ្វី សង្កេតឃើញ​អ្វី​សូម​និយាយ​នោះ​តែម្តង​ដើម្បី​ឆ្លុះបញ្ចាំង​ការពិត​អំពី​ស្ថានភាព​នៃ​ការបោះឆ្នោត​របស់​កម្ពុជា​នា​ថ្ងៃ​២៩ កក្កដា នេះ។

នា​ថ្ងៃ​ព្រឹក​ថ្ងៃ​ដដែល​នេះ​ផង​ដែរ សម្តេច​តេ​ជោ ហ៊ុន សែន ក៏បាន​ទទួល​ជួប​អ្នកសង្កេតការណ៍​អន្តរជាតិ​ប្រមាណ​២០០ នាក់​ផង​ដែរ​។ ក្នុង​នោះ​មាន​តំណាង​មកពី​ប្រទេស​ចិន ឥណ្ឌូនេស៊ី ឥណ្ឌា រុស្ស៊ី និង​ប្រទេស​ផ្សេងទៀត រួមទាំង​អង្គការ​អន្តរជាតិ​ផ្សេងៗ​ទៀត​ជាច្រើន​ផងដែរ។



នៅក្នុង​ឱកាស​នោះ សម្តេច​បាន​ជម្រាប​ជូន​ប្រតិភូ​អ្នកសង្កេតការណ៍​ទាំងអស់​អំពី​ដំណើរការ​ការបោះឆ្នោត​នៅ​កម្ពុជា ដែល​ស្រប​ទៅ​តាម​រដ្ឋធម្មនុញ្ញ​កម្ពុជា​ត្រូវ​បោះឆ្នោត​៥​ឆ្នាំ​ម្តង​ជា​ទៀងទាត់ ហើយ​កំណត់​យក​ថ្ងៃអាទិត្យ​សប្តាហ៍​ទី​៤ នៃ​ខែកក្កដា។ ការកំណត់​ការបោះឆ្នោត​នៅក្នុង​រដ្ឋធម្មនុញ្ញ​កម្ពុ​ជា​គឺ​មិន​ដូច​ទៅនឹង​ការបោះឆ្នោត​នៅ​ប្រទេស​ដទៃទៀត​ទេ ដែល​អនុញ្ញាត​ឲ្យ​ប្រធានាធិបតី ឬ នាយករដ្ឋមន្ត្រី​រំលាយ​សភា​ជ្រើសរើស​ថ្ងៃ​បោះឆ្នោត​តាម​ការគ្រោងទុក​របស់​ខ្លួន​។ ជាងនេះទៅទៀត សម្តេច​តេ​ជោ​ក៏បាន​ជម្រាប​ប្រតិភូ​ទាំងមូល​ពី​ប្រវត្តិ​នៃ​ការបោះឆ្នោត​នៅ​កម្ពុជា​កាលពី​ឆ្នាំ ១៩៩៣ ,១៩៩៨, ២០០៣ ,២០០៨ និង​ឆ្នាំ​២០១៣​កន្លងមកហើយ​ការបោះឆ្នោត​នា​ឆ្នាំ ២០១៨ នេះ ដំណើរការ​យុទ្ធនាការ​បោះឆ្នោត​បាន​ប្រព្រឹត្ត​រយៈពេល ២១ ថ្ងៃ ដំណើរ​ទៅ​យ៉ាង​រលូន និង​គ្មាន​អំពើ​ហិង្សា​អ្វី​កើតឡើង​ឡើយ៕

Source: Kampuchea Thmey Daily