កម្លាំងកងរាជអាវុធហត្ថខេត្តកំពង់ស្ពឺជាង១៥០នាក់ ចេញប្រតិបត្តិការជួយសង្គ្រោះប្រជាពលរដ្ឋដែលរងគ្រោះដោយសារជំនន់ទឹកភ្លៀង

កំពង់ស្ពឺ ៖ លោកឧត្តមសេនីយ៍ត្រី ជួ សារុន មេបញ្ជាការកងរាជអាវុធហត្ថខេត្តកំពង់ស្ពឺ នៅព្រឹកថ្ងៃទី១៩ ខែកក្កដា ឆ្នាំ២០១៨នេះ បានចេញប្រតិបត្តិការចុះជួយប្រជាពលរដ្ឋ ដែលរងគ្រោះដោយសារជំនន់ទឹកភ្លៀង ក្នុងស្រុកភ្នំស្រួច និងបានចែកទឹកស្អាតដល់ជនរងគ្រោះដើម្បីបរិភោគដើម្បីជៀសវែងប្រើទឹកមិនស្អាតនាំឲ្យមានជំងឺផងដែរ។

លោកឧត្តមសេនីយ៍ត្រី ជួ សារុន មេបញ្ជាការកងរាជអាវុធហត្ថខេត្តកំពង់ស្ពឺ បានប្រាប់ឲ្យដឹងថា កម្លាំងកងរាជអាវុធហត្ថខេត្តជាង ១៥០នាក់ បំពាក់ដោយសម្ភារៈជួយសង្គ្រោះគ្រប់គ្រាន់បានចុះអន្តរាគមណ៍ជួយសង្គ្រោះប្រជាពលរដ្ឋ ដែលកំពុងរងគ្រោះដោយសារជំនន់ទឹកភ្លៀងដងស្ទឹងព្រែកត្នោត ក្នុងស្រុកភ្នំស្រួច និងស្រុកសំរោងទង ខេត្តកំពង់ស្ពឺ តាមស្ថានភាពជាក់ស្តែង និងតម្រូវការចាំបាច់របស់អាជ្ញាធរ។

លោកបន្តទៀតថា ក្នុងរថយន្តរបស់បញ្ជាការដ្ឋានកងរាជអាវុធហត្ថបានដឹកជញ្ជូនគ្រឿងឧបភោគបរិភោគ និងគ្រឿងបរិក្ខារសម្រាប់សង្គ្រោះបឋម ទឹកស្អាតយកទៅដល់ទីកន្លែងកន្លែងដែលប្រជាពលរដ្ឋបានជម្លៀសខ្លួនចេញពីការគមរាមហែងដោយសារទឹកជំនន់មកទីទួលមានសុវត្ថិភាព។

លោកឧត្តមសេនីយ៍ត្រី ជួ សារុន មេបញ្ជាការកងរាជអាវុធហត្ថខេត្តកំពង់ស្ពឺ បានបញ្ជាក់ថា កម្លាំងអាវុធហត្ថខេត្តបានត្រៀមលក្ខណៈសម្បត្តិគ្រប់គ្រាន់ក្នុងការជួយសង្គ្រោះប្រជាពលរដ្ឋដែលជួបគ្រោះមហន្តរាយដោយគ្រោះធម្មជាតិជំនន់ទឹកភ្លៀងនេះ រហូតដល់ពេលនេះមិនទាន់មានប្រជាពលរដ្ឋណាម្នាក់រងគ្រោះថ្នាក់ដល់អាយុជីវិតឡើយ។

យោងតាមរបាយការណ៍បណ្ដោះអាសន្នរបស់អាជ្ញាធរស្រុកភ្នំស្រួច បានឲ្យដឹងថា បន្ទាប់ពីមានភ្លៀងធ្លាក់ជាបន្តបន្ទាប់ជាច្រើនថ្ងៃកន្លងមកនេះ នៅផ្នែកតំបន់ខាងលើបង្កឱ្យកើតមានជាជំនន់ទឹកភ្លៀងបង្កឱ្យប៉ះពាល់ផ្ទៃដីបង្កបង្កើនផល លំនៅឋាន និងទ្រព្យសម្បត្តិរបស់ប្រជាពលរដ្ឋ ចំនួន៨ឃុំ សរុបផលប៉ះពាល់មានប្រជាពលរដ្ឋរងគ្រោះមានចំនួន ២៣០ គ្រួសារ មានមនុស្ស ៦៨៩នាក់ ស្រី ៣១៦ នាក់ ប៉ះពាល់ដំណាំស្រូវ ចំនួន ១១៥៧ ហិកតា ប៉ះពាល់ចំការស្វាយចំនួន ២៣២ ហិកតា បាត់គោចំនួន ០៧ក្បាល ខូចខាតផ្លូវកៅស៊ូប្រភេទ DBST ចំនួន ៣៥០ម៉ែត្រ ខូចខាតផ្លូវលំក្រាលគ្រួសក្រហមមានប្រវែង ៣.៧២០ម៉ែត្រ បាក់ទំនប់ ចំនួន ២កន្លែង ប្រវែង ១៥ម៉ែត្រ។
សូមបញ្ជាក់ជូនថា ប្រជាពលរដ្ឋដែលរងផលប៉ះពាល់ត្រូវបានជម្លៀសទីកាន់ទីទួលសុវត្ថិភាព ហើយគិតត្រឹមថ្ងៃទី១៩ ខែកក្កដា ឆ្នាំ២០១៨នេះ នៅទូទាំងស្រុកភ្នំស្រួច ពុំមានប្រជាពលរដ្ឋណាម្នាក់រងគ្រោះដល់អាយុជីវិតឡើយ។

លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយមខេត្តកំពង់ស្ពឺ បានប្រាប់ឲ្យដឹង នៅព្រឹកថ្ងៃទី១៩ ខែកក្កដា ឆ្នាំ២០១៨នេះថា បន្ទាប់ពីស្ថានភាពកំពស់ទឹកបានហក់ឡើងខ្ពស់យ៉ាងឆាប់រហ័ស មន្ត្រីជំនាញដែលប្រចាំទ្វាទឹករលាំងជ្រៃ បានបើកទ្វាទឹកទាំង ៥បង្កឲ្យទឹកស្ទឹងព្រែកត្នោតឡើងខ្លាំង ប៉ុន្តែមិនបង្កឲ្យមានផលប៉ះពាល់អ្វីធ្ងន់ធ្ងរនោះទេ។ លោកបន្តទៀតថា ខណៈពេលនេះទឹកមានការថមថយមកធម្មតាវិញ ប្រសិនគ្មានភ្លៀងធ្លាក់នៅតំបន់ខាងលើច្រើនទៀតទេ អាចនឹងស្រកឆាប់បំផុត។

សូមបញ្ជាក់ថា ជំនន់ទឹកភ្លៀងស្ទឹងព្រែកត្នោត បានធ្វើឲ្យប៉ះពាល់ដល់ស្រុកចំនួន ២របស់ខេត្តកំពង់ស្ពឺ មានស្រុកភ្នំស្រួច និងស្រុកសំរោងទង បន្ទាប់ពីទឹកបានហូរធ្លាក់មកពីតំបន់ខាងលើ ហើយអាជ្ញាធរខេត្តកំពង់ស្ពឺ និងសមត្ថកិច្ចពាក់ព័ន្ធបានចុះជួយអន្តរាគមន៍ជួយសង្គ្រោះប្រជាពលរដ្ឋចេញពីតំបន់មានទឹកលិចមកកាន់ទីទួលមានសុវត្ថិភាពទាន់ពេលវេលាផងដែរ៕