ស​.​ប​.​ក ប្រកាស​ស្វែងរក​សិក្ខាកាម​៤០​នាក់​ចូល​សិក្សា​វគ្គ​«​មន្ត្រី​គ្រប់គ្រង​ព្រឹត្តិការណ៍​ប្រកួត​បាល់ទាត់​»

សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បានចេញ​សេចក្តីប្រកាស​លេខ​៣១៣/១៨ ស​.​ប​.​ក​/​ស​.​ជ​.​ណ នៅ​ថ្ងៃ​សុក្រ ទី​២៧​ខែកក្កដា ឆ្នាំ​២០១៨ បាន​ជូនដំណឹង​ស្តីពី​ជ្រើសរើស​សិក្ខាកាម​ចំនួន​៤០​នាក់​ដើម្បី​ចូល​សិក្សា​វគ្គ​«​មន្ត្រី​គ្រប់គ្រង​ព្រឹត្តិការណ៍​បាល់ទាត់ (FFC Event Managerment Course) នៅ​ចុងខែ​សីហា ខាងមុខ​។

លិខិតផ្លូវការ​នេះ​បាន​ជូនដំណឹង​ថា​ វគ្គ​សិក្សា​នេះ​ធ្វើឡើង​នៅ​ថ្ងៃទី​២៥-២៦ ខែសីហា ឆ្នាំ២០១៨ ដោយ​គ្រោង​ធ្វើឡើង​នៅ​ពហុ​កីឡដ្ឋាន​ជាតិ ក្នុង​រាជធានី​ភ្នំពេញ​។ សហព័ន្ធ​នឹង​ចេញថ្លៃ​ស្នាក់នៅ អាហារ និង​សោហ៊ុយ​ធ្វើដំណើរ​ដល់​សិក្ខាកាម​ដែល​ចូលរួម​ទាំងអស់​។ ចំណែក​លក្ខខណ្ឌ​នៃ​ការចូលរួម​នោះ​ គឺ​កំណត់​យក​សិក្ខាកាម​ជា​ដែល​ជា​សមាជិក​នៅ​តាម​មន្ទីរអប់រំ​យុវជន​និង​កីឡា​គ្រប់​ខេត្ត​-​រាជធានី សមាគម​/​ក្លិប​បាល់ទាត់​និង​សាធារណជន​ដែល​ពាក់ព័ន្ធ​ទាំងអស់​។

សិក្ខាកាម​ជា​បេក្ខជន​ ត្រូវ​តែ​មាន​អាយុ​ចាប់ពី​២៥​ដល់​៣៥​ឆ្នាំ ហើយ​ត្រូវ​មាន​ពេល​គ្រប់គ្រាន់​បម្រើការ​តាម​ការ​ចាត់​តាំងរបស់​សហព័ន្ធ​កីឡាបាល់ទាត់​កម្ពុជា​។ មិនតែប៉ុណ្ណោះ​សិក្ខាកាម​ក៏​ត្រូវ​ចេះ​ភាសា​អង់គ្លេស និង​ចេះ​ប្រើប្រាស់​កុំព្យូទ័រ​តាមរយៈ​កម្មវិធី​មួយចំនួន​ដូចជា Word,Excel, PowerPoint, email និង​Internet ជាដើម​។

ដើម្បី​បាន​សិទ្ធិ​ចូល​សិក្សា​វគ្គ​នេះ​បេក្ខជន​ត្រូវតែ​បំពេញ​ពាក្យសុំ​ចុះឈ្មោះ ភ្ជាប់​ជាមួយនឹង​អត្ត​សញ្ញា​ប័ណ្ណ​ប្រជាជន (​ច្បាប់​ចម្លង​ពណ៌​ធម្មជាតិ​) ព្រមទាំង​ភ្ជាប់​យក​កុំព្យូទ័រ​យួរដៃ (Laptop) ជាប់​ជាមួយ​ផង​។

សម្រាប់​អ្នក​ដែល​មាន​ចំណាប់អារម្មណ៍​សូម​ទាក់ទង​ទៅកាន់​ការិយាល័យ​នៃ​អគ្គលេខាធិការដ្ឋាន ស​.​ប​.​ក នៅ​ពហុ​កីឡដ្ឋាន​ជាតិ​ចាប់ពី​ថ្ងៃ​ជូនដំណឹង​រហូតដល់​ថ្ងៃទី​២១ ខែសីហា ឆ្នាំ​២០១៨ វេលា​ម៉ោង​១៦និង៣០​នាទី​ល្ងាច​។ សូម​ទាក់ទង​ទៅកាន់​លោក យាន ឈៀង តាម​លេខ​ទូរស័ព្ទ ០១១/០១៦ ៨២០ ៨៨២ ឬ អ៊ីម៉ែល Chheangyean@the-ffc.com៕

Source: Kampuchea Thmey Daily