អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃពុធបានប្រកាសតែងតាំងលោកស្រី Michelle Bachelet ឲ្យក្លាយជាប្រមុខសិទ្ធិមនុស្សបន្ទាប់ របស់ស្ថាប័នពិភពលោកមួយនេះ។ លោកស្រីបានកាន់តំណែងជាប្រធានាធិបតីពីរដងរបស់ប្រទេសឈីលីដែលត្រូវទទួលរងនូវការធ្វើទារុណកម្មក្រោមរបបរបស់លោក Pinochet។
លោកស្រី Bachelet អាយុ៦៦ឆ្នាំ នឹងត្រូវជំនួសលោក Zeid Ra'ad Al Hussein របស់ប្រទេសហ្ស៊កដានីដែលជាអ្នករិះគន់យ៉ាងខ្លាំងអំពីគោលនយោបាយរបស់ប្រធានាធិបតីអាមេរិកលោក Donald Trump និងកាន់តំណែងជាឧត្តមស្នងការសិទ្ធិមនុស្សរបស់អង្គការសហប្រជាជាតិចាប់តាំងពីខែកញ្ញាឆ្នាំ២០១៤មក។
ប្រធានាធិបតីពីរសម័យដែលជាប់ចំណាត់ថ្នាក់ក្នុងចំណោមស្ត្រីដ៏មានឥទ្ធិពលបំផុតនៅក្នុងពិភពនយោបាយរូបនេះក៏បានបម្រើការងារជានាយិកាដំបូងគេបំផុតរបស់ភ្នាក់ងារលើកកម្ពស់សមភាពយេនឌ័រនៅទូទាំងពិភពលោករបស់អង្គការសហប្រជាជាតិផងដែរ។
សេចក្តីថ្លែងរបស់អង្គការសហប្រជាជាតិបាននិយាយថា លោក Guterres បានជូនដំណឹងដល់មហាសន្និបាតអំពីការសម្រេចចិត្តរបស់លោកនៅក្នុងលិខិតមួយកាលពីថ្ងៃពុធបន្ទាប់ពីការពិគ្រោះយោបល់ជាមួយប្រមុខក្រុមប្រចាំតំបន់នៅអង្គការសហប្រជាជាតិ។
ក្រុមអ្នកការទូតបាននិយាយថា មហាសន្និបាត១៩៣ប្រទេសនេះនឹងជួបប្រជុំគ្នានៅថ្ងៃសុក្រដើម្បីបោះឆ្នោតលើការតែងតាំងនេះដែលត្រូវបានគេរំពឹងថានឹងទទួលបានការអនុម័ត។ លោក Zeid គ្រោងនឹងចុះចេញពីតំណែងនៅថ្ងៃទី៣១ខែសីហា។
លោកស្រី Bachelet នឹងចូលទៅក្នុងទីតាំងមួយដែលមានភាពចម្រូងចម្រាសជាច្រើននៅក្រោមការដឹកនាំរបស់លោក Zeid ដែលបានសម្រេចចិត្តមិនស្វែងរកអាណត្តិទីពីរបន្ទាប់ពីបាត់បង់ការគាំទ្រពីបណ្តាប្រទេសដែលមានអំណាចរួមទាំងសហរដ្ឋអាមេរិក រុស្ស៊ីនិងចិនផងដែរ។
ដោយកើតនៅទីក្រុង Santiago, លោកស្រី Bachelet បានរៀនពេទ្យនៅពេលលោកស្រីត្រូវបានឃុំខ្លួនអស់រយៈពេលជាច្រើនសប្តាហ៍។ បន្ទាប់ពីការដោះលែង លោកស្រីត្រូវបានគេនិរទេសជាមួយម្តាយរបស់លោកស្រីទៅប្រទេសអូស្ត្រាលីមុនពេលទៅរស់នៅប្រទេសអាល្លឺម៉ង់ខាងកើត។
លោកស្រី Bachelet បានវិលត្រឡប់មកប្រទេសឈីលីវិញនៅឆ្នាំ១៩៧៩ប៉ុន្តែត្រូវបានរារាំងមិនឲ្យធ្វើការជាវេជ្ជបណ្ឌិតដោយសារហេតុផលនយោបាយ។
បន្ទាប់ពីលទ្ធិប្រជាធិបតេយ្យត្រូវបានស្តារឡើងវិញនៅប្រទេសឈីលីក្នុងឆ្នាំ១៩៩០ លោកស្រីបានបម្រើការងារឲ្យក្រសួងសុខាភិបាលហើយនៅឆ្នាំ២០០០ត្រូវបានតែងតាំងជារដ្ឋមន្ដ្រីក្រសួងសុខាភិបាលនិងជារដ្ឋមន្ត្រីការពារជាតិនៅបួនឆ្នាំបន្ទាប់៕
Source: Kampuchea Thmey Daily
0 Comments