ភ្នំពេញ ៖ កម្លាំងនគរបាលប៉ុស្តិ៍ចោមចៅ១ បន្ទាប់ពីជនរងគ្រោះមកប្ដឹងថា មានករណីវាយប្លន់យកម៉ូតូបានចុះទៅអន្តរាគមន៍ភ្លាមៗ និង ឈានដល់ឃាត់ជនសង្ស័យ៥នាក់ យកមកសួរនាំតែក្រុមជនសង្ស័យថា ពួកខ្លួនបានដេញវាយពិតមែនតែមិនបានយកម៉ូតូជនរងគ្រោះមិនដឹងអ្នកណាយកឡើយ ដែលករណីនេះបានកើតឡើងកាលពីវេលាម៉ោង៩និង៣០នាទីយប់ ថ្ងៃទី២៤ ខែកក្កដា ឆ្នាំ២០១៨ នៅតាមបណ្ដោយផ្លូវវេងស្រេង ទល់មុខក្លិបស្ប៉ាយឌ័រ ក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។
ជនរងគ្រោះឈ្មោះហ៊ុយ មករា ភេទប្រុស អាយុ១៨ឆ្នាំ មុខរបរសិស្សស្នាក់នៅ ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើតនៅភូមិបឹង ស្រុកកណ្តាលស្ទឹង ខេត្តកណ្ដាល។ ម៉ូតូជនរងគ្រោះដែលជនសង្ស័យ វាយប្លន់យកបាត់នោះម៉ាកហុងដាឌ្រីមសេ១២៥ស៊េរី ឆ្នាំ២០១៧ ពណ៌ខ្មៅ ពាក់ស្លាកលេខភ្នំពេញ1GC-2337។ ម៉ូតូជនសង្ស័យ២គ្រឿងម៉ាកហុងដាឌ្រីមសេ១១០(សង់ប៊ិច)ពណ៌ខ្មៅទី១ពាក់ស្លាកលេខភ្នំពេញ1BM-7108 នឹងម៉ូតូមួយគ្រឿងទៀតម៉ាកហុងដាឌ្រីមសេ១១០(សង់ប៊ិច)ពណ៌ខៀវ ពាក់ស្លាកលេខ ភ្នំពេញ 1BH-4814។
ជនសង្ស័យទី១ឈ្មោះ នុត សិត ហៅអាវែង ជាបងធំអាយុ២១ឆ្នាំ មុខរបរកម្មករសំណង់ស្នាក់នៅភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើតនៅភូមិព្រៃធំ ឃុំព្រៃធំ ស្រុកកំពង់រោ ខេត្តស្វាយរៀង ទី២ឈ្មោះ សៀម វណ្ណរី ហៅអាឈុន ភេទប្រុស អាយុ១៧ឆ្នាំ មុខរបរជាងពិដាននៅសង្កាត់អូបែកក្អម ខណ្ឌសែនសុខ មានស្រុកកំណើតនៅភូមិគៀនតាសៀវ ឃុំស្វាយយា ស្រុកស្វាយជ្រុំ ខេត្តស្វាយរៀង ទី៣ឈ្មោះ សៀម វណ្ណរ៉ា ហៅឆាង ភេទប្រុស អាយុ២២ឆ្នាំ មុខរបរមិនពិតប្រាកដស្នាក់នៅភូមិត្រពាំងឈូក សង្កាត់អូបែកក្អម ខណ្ឌសែនសុខ មានស្រុកកំណើតនៅភូមិគៀនតាសៀវ ឃុំស្វាយយា ស្រុកស្វាយជ្រុំ ខេត្តស្វាយរៀង ទី៤ ឈ្មោះ ម៉ៅ ថែល ភេទប្រុស អាយុ២៥ឆ្នាំ មុខរបរនៅផ្ទះ ទើបមកលេងមិត្តភ័ក្តិខាងលើមានស្រុកកំណើតនៅភូមិ ចំការគួយឃុំដំរីពួន ស្រុកស្វាយអន្ទរ ខេត្តព្រៃវែង និង ទី៥ឈ្មោះ លៀប អ៊ីសា ភេទប្រុស អាយុ២២ឆ្នាំ ស្នាក់នៅ ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើតនៅភូមិព្រៃលាន ឃុំរំលិច ស្រុកស៊ីធកណ្តាល ខេត្តព្រៃវែង។
តាមប្រភពព័ត៌មានពីជនរងគ្រោះ បានឲ្យដឹងថា នៅមុនពេលកើតហេតុរូបគាត់និងមិត្តភ័ក្ដិ២នាក់ទៀត បានជិះម៉ូតូ២គ្រឿង ម៉ាកហុងដាឌ្រីម សេ១២៥ ស៊េរី២០១៧ ទាំង២គ្រឿង ដោយម៉ូតូ រូបគាត់ជិះគ្នា២នាក់ និងម៉ូតូមួយគ្រឿងទៀតជិះ ម្នាក់ឯងចេញពី សង្កាត់ព្រៃស ខណ្ឌដង្កោ ដើម្បីទៅផ្ទះរបស់ខ្លួននៅភូមិត្រពាំងថ្លឹង ខណៈដែលពួកគាត់ធ្វើដំណើរតាមផ្លូវផ្សារទួលពង្រហួសផ្សារ បន្តិច ស្រាប់តែមានជនសង្ស័យមានគ្នា៥នាក់ជិះម៉ូតូ២គ្រឿង បានដេញវាយ ដោយយកខ្សែក្រវាត់ និង ដុំថ្ម គប់ទៅលើក មិត្តភ័ក្ដិរបស់គាត់ត្រូវមួយដុំថ្ម ហើយពួកគាត់មានការភិតភ័យជិះម៉ូតូរត់ មកផ្ទះជួលរបស់ខ្លួន។
ប្រភពបន្ដថា លុះរត់មកដល់មុខក្លិប ស្ប៉ាយឌ័រ ដែលជាចំណុចផ្ទះរបស់ខ្លួនបានឈប់រត់ហៅឲ្យគេជួយតែត្រូវក្រុមជនសង្ស័យ វាយទៅលើ មិត្តភក្ដិរបស់គាត់ បណ្តាលបែកក្បាលរងរបួសស្រាល ហើយបន្ទាប់មកស្រាប់តែមានជនសង្ស័យ យកម៉ូតូរបស់គាត់បាត់ដោយជិះគេចខ្លួនបាត់អស់។
ភ្លាមៗនោះរូបគាត់និងមិត្តភ័ក្ដិ២នាក់ទៀត បាននាំគ្នាទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅ១ ដើម្បីឲ្យសមត្ថកិច្ចស៊ើបអង្កេតរកមុខសញ្ញាមកផ្តន្ទាទោសតាមច្បាប់។ ពេលនោះកម្លាំងនគរបាលប៉ុស្តិ៍ចោមចៅ១ និងកម្លាំងអន្តរាគមន៍ខណ្ឌពោធិ៍សែនជ័យ រួមនឹងកម្លាំងនគរបាលប៉ុស្តិ៍ផ្សេងៗ បានចេញគ្រប់ច្រកល្ហកដើម្បីតាមប្រមាញ់មុខសញ្ញា ស្រាប់តែកម្លាំងនគរបាលប៉ុស្តិ៍ចោមចៅ១ បានឃើញជនសង្ស័យខាងលើ នៅម្តុំកន្លែងកើតហេតុហើយបានឃាត់យកមកសួរនាំភ្លាមៗផងដែរ។
បើតាមនាយប៉ុស្តិ៍ចោមចៅ១បានឲ្យដឹងថា ខណៈដែលឃាត់ជនសង្ស័យខាងលើភ្លាមៗនោះ គាត់បានហៅ ជនរងគ្រោះមកចង្អុលបង្ហាញហើយពិតជាជនសង្ស័យខាងលើនឹងមែន។ ចំណែកក្រុមជនសង្ស័យបានសារភាពថា ពួកគាត់បានដេញវាយទៅលើជនរងគ្រោះមែនតែពួកគាត់មិនបាន យកម៉ូតរបស់ជនរងគ្រោះទេ។ ទោះជាយ៉ាងណាក៏ដោយកម្លាំងនគរបាលប៉ុស្តិ៍ចោមចៅ១ បន្ទាប់ពីសាកសួររួចបានកសាងសំណុំរឿងបញ្ជូនទៅជំនាញផ្នែកព្រហ្មទណ្ឌដើម្បីចាត់ការបន្តតាមនីតិវិធី៕
Source: Kampuchea Thmey Daily
0 Comments