ភ្នំពេញ ៖ អគ្គនាយកដ្ឋានពន្ធដារ បានដាក់ពាក្យប្ដឹងចោទប្រកាន់លោក ធន សារ៉ាយ ប្រធានសមាគមអាដហុក (ADHOC) និងលោកស្រី ឆាយ សុវណ្ណ ទៅអង្គភាពប្រឆាំងអំពើពុករលួយ(ACU) ដែលបានគេចវេសមិនព្រមបង់ពន្ធថ្លៃឈ្នួលផ្ទះជូនរដ្ឋកាលពីឆ្នាំ២០១៥ និងឆ្នាំ២០១៦ នេះបើយោងយោងតាមលិខិតរបស់ ACU។
លិខិតរបស់អង្គភាពប្រឆាំងអំពើពុករលួយ ដែលការិយាល័យយើងទើបទទួលបាន នៅថ្ងៃទី០១ ខែសីហា បានឲ្យដឹងថា អង្គភាពបានទទួលពាក្យ បណ្តឹងកាលពីថ្ងៃ១៩ ខែមិថុនា ឆ្នាំ២០១៨ ដោយចោទប្រកាន់លោកស្រី ឆាយ សុវណ្ណ និងលោក ធន សារាយ គេសវេសមិនព្រមទៅបង់ពន្ធកាត់ទុកជូនរដ្ឋ លើថ្លៃឈ្នួលផ្ទះរបស់ខ្លួន ដែលបានជួលឲ្យសមាគម អាដហុក កាលពីឆ្នាំ២០០៥-២០០៦។
ACU បញ្ជាក់ថា តាមការប្រមូលព័ត៌មាន នៃការគ្រប់គ្រងអចលនទ្រព្យ និងការបំពេញកាតព្វកិច្ចសារពើពន្ធលើឈ្នួលផ្ទះ និងដីស្ថិតនៅក្នុងភូមិសាស្ត្រ នៃការគ្រប់គ្រងប្រមូលពន្ធ របស់សាលាពន្ធដារខណ្ឌដូនពេញ បានបង្ហាញថា អាសយដ្ឋានផ្ទះលេខ៣ ផ្លូវលេខ១៥៨ សង្កាត់បឹងរាំង ខណ្ឌដូនពេញ បានចុះបញ្ជីពន្ធដារនៅថ្ងៃទី២៤ ខែវិច្ឆិកា ឆ្នាំ២០១១ បានជួលទៅឲ្យសមាគមអាដហុក តំណាងដោយ លោក គា អ៊ិន ចុះនៅថ្ងៃ១ ខែមករា ឆ្នាំ២០១៦ ក្នុងមួយខែតម្លៃឈ្នួល ៩.២០០.០០០រៀល។
ផ្អែកតាមប្រព័ន្ធគ្រប់គ្រង ទិន្នន័យរបស់អគ្គនាយកដ្ឋាន ពន្ធដារបានចាប់ផ្តើមដាក់ដំណើរការ ពីខែមករា ឆ្នាំ២០១៦ មកបង្ហាញថា ម្ចាស់ផ្ទះជាកម្មសិទ្ធិករខាងលើ ក៏បានបំពេញកាតព្វកិច្ចសារពើពន្ធ ដោយបានបង់ប្រាក់ពន្ធ កាត់ទុកលើឈ្នួលផ្ទះ និងដីចំនួន១០ភាគរយ ៩២០.០០០រៀល ស្មើនឹង២៣០ដុល្លារ ក្នុងមួយខែសម្រាប់ឆ្នាំ២០១៦ បានត្រឹមត្រូវ ។ ចំពោះទិន្នន័យក្នុងឆ្នាំ២០១៥វិញ អគ្គនាយកដ្ឋានពន្ធដារមិនមានទេ ព្រោះមិនទាន់បានដាក់ ឲ្យប្រើប្រាស់ប្រព័ន្ធSingle Invoices នៅឡើយ។
ទាក់ទងបញ្ហានេះ ការិយាល័យរបស់យើងនៅមិនទាន់អាចស្វែងរកការបញ្ជាក់ពីលោក ធន សារ៉ាយ ប្រធានសមាគមអាដហុក (ADHOC) និងលោកស្រី ឆាយ សុវណ្ណ បាននៅឡើយទេ រហូតដល់រសៀលថ្ងៃទី០១ ខែសីហា ឆ្នាំ២០១៨៕
Source: Kampuchea Thmey Daily
0 Comments