បន្ទាយមានជ័យ ៖ ជនសង្ស័យម្នាក់ បានចូលទៅលេងកម្សាន្តក្នុងក្លឹបលុះពេលស្រវឹងជោកជាំ បានបង្កការរំខានដល់ភ្ញៀវផ្សេងទៀត និងបានដើរចាប់ភ្ញៀវស្រីៗក្នុងក្លឹប ធ្វើឲ្យមានការផ្អើលឆោឡោពេញក្លឹប ឃើញសភាពបែបនេះ ក្រុមសន្តិសុខបាននាំជនសង្ស័យ ចេញមកក្រៅ តែជននោះនៅជេរប្រមាថ និងវាយតប់មកលើក្រុមសន្តិសុខ បណ្តាលឲ្យរងរបួស២នាក់ ត្រូវកម្លាំងអាវុធហត្ថដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានចុះប្រតិបត្តិការបង្ក្រាបបានភ្លាមៗនៅថ្ងៃទី២៩ខែកក្កដា ឆ្នាំ២០១៨ នៅចំណុចក្លឹបកម្សាន្តថាច់ដោន ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ បានឲ្យដឹងថា ជនរងគ្រោះ ២នាក់ ១មានឈ្មោះ រុន ចាន់ណា ភេទប្រុស អាយុ៥២ឆ្នាំ រស់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ២មានឈ្មោះ គង់ ឌី ភេទ ប្រុស អាយុ ៥៣ឆ្នាំ រស់នៅភូមិសាមគី្គមានជ័យ សង្កាត់ប៉ោយប៉ែត ក្រុងប៉ោយប៉ែត ចំណែកជនសង្ស័យមាន ឈ្មោះ ឡម គឹមលាភ ភេទ ប្រុស អាយុ ៣២ឆ្នាំ ស្នាក់នៅបន្ទប់ជួល ក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត។
បន្ទាប់ពីធ្វើការឃាត់ខ្លួនហើយ ជនសង្ស័យបានកសាងសំណុំរឿងបញ្ជូនជនសង្ស័យទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី។ លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកបានសួរចម្លើយ ជនសង្ស័យបានសារភាពថា នៅថ្ងៃកើតហេតុ នោះ ខ្លួន និងមិត្តភ័ក្តិម្នាក់ទៀត បានទៅអង្គុយផឹកស៊ីនៅអូរខៃដន អស់ចំនួន៣កេះ ដល់ម៉ោងប្រហែល ៧ល្ងាច ទើបត្រឡប់មកលំនៅឋានវិញ លុះដល់ម៉ោង ១១យប់ ក៏បានបបួលមិត្តភ័ក្ត ទៅលេងក្នុងក្លឹបថាច់ដោន ហើយបានកុម្ម៉ង់ស្រាវីស្គី ១ដប ផឹករហូតដល់ម៉ោងប្រហែល២យប់ ស្រវឹងបាត់ស្មារតីចាំអ្វីពុំបាន មិនដឹងថា ខ្លួនបានប្រព្រឹត្តអំពើអ្វីខ្លះនោះទេ។ ផ្អែកលើចម្លើយសារភាពរបស់ជនសង្ស័យ យោងតាមរបាយការណ៍របស់មូលដ្ឋានកងរាជអាវុធហត្ថក្រុងប៉ោយប៉ែត ឃើញថា ជនសង្ស័យខាងលើ ពិតជាបានប្រព្រឹត្តបទល្មើស ហិង្សាដោយចេតនា យ៉ាងពិតប្រាកដ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ ទៅតុលាការ ដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments