ភ្នំពេញ ៖ ក្រសួងធនធានទឹក និងឧតុនិយម បានជូនដំណឹង ពីស្ថានភាពនិង ឥទ្ធិពល ព្យុះទី៩ ឈ្មោះ សុនទីញ ( SON-TINH ) បាន និងកំពុងស្ថិតនៅភាគខាងកើតកោះហៃណាំ។ ព្យុះនេះ នឹងធ្វើដំណើរកាត់កោះហៃណាំ រួចទៅដល់ឆ្នេរតុងកឹង ( ប្រទេសវៀតណាម ) នៅយប់ថ្ងៃទី១៩ ខែកក្កដា ឆ្នាំ២០១៨ ដែលបណ្តាលឲ្យ ប្រទេសកម្ពុជាមានភ្លៀងធ្លាក់រាយប៉ាយ ពិសេសតំបន់មាត់សមុទ្រ។
យោងតាម សេចក្តីជូនដំណឹងរបស់ ក្រសួង ធនធានទឹក និងឧតុនិយម បានប្រកាសនៅរសៀលថ្ងៃទី១៨ ខែកក្កដា ឆ្នាំ២០១៨ ថា បន្ទាប់ពី ធ្វើការអង្កេតនិងតាមដាន លើអាកាសធាតុ និងបាតុភូតធម្មជាតិ ឃើញថា នៅព្រឹកថ្ងៃទី១៨ ខែកក្កដានេះ ព្យុះទី៩ ឈ្មោះ សុនទីញ ( SON-TINH ) បាន និងកំពុងស្ថិតនៅភាគខាងកើតកោះហៃណាំ។ ព្យុះនេះ នឹងធ្វើដំណើរកាត់កោះហៃណាំ រួចទៅដល់ឆ្នេរតុងកឹង ( ប្រទេសវៀតណាម ) នៅយប់ថ្ងៃទី១៩ ខែកក្កដា ឆ្នាំ២០១៨។
ក្រសួងធនធានទឹក និងឧតុនិយម បានប្រកាសបន្ត ថា យោងតាមការព្យាករ ឥទ្ធិពលរបស់ព្យុះនេះ នឹងធ្វើឲ្យអាកាសធាតុនៅកម្ពុជា មានស្ថានភាព ដូចខាងក្រោម ធ្វើឲ្យមូសុងនិរតីខ្លាំង បង្កើនឥទ្ធិពលមកលើព្រះរាជាណាចក្រកម្ពុជា និងបង្កឲ្យផ្ទៃមេឃមានសភាពអាប់អួ មានពពកច្រើន និងមានភ្លៀងធ្លាក់រាយប៉ាយក្នុងក្របខណ្ឌទូទាំងប្រទេស ពិសេសចាប់ពីថ្ងៃទី១៩ ដល់ថ្ងៃទី២១ ខែកក្កដា ឆ្នាំ២០១៨ នឹងមានភ្លៀងធ្លាក់ខ្លាំងនៅតំបន់មាត់សមុទ្រ តំបន់ខ្ពង់រាប តំបន់ជួរភ្នំ និងបណ្តាខេត្ត ដែលស្ថិតនៅតាមបណ្តោយព្រំដែនកម្ពុជា-វៀតណាម។
ក្រសួងធនធានទឹក និងឧតុនិយម ក៏បានប្រកាសថា នៅលើផ្ទៃសមុទ្រ មានភ្លៀងធ្លាក់ជោកជាំ លាយឡំនឹងខ្យល់បក់បោកខ្លាំង និងមានរលកខ្ពស់ៗ។ ជាមួយគ្នានេះដែរ ក្រសួងធនធានទឹក និងឧតុនិយម បានប្រកាសអំពាវនាវដល់បងប្អូនប្រជានេសាទ អ្នកធ្វើដំណើរតាមសមុទ្រ និងប្រជាពលរដ្ឋ ដែលរស់នៅតាមតំបន់ទំនាបជាប់ផ្លូវទឹកនានា បង្កើនការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។
សូមរម្លឹកថា កាលពីថ្ងៃទី១៧ ខែកក្កដា ឆ្នាំ២០១៨ ក្រសួងធនធានទឹក និងឧតុនិយម បានប្រកាសថា ចាប់ពីថ្ងៃទី១៨ ដល់ថ្ងៃទី២៤ ខែកក្កដា ឆ្នាំ២០១៨ នឹងបន្តមានភ្លៀងធ្លាក់រាយប៉ាយទូទាំងប្រទេស ពិសេសនៅខេត្តជាប់ឆ្នេរសមុទ្រ ខេត្តព្រះសីហនុ និងខេត្តកោះកុង នឹងមានភ្លៀងធ្លាក់ច្រើនជាងគេ៕
Source: Kampuchea Thmey Daily
0 Comments