ឆមាស​ទី​១ ឆ្នាំ​២០១៨​នេះ​ ទីភ្នាក់ងារ​ជាតិ​មុខរបរ និង​ការងារ​បាន​ជួយ​រក​ការងារ​ធ្វើ​ដល់​យុវជន​ជាង​៣​ពាន់​នាក់

ភ្នំពេញ​ ៖ នៅក្នុង​ឆមាស​ទី​១ ឆ្នាំ​២០១៨​នេះ ​ទីភ្នាក់ងារ​ជាតិ​មុខរបរ​និង​ការងារ​( NEA )​បាន​ជួយ​ស្វែងរក​ការងារ​ធ្វើ​ដល់​ប្រជាពលរដ្ឋ​ខ្មែរ​បាន​ប្រមាណ ៣២៥១​នាក់​និង ចុះឈ្មោះ​អ្នកស្វែងរក​ការងារ​ធ្វើ បាន​ប្រមាណ ៧៥៩០​នាក់​តាមរយៈ​ការរៀបចំ​វេទិកា​ការងារ​ចំនួន​៤២​ដង​។

ប្អូនស្រី តាន ជូ​លាង និស្សិត​ផ្នែក ECO Business នៃ​សាកលវិទ្យាល័យ​ជាតិ​គ្រប់គ្រង ដែល​ធ្លាប់បាន​ចូលរួម​ក្នុង​វេទិកា​ការងារ​របស់ NEA បាន​លើកឡើងថា ការរៀបចំ​វេទិកា​នេះ​ពិតជា​ល្អ​ណាស់ ព្រោះ​បាន​ជួយ​ដល់​សិស្ស​និស្សិត ឲ្យ​បាន​ជួប​ដោយផ្ទាល់​ជាមួយនឹង​ក្រុមហ៊ុន​។ ជាមួយគ្នា​នោះ ជូ លាង បាន​ចាត់​ទុក​វេទិកា​ការងារ និង​សកម្មភាព​ផ្សេងៗ​របស់ ទីភ្នាក់ងារ​ជាតិ​មុខរបរ និង​ការងារ ថា​បាន​រួម​ចំណែក ក្នុង​ការ​នាំ​យក​ឱកាស​ការងារ​ជាច្រើន ដល់​សិស្ស​និស្សិត ដែល​មាន​បំណង​ចង់​ស្វែងរក​ការងារ វេទិកា​នេះ​ពិតជា​ល្អ​ណាស់​បង ព្រោះ​បាន​ជួយ​ដល់​ខ្ញុំ ក៏ដូចជា​អ្នក​កំពុង​ស្វែងរក​ការងារ​ធ្វើ ឲ្យ​ឆាប់​ទទួលបាន​ការងារ​ធ្វើ​។

ចំណែក​លោកស្រី សំអុល ចរិយា មន្ត្រី​គ្រប់គ្រង​ធនធានមនុស្ស​ជាន់ខ្ពស់ របស់​ក្រុមហ៊ុន RMA បាន​ចាត់​ទុក​សេវា​ជួយ​ស្វែងរក​ការងារ​ធ្វើ​ដល់ ប្រជាពលរដ្ឋ​ខ្មែរ គឺ​ពិតជា​ល្អ​ណាស់ ដោយ​បាន​ចូលរួម​កាត់បន្ថយ​អត្រា​អត់​ការងារ​ធ្វើ របស់​ប្រជាពលរដ្ឋ​ខ្មែរ​។

លោក ស្រី​បាន​ថ្លែងអំណរគុណ​ចំពោះ NEA ដែល​បានផ្តល់​ភាព​ងាយស្រួល ដល់​ក្រុមហ៊ុន​ក្នុងការ​សម្រប​សម្រួល និង​ផ្តល់​ទីតាំង​ដល់​ក្រុមហ៊ុន​របស់​លោក​ស្រី ក៏ដូចជា​ក្រុមហ៊ុន​ផ្សេងៗ​ទៀត ក្នុងការ​រៀបចំ​វេទិកា​ការងារ​ផ្សេងៗ​។

ដើម្បី​បង្ក​លក្ខណៈ​កាន់តែ​ងាយស្រួល​សម្រាប់​អ្នក​ស្វែង​រក​ការងារ​ធ្វើ​នៅក្នុង​ប្រទេស​កម្ពុជា​ទីភ្នាក់ងារ​ជាតិ​មុខរបរ និង​ការងារ​បាន​សហការ​ជាមួយ​អង្គការ​អន្តរជាតិ​ធំៗ​និង​វិទ្យាស្ថាន​មួយចំនួន​ផងដែរ​។



ជាក់ស្តែង​ថ្មីៗ​នេះ​ទីភ្នាក់ងារ​ជាតិ​មុខរបរ និង​ការងារ (NEA)​បាន​សហប្រតិបត្តិការ​ជា​ផ្លូវការ​កម្មវិធី​អភិវឌ្ឍន៍​របស់​អង្គការសហប្រជាជាតិ (UNDP) លើ​ការអនុវត្ត​គម្រោង Dr. Job ដើម្បី​ផ្តល់​ដល់​យុវជន សិស្ស​-​និស្សិត និង​អ្នក​ស្វែងរក​ការងារ នូវ​ព័ត៌មាន​អំពី​ការងារ​និង​ការបង្កើន​លទ្ធភាព​ទទួល​បាន​ការងារ​កាន់តែ​ងាយស្រួល តាមរយៈ​ការផលិត​ជា​វីដេអូ​ខ្លីៗ​។

គម្រោង​នេះ​នឹង​បង្ហាញ​អំពី​ចំណុច​នានា​ដែល​យុវជន អ្នក​ស្វែងរក​ការងារ​ត្រូវការ​ត្រៀមខ្លួន​ជា​ចាំបាច់​ក្នុង​ការ​ចាប់​យក​ឱកាស​ការងារ និង​ផ្តល់​ដំណោះស្រាយ​ចំពោះ​បញ្ហា​ប្រឈម​ក្នុង​ការងារ​ដោយ​ផ្តោតលើ​៖ វិធីសាស្ត្រ​ក្នុង​ការ​រៀបចំខ្លួន​សម្រាប់​ចូលក្នុង​ទីផ្សារ​ការងារ​, ការអភិវឌ្ឍ​ជំនាញ​ទន់ ឬ​ជំនាញ​ក្នុង​ការងារ​, ឱកាស​កម្មសិក្សា​ការងា​រ និង​ព័ត៌មាន​ទីផ្សារការងារ​។

ខ្សែ​វីដេអូ​ខ្លីៗ​ទាំងនេះ​នឹងត្រូវ​ផ្សព្វផ្សាយ​តាមរយៈ​ប្រព័ន្ធ​ផ្សព្វផ្សាយ​សង្គម Facebook, YouTube និង​ប្រព័ន្ធ​ផ្សព្វផ្សាយ​របស់ NEA​។

កម្មវិធី Dr. Job នេះ​នឹង​ចូល​រួម​ចំណែក​ក្នុង​ការ​គាំទ្រ ដល់​ការ​ផ្តល់​សេវា​ផ្នែក​ណែនាំ​អំពី​ការងារ និង​ការ​ប្រឹក្សា​យោបល់​អាជីព បន្ថែម​លើ​យន្ត​ការ​ផ្តល់សេវា ​ដែល​មាន​ស្រាប់ និង​កំពុង​អនុវត្ត​ដោយ​ទីភ្នាក់ងារ​ជាតិ​មុខរបរ និង​ការងារ​។ បន្ថែម​លើ​នេះ ការផលិត និង​ផ្សព្វផ្សាយ​កម្មវិធី Dr. Job នេះ​ត្រូវបាន​ធ្វើឡើង​ស្របតាម​ចក្ខុវិស័យ​របស់​រាជរ​ដ្ឋា​ភិ​បាល​កម្ពុជា ក្នុង​ការ​ជំរុញ​ការ​បំពាក់ និង​ប្រើប្រាស់​បច្ចេកវិទ្យា​គមនាគមន៍​និង​ព័ត៌មាន (ICT) នៅ​កន្លែង​ការងារ និង​ក្នុង​ទីផ្សារការងារ​កាន់តែ​ទូលំទូលាយ សំដៅ​ស្រូបយក​បច្ចេកវិទ្យា​ទំនើប​ក្នុង​វិស័យនេះ​ស្របតាម​ការរីកចម្រើន​នៃ​យុគសម័យ​បច្ចេកវិទ្យា​អ៊ី​ន​ធើ​ណេ​ត​។

គួរ​បញ្ជាក់​ថា ទីភ្នាក់ងារ​ជាតិ​មុខរបរ និង​ការងារ​បាន និង​កំពុង​ផ្តល់​សេវា​ការងារ និង​ព័ត៌មាន​ទីផ្សារ​ការងារ​ដោយ​ផ្ទាល់​ជាមួយ​អ្នកស្វែងរក​ការងារ​ទូទៅ​តាមរយៈ​មជ្ឈមណ្ឌល​ការងារ​របស់ខ្លួន​ទាំង​១១​ដែល​ស្ថិតនៅ​៖ រាជធានី​ភ្នំពេញ​,​ខេត្តសៀមរាប​, បាត់ដំបង​, កំពត​,​ស្វាយរៀង​,​កំពង់ចាម​, តាកែវ​, កំពង់ធំ​,​ព្រៃវែង​, ព្រះសីហនុ​, និង​បន្ទាយមានជ័យ​៕

Source: Kampuchea Thmey Daily