ភ្នំពេញ ៖ តារាសម្តែងស្រីកញ្ញា កុល ដាវី និងតារាប្រុសលោក សុខ រក្សា កន្លងមក ត្រូវបានមហាជនដឹងគ្រប់គ្នាហើយថា អ្នកទាំងពីរ បានសាងសម្ព័ន្ធភាពស្នេហាផ្អែមល្ហែមជាមួយគ្នាប្រៀបបានទៅនឹងប្តីប្រពន្ធ ដែលរៀបការស្របច្បាប់ទៅហើយ។ មិនតែប៉ុណ្ណោះ ពួកគេទាំងពីរ ក៏តែងប្រកាសជាសាធារណៈអំពីការសាងសម្ព័ន្ធភាពស្នេហា ដែលមានរយៈពេលយូរឆ្នាំមកហើយផងដែរ។
គេចាំបានថា ចំពោះការផ្តើមស្នេហារបស់កញ្ញា កុល ដាវី និងលោក សុខ រក្សា គឺបានកើតឡើងអំឡុងពេលដែលពួកគេចេញទៅច្រៀង និងសម្តែងនៅឯក្រៅប្រទេសកាលពីប៉ុន្មានឆ្នាំកន្លងមកនេះ។ ម្យ៉ាងទៀតចាប់តាំងពីពេលនោះមកអ្នកទាំងពីរក៏ចេញមុខប្រកាសដោយបើកចំហដោយគ្មានការលាក់បាំងពីក្រសែភ្នែកមហាជនឡើយ។
ដោយឡែកចាប់អារម្មណ៍មករឿងរ៉ាវដែលធ្វើឲ្យតារាស្រីកញ្ញាកុល ដាវី ភ័យស្លន់ស្លោរហូតរត់ចោលការងារថតសម្តែង ព្រោះតែលោក សុខ រក្សា ត្រូវបញ្ជូនចូលសង្គ្រោះបន្ទាន់នៅមន្ទីរពេទ្យឯណោះវិញឃើញថាកំពុងមានការចាប់អារម្មណ៍ និងលើកសរសើរពីសំណាក់មហាជនរួមទាំងមិត្តភក្តិរួមអាជីពសិល្បៈចំពោះស្នេហារបស់ពួកគេផងដែរ។
កញ្ញា កុល ដាវី បានពោលថា បេះដូងស្ទើរតែបែកធ្លាយហើយពេញមួយថ្ងៃនេះ អរគុណក្រុមការងារទាំងអស់គ្នាដែលយល់ចិត្តខ្ញុំ។ អរគុណណាស់បងប្អូនល្អទាំងអស់ដែលបានមកសួរសុខទុក្ខដោយផ្ទាល់ និង អរគុណដល់បងប្អូននៅក្នុងប្រទេសនិងក្រៅប្រទេសដែលសួរសុខទុក្ខអារម្មណ៍ពីបងរក្សាតាមរយៈFacebook ឆាប់ជាវិញណាបងសំឡាញ់បងឈឺអញ្ចឹងអត់សប្បាយទេ។
ទោះបីជាយ៉ាងណាក្តីគិតមកទល់ពេលនេះ គេពុំទាន់ដឹងទេថា រវាងកញ្ញាកុល ដាវី និងលោក សុខ រក្សា អាច នឹងមានគម្រោងចូលរោងការជាមួយគ្នានៅពេលណានៅឡើយទេ។ ខណៈកន្លងមកពួកគេតែងលើកឡើងថា មិនទាន់ដល់ពេលដែលត្រូវគិតលើបញ្ហានេះនៅឡើយពោលគឺការពង្រឹងការងាររកស៊ីនិងអាជីពសិល្បៈឲ្យបានជោគជ័យជាងនេះទៀតសិនទើបសម្រេចចិត្តជ្រើសយកអាពាហ៍ពិពាហ៍តែម្តង៕
Source: Kampuchea Thmey Daily
0 Comments