ភ្នំពេញ ៖ កម្លាំងប៉ុស្តិ៍នគរបាលជ័យជំនះ នៃអធិការដ្ឋាននគរបាលខណ្ឌដូនពេញ បានឃាត់ខ្លួនជនសង្ស័យម្នាក់ បន្ទាប់ពីធ្វើសកម្មភាពលួចទូរស័ព្ទដៃ១មួយគ្រឿងនិងកុំព្យូទ័រ Laptop ចំនួន២គ្រឿងបានសម្រេចប្រុងរត់គេចខ្លួន ក៏ត្រូវជនរងគ្រោះឃើញទាន់ក៏ចាប់ក្របួចប្រគល់ឲ្យសមត្ថកិច្ចតែម្តង។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង៧និង២០នាទីព្រឹក ថ្ងៃចន្ទ ៤កើត ខែទុតិយាសាឍ ឆ្នាំច សំរឹទ្ធស័ក ព.ស២៥៦២ ត្រូវនឹង ថ្ងៃទី១៦ ខែកក្កដា ឆ្នាំ២០១៨ នៅចំណុចហាងយីហោ ប៉ាណូរ៉ាម៉ា មេគង្គ ទីតាំងផ្ទះលេខ ៣៥៧ផ្លូវព្រះស៊ីសុវត្ថិ ភូមិ១ សង្កាត់ជ័យជំនះ ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យមានឈ្មោះ មឿន ប៉ី ភេទប្រុស អាយុ១៨ឆ្នាំ មុខរបរ និងទីលំនៅមិនប្រាកដ។ វត្ថុតាងចាប់យកមានទូរស័ព្ទដៃ១គ្រឿង ម៉ាកអាយហ្វូន៥ និងកុំព្យូទ័រម៉ាកApple ចំនួន២គ្រឿង (ជារបស់ជនរងគ្រោះ ត្រូវបានប្រគល់ជូនជនរងគ្រោះវិញ)។ ចំណែកជនរងគ្រោះឈ្មោះ ឡេង សុផាត ភេទប្រុស អាយុ២១ឆ្នាំ មុខរបរបុគ្គលិកហាង ស្នាក់នៅផ្ទះលេខ២០៧ ផ្លូវលេខ៣១២ សង្កាត់ទន្លេបាសាក់ ខណ្ឌចំការមន រាជធានី ភ្នំពេញ។
ជនរងគ្រោះបានបំភ្លឺប្រាប់សមត្ថកិច្ចថា កាលពីវេលាម៉ោង ៥និង៤០នាទីភ្លឺថ្ងៃទី១៦ ខែកក្កដា ឆ្នាំ២០១៨ ជនសង្ស័យបានចូលក្នុងហាងយីហោប៉ាណូរ៉ាម៉ា មេគង្គ ទីតាំងផ្ទះលេខ ៣៥៧ ផ្លូវព្រះស៊ីសុវត្ថិ ភូមិ១ សង្កាត់ជ័យជំនះ ខណ្ឌដូនពេញ ហើយបានធ្វើសកម្មភាពលួចទូរស័ព្ទដៃម៉ាកអាយហ្វូនមួយគ្រឿង និងកុំព្យូទ័រ Laptopចំនួន២គ្រឿងបានសម្រេច ប្រុងរត់គេចខ្លួន ក៏ត្រូវជនរងគ្រោះចាប់ក្របួចជាប់ រួចរាយការណ៍ប្រាប់សមត្ថកិច្ចមកទទួលយកទៅសាកសួរតាមនីតិវិធី។
បច្ចុប្បន្ន កម្លាំងជំនាញកំពុងធ្វើការឃាត់ខ្លួនជនសង្ស័យ នៅអធិការដ្ឋាននគរបាលខណ្ឌដូនពេញ ដើម្បីចាត់ការតាមច្បាប់។ សមត្ថកិច្ចបញ្ជាក់ដោយយោងតាមការធ្វើតេស្តទឹកនោមនោះបញ្ជាក់ថា ជនសង្ស័យធ្លាប់បានប្រើប្រាស់គ្រឿងញៀន៕
Source: Kampuchea Thmey Daily
0 Comments