ភ្នំពេញ ៖ អ្នកជំនាញជំងឺបេះដូងបានឲ្យដឹងថា ជំងឺបេះដូង បានកំពុងក្លាយជាក្តីកង្វល់មួយដល់សុខភាពសាធារណៈនៅក្នុងប្រទេសកម្ពុជាដោយសារវាបានសម្លាប់មនុស្សយ៉ាងច្រើនក្នុង១ឆ្នាំៗទាំងនៅកម្ពុជានិងសាកលលោក។
លោកសាស្ត្រាចារ្យមហាបរិញ្ញាវេជ្ជបណ្ឌិតសុខជួរប្រធានសមាគមគ្រូពេទ្យបេះដូងកម្ពុជានិងជាប្រធានផ្នែកជំងឺបេះដូងមន្ទីរពេទ្យកាល់ម៉ែតធ្លាប់បានប្រសាសន៍ថា ជំងឺបេះដូងនៅស្រុកខ្មែរមានច្រើន តែយើងនៅមិនទាន់មានតួលេខណាមួយជាក់លាក់នៅឡើយទេ។
ប៉ុន្តែបើតាមរបាយការណ៍របស់អង្គការសុខភាពពិភពលោកជំងឺបេះដូងមានការកើនឡើងខ្លាំងនៅតាមបណ្តាប្រទេសកំពុងអភិវឌ្ឍន៍ពិសេសប្រទេសកំពុងតែរីកចម្រើនលឿនដូចជាប្រទេសកម្ពុជា។
លោកបានបន្តថា ចំពោះរោគសញ្ញាជំងឺបេះដូងមានច្រើនដូចជាមានចុកដើមទ្រូងមានអាការៈហត់និងញ័រដើមទ្រូងដែលមុខសញ្ញាបីនេះ កើតញឹកញាប់ជាងគេ។ ក្រៅពីនេះមានអ្នកជំងឺខ្លះមានអាការៈសន្លប់ក៏មានតែមិនញឹកញាប់។
លោកវេជ្ជបណ្ឌិតបង្ហាញថា «ក្នុងចំណោមប្រជាជន ១០ម៉ឺននាក់ មានប្រជាពលរដ្ឋកម្ពុជា ១២៨នាក់ស្លាប់ ដោយសារជំងឺ ស្ទះសរសៃបេះដូង ហើយមាន ១០១នាក់ រងគ្រោះដោយសារដាច់សរសៃខួរក្បាលដែលនេះជាតួលេខមួយគួរឲ្យព្រួយបារម្ភបំផុត »។
ក្នុងនាមជាគ្រូពេទ្យ បេះដូង លោកបានប្តេជ្ញាថានឹងខិតខំ ប្រមូលផ្តុំគ្នាអ្នកជំនាញបេះដូងដើម្បីសិក្សាស្វែងយល់រៀនសូត្រ បន្តពីគ្នាទៅវិញទៅមក ពីជំងឺបេះដូងនេះ ក្នុងគោលដៅធ្វើយ៉ាងណាឲ្យការព្យាបាលជំងឺបេះដូងនេះ កាន់តែប្រសើរឡើង។
លោកបន្ថែមទៀតថា ការកើនឡើង នូវជំងឺបេះដូងនេះ ភាគច្រើននៅប្រទេស កំពុងអភិវឌ្ឍន៍ ដូចប្រទេសកម្ពុជាជាដើម ជាប្រទេសកំពុងមានការវិវត្តន៍ពីក្រីក្រ មកធូរធារ។ ដូច្នេះការផ្លាស់ប្តូរ ខាងជីវភាពនេះ ប្រជាពលរដ្ឋមាន ការហូបចុកមិនសូវគិត ហូបចុកច្រើន សាច់ច្រើន ប្រៃច្រើនថែមទាំង មិនសូវបញ្ចេញ ពលកម្ម ធ្វើឲ្យខ្លួនធាត់ច្រើន ជាមួយនឹង ការប្រើប្រាស់ថ្នាំជក់ ការពិសាស្រាហួសកម្រិត គួបផ្សំនឹងការកើតជំងឺ ទឹកនោមផ្អែម កើនឡើង ជំងឺលើសឈាមកើនឡើង ដែលទាំងអស់នេះ ធ្វើឲ្យជំងឺបេះដូង កើនឡើង។
ដើម្បីកាត់ បន្ថយកត្តាគ្រោះថ្នាក់ពីជំងឺ ប្រភេទនេះលោកសាស្ត្រាចារ្យ បានផ្តល់ការណែនាំ ដល់ប្រជាពលរដ្ឋទូទៅ ទាមទារការបរិភោគសាប កុំឲ្យប្រៃពេក បញ្ឈប់ការប្រើប្រាស់ថ្នាំជក់ ការប្រើប្រាស់ ស្រាហួសកម្រិត ហើយបើកាលណាបរិភោគ សាបយើងកាត់បន្ថយ បាននូវគ្រោះថ្នាក់ ដោយសារ ជំងឺបេះដូង។ ជាមួយនេះត្រូវបញ្ចុះទម្ងន់ ហាត់ប្រាណឲ្យ បានទៀងទាត់ និងបរិភោគអាហារ ណាដែលមិនសូវ សំបូរជាតិខ្លាញ់។ មួយវិញទៀត បើសិនជាប្រជាពលរដ្ឋ លោកមានបញ្ហាជំងឺ បេះដូងហើយ ត្រូវតែអញ្ជើញ ទៅរកគ្រូពេទ្យជំនាញ ខាងបេះដូង ដើម្បីគ្រូពេទ្យ ធ្វើរោគវិនិច្ឆ័យ និងព្យាបាលឲ្យទាន់ពេលវេលា និងឲ្យបានត្រឹមត្រូវ។
យោងតាមរបាយការណ៍របស់អង្គការសុខភាពពិភពលោកបានបញ្ជាក់ថា នៅលើពិភពលោកក្នុង១ឆ្នាំមានមនុស្សស្លាប់ប្រមាណ១៧លាននាក់ ដោយសារជំងឺបេះដូងដែលភាគច្រើនកើតឡើងនៅប្រទេសអភិវឌ្ឍន៍។ ចំណែកអ្នកជំងឺលើសឈាមនៅលើពិភពលោកមានចំនួន១៥០០លាននាក់ស្មើនឹង១ភាគ៣នៃមនុស្សពេញវ័យនៅលើពិភពលោក៕
Source: Kampuchea Thmey Daily
0 Comments