ភ្នំពេញ ៖ បុរសម្នាក់ ត្រូវបានគេចាប់ខ្លួនប្រគល់ឲ្យសមត្ថកិច្ចមូលដ្ឋានចាត់ការតាមច្បាប់ កាលពីរសៀល ថ្ងៃទី២៤ ខែកក្កដា ឆ្នាំ២០១៨ ដោយសង្ស័យថា ជាចោរធ្លាប់ចូលមកលួចទ្រព្យគេម្តងហើយមុននេះ១ថ្ងៃតែមិនបានសម្រេចរត់គេចខ្លួន។
ប៉ូលិសបានឲ្យដឹងថា ជនសង្ស័យខាងលើ ឈ្មោះ ពេជ្រ សីហា អាយុ៣២ឆ្នាំ គ្មានមុខរបរច្បាស់លាស់ ស្នាក់នៅផ្ទះជួល ភូមិចំការដូង សង្កាត់ដង្កោ ខណ្ឌដង្កោ រាជធានីភ្នំពេញ។
លោកកួយ រដ្ឋា អាយុ៣០ឆ្នាំ មុខរបរកម្មករសំណង់ស្នាក់នៅក្នុងការដ្ឋានសំណង់ក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ បានរៀបរាប់ថា នៅមុនពេលកើតហេតុ កាលពីថ្ងៃទី ២៣ ខែកក្កដា ឆ្នាំ២០១៨ នេះ គាត់បានទុកធុងបាសប្រភេទវ៉ាលី សម្រាប់ចាក់បទចម្រៀងស្តាប់ នៅក្នុងការដ្ឋានសំណង់ ហើយចេញមកធ្វើការ។
នៅខណៈនោះ ជនសង្ស័យខាងលើបានចូលមកលួចយកធុងបាសនេះចេញទៅហើយនៅគ្រានោះដែរ មានកម្មករសំណង់ដូចគ្នាបានឃើញជនសង្ស័យខាងលើកាន់យកធុងបាសនេះដើរចេញក៏ហៅសួរនាំ តែជនសង្ស័យបានទម្លាក់ធុងបាសនេះចោលរួចរត់ផ្លោះឡើងលើរបងគេចខ្លួនបាត់តែម្តង។
ជនរងគ្រោះបានបន្តថា លុះស្អែកឡើងជនសង្ស័យរូបនេះបានលបចូលមកប៉ងលួចម្តងទៀត ដោយមកឈរអែបក្បែរឡាន ហើយកម្មករដដែលនោះបានឃើញស្គាល់មុខក៏បានមកប្រាប់ជនរងគ្រោះ ទើបជនរងគ្រោះចាប់ឃាត់ខ្លួនប្រគល់មកឲ្យប៉ូលិសមូលដ្ឋានចាត់ការតាមច្បាប់តែម្តង។
ចំណែកជនជាប់ចោទបានប្រកែកដោះសារថាខ្លួនមិនបានលួចយកធុងបាសនោះទេ ប៉ុន្តែដោយសារមានសាក្សីដែលបានឃើញផ្ទាល់ភ្នែកមកអះអាងនិងចង្អុលមុខទើបព្រមសារភាព។
ប៉ូលិសបាននិយាយថា ជនសង្ស័យរូបនេះមានទោសដល់ទៅ២ករណីឯណោះទី១មានទោសប៉ងលួចទ្រព្យសម្បត្តិគេ ទី២មានទោសពីបទប្រើប្រាស់ថ្នាំញៀនខុសច្បាប់ ដោយពិនិត្យទឹកនោមរបស់គាត់មានផ្ទុកសារធាតុញៀនផង៕
Source: Kampuchea Thmey Daily
0 Comments