ភ្នំពេញ ៖ សមាគមចំនួន៦ ដែលមានមូលដ្ឋានប្រទេសអូស្ត្រាលី និងណូវ៉ែលហ្សេឡង់ ហើយដែលបានចូលរួមសង្កេតការណ៍បោះឆ្នោតនៅកម្ពុជាដែរនោះ បានចេញសេចក្តីថ្លែងការណ៍មួយវាយតម្លៃថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ កាលពីថ្ងៃ២៩ ខែកក្កដា ឆ្នាំ២០១៨ នៅក្នុងប្រទេសកម្ពុជា គឺមានលក្ខណៈសេរី ត្រឹមត្រូវ យុត្តិធម៌ និងអាចជាគំរូសម្រាប់ប្រទេសក្នុងតំបន់ផងដែរ នេះបើយោងតាមសេចក្តីថ្លែងការណ៍ចុះថ្ងៃទី៣១ ខែកក្កដា ឆ្នាំ២០១៨។
សមាគមចំនួន៦នោះ បានលើកឡើងថា សមាគមចំនួន៦ មានមូលដ្ឋាននៅប្រទេសអូស្ត្រាលី និងណូវ៉ែលហ្សេឡង់ ហើយដែលបានបញ្ជូនអ្នកសង្កេតការណ៏ចូលរួមសង្កេតការណ៍បោះឆ្នោតនៅកម្ពុជាដែរនោះ សូមកោតសសើរ និងវាយតំលៃខ្ពស់ចំពោះគណៈកម្មាធិការជាតិរៀបចំការបើឆ្នោត (គ.ជ.ប) ដែលបានខិតខំរៀបចំការបោះឆ្នោតនេះឲ្យដំណើរការទៅដោយរលូន និងស្ថិតក្នុងបរិយាកាសមួយល្អប្រសើរ ទាំងនៅពេលឃោសនា និងពេលបោះឆ្នោត ដោយគ្មានអំពើហិង្សា និងគ្មានការគំរាមកំហែង។
សមាគមទាំងនោះ បានលើកឡើងទៀតថា ការបោះឆ្នោតកន្លងមកនេះ ត្រូវបានផ្តល់តម្លៃដោយពលរដ្ឋខ្មែរខ្លួនឯង តាមរយៈការចូលរួមការបោះឆ្នោតប្រមាណជាង៨២ភាគរយ នៃចំនួនអ្នកមានឈ្មោះបោះឆ្នោតសរុប និងស្ថិតក្រោមក្រសែភ្នែកមនុស្សជាច្រើនម៉ឺននាក់ ដែលជាអ្នកសង្កេតការណ៍ជាតិ-អន្តរជាតិ ព្រមទាំងភ្នាក់ងារគណបក្សនយោបាយ អ្នកសារព័ត៌មានជាតិ អន្តរជាតិ ដែលអញ្ជើញមកពីប្រទេសជាង៥០លើពិភពលោក ឃ្លាំមើលនូវដំណើរការបោះឆ្នោតនេះ។
សមាគមបានលើកឡើងយ៉ាងដូច្នេះថា “ក្នុងនាមអ្នកសង្កេតការអន្តរជាតិ យើងខ្ញុំសូមសម្តែងនូវការអបអរសាទរចំពោះពលរដ្ឋខ្មែរ ដែលបានចូលរួមពង្រឹងនូវលទ្ធិប្រជាធិបតេយ្យក្នុងប្រទេសខ្លួន ដោយបានសម្តែងនូវឆន្ទៈតាមរយៈការចេញទៅបោះឆ្នោតក្នុងចំនួនយ៉ាងច្រើនលើសលប់ ស្របតាមស្មារតីនៃរដ្ឋធម្មនុញ្ញ និងច្បាប់កម្ពុជា ដោយមានជម្រើសគ្រប់គ្រាន់ និងការពារដោយប្រព័ន្ធបោះឆ្នោតសម្ងាត់។ ទន្ទឹមនេះ យើងខ្ញុំក៏សូមវាយតម្លៃខ្ពស់ដល់កិច្ចខិតខំប្រឹងប្រែងរបស់គណៈកម្មាធិការជាតិរៀបចំការបើឆ្នោត (គ.ជ.ប) ដែលបានធ្វើឲ្យការបោះឆ្នោតមួយនេះ ក្លាយជាគំរូ មួយសម្រាប់បណ្តាប្រទេសនានាក្នុងតំបន់ផងដែរ ដោយធានាបាននូវការបោះឆ្នោតមួយដែលប្រកបដោយភាពសេរី ត្រឹមត្រូវ យុត្តិធម៌ តម្លាភាព និងគ្មានការគំរាមកំហែង”។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួម ហើយជាលទ្ធផល មានប្រជាពលរដ្ឋកម្ពុជាបានអញ្ជើញទៅបោះឆ្នោតចំនួន៦.៩៤៦.១៦៤នាក់ ដែលស្មើនឹង៨២,៨៩ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប៨.៣៨០.២១៧នាក់។ ក្រោយការបោះឆ្នោតភ្លាម អ្នកសង្កេតការណ៍ជាតិ អន្តរជាតិបានវាយតម្លៃថា ដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ បានបញ្ចប់ក្រោមបរិយាកាសល្អ រលូន ត្រឹមត្រូវ សេរី និងយុត្តិធម៌ និងមានការគោរពច្បាប់ គោរពសិទ្ធិមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្ដាប់ធ្នាប់ល្អ៕
Source: Kampuchea Thmey Daily
0 Comments