ភ្នំពេញ ៖ នៅក្នុងរយៈពេល៦ខែ ឆ្នាំ២០១៨នេះ មានករណីជំងឺគ្រុនឈាមចំនួន៥២៨៤ករណីកើនឡើង៧៧ភាគរយបើធៀបទៅនឹងរយៈពេលដូចគ្នាកាលពីឆ្នាំ២០១៧កន្លងទៅ។
យោងតាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រនិងបាណកសាស្ត្របានឲ្យដឹងថា ក្នុងរយៈពេល៦ខែឆ្នាំ២០១៨នេះមានករណីជំងឺគ្រុនឈាមចំនួន៥២៨៤ករណីស្មើនឹងអត្រាអាំស៊ីដង់ចំនួន៣១,៧ភាគរយក្នុងចំណោម១០០ពាន់នាក់។
ក្នុងនោះមាន៨០ភាគរយនៃចំនួនករណីសរុបមាននៅរាជធានីភ្នំពេញ កណ្តាល កំពង់ចាម សៀមរាប បន្ទាយមានជ័យ កំពង់ធំ ព្រៃវែង ត្បូងឃ្មុំ កំពង់ឆ្នាំង ព្រះវិហារ ក្រចេះនិងកំពង់ស្ពឺ។
តាមរបាយការណ៍ដដែលបានឲ្យដឹងទៀតថា ចំនួនករណី៥២៨៤នេះ បើប្រៀបធៀបនឹងរយៈពេលដូចគ្នាកាលពីឆ្នាំ២០១៧ កន្លងទៅនេះឃើញថា មានការកើនឡើងចំនួនចំនួន៣៧០៤ករណីខណៈដែល៦ខែ ឆ្នាំ២០១៧ មានករណីគ្រុនឈាមចំនួនតែ១៥៨០ករណី។
ចំណែកករណីស្លាប់វិញនៅក្នុងរយៈពេល៦ខែឆ្នាំ២០១៨នេះ ក្នុងចំណោម៥២៨៤ករណីមានករណីស្លាប់ចំនួន១០ករណី ស្មើនឹងអត្រាស្លាប់០,២ភាគរយខណៈ៦ខែឆ្នាំ២០១៧កន្លងទៅមានចំនួនស្លាប់តែ១ករណីប៉ុណ្ណោះក្នុងចំណោម១៥៨០ករណីដែលមានអត្រាស្លាប់០,០៦ភាគរយ។
លោកវេជ្ជបណ្ឌិតហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្របាណកសាស្ត្របានមានប្រសាសន៍ ណែនាំដល់បងប្អូនប្រជាពលរដ្ឋ ត្រូវមានការប្រុងប្រយ័ត្នខ្ពស់ចំពោះជំងឺគ្រុនឈាមពោលគឺត្រូវរក្សាឲ្យបាននូវបរិស្ថានស្អាតអនាម័យល្អនៅជុំវិញលំនៅឋាន។
លោកប្រធានមជ្ឈមណ្ឌលជាតិរូបនោះបានបន្តថា «ដើម្បីចូលរួមទប់ស្កាត់ជំងឺគ្រុនឈាមនេះខ្ញុំសូមសំណូមពរយ៉ាងទទូចដល់ប្រជាពលរដ្ឋសូមចូលរួមទាំងអស់គ្នាក្នុងការលុបបំបាត់ភ្នាក់ងារចម្លងជំងឺគ្រុនឈាម ដែលបង្កឡើងដោយភ្នាក់ងារចំលងមូសខ្លាហើយមូសខ្លានេះកើតឡើងតាមរយៈការទឹកដក់ទឹកថ្លាមិនមានក្លិនស្អុយនៅតាមពាងហាងទឹក»។
លោកវេជ្ជបណ្ឌិតអ៊ុយ រ៉េកុល បានបញ្ជាក់បន្ថែមថា «ការងារកំចាត់ភ្ងាក់ងារចម្លងជំងឺគ្រុនឈាមនេះវាមិនមែនជាភារកិច្ចរបស់ក្រសួងសុខាភិបាលតែម្នាក់ឯងនោះទេ។
ក្រសួងសុខាភិបាលមានតួនាទីបង្ហាញពីវិធានការទប់ស្កាត់បញ្ហានេះ តែអ្នកអនុវត្តផ្ទាល់គឺបងប្អូនប្រជាពលរដ្ឋនៅតាមលំនៅឋាននីមួយៗជាអ្នកទទួលខុសត្រូវក្នុងនោះត្រូវលុបបំបាត់កុំឲ្យមានដង្កូវទឹកនៅក្នុងអាងទឹក ពាងទឹក ត្រូវលាងអាងនិងពាងទឹកឲ្យបាន១សប្តាហ៍២ដងក្នុង១សប្តាហ៍និងលុបបំបាត់ ឬ ដុតកម្ទេចចោលនូវរាល់វត្ថុដែលអាចដក់ទឹកបានពោលគឺធ្វើយ៉ាងណាត្រូវសំអាតនៅក្នុងទីធ្លាលំនៅឋានរបស់បងប្អូនឲ្យបានស្អាត កុំឲ្យមានមូស»។
លោកបានបញ្ជាក់បន្ថែមថា ថ្នាំអាបែតសម្លាប់ដង្កូវទឹកដាក់តែក្នុងពាង ឬ អាងទឹកប្រើប្រាស់ប៉ុណ្ណោះ តែរាល់សម្ភារៈមិនប្រើប្រាស់ពិសេសសំបកកង់រថយន្ត ម៉ូតូ កង់ កំប៉ុង ថូផ្កា សំបកដប ជាដើម គឺមិនមានការអនុញ្ញាតឲ្យដាក់ថ្នាំអាបែតសម្លាប់ដង្កូវទឹកនោះទេ ព្រោះវត្ថុទាំងនោះជាសម្ភារៈបោះចោល ដែលទាមទារឲ្យប្រជាពលរដ្ឋគ្រប់ៗរូប ចូលរួមដាច់ខាតកំចាត់ប្រភពទាំងនោះ បើមិនដូច្នេះទេគឺ មិនអាចទប់ស្កាត់ការរីករាលដាលជំងឺបានទេ។
លោកបានឲ្យដឹងទៀតថា ចំណែកសេរ៉ូម ថ្នាំអាបែត និងថ្នាំបាញ់យើងបានត្រៀមគ្រប់គ្រាន់ និងបែងចែករួចជាស្រេចទៅតាមរាជធានី ខេត្តពិសេសខេត្តដែលមានការប្រឈមនឹងជំងឺគ្រុនឈាម៕
Source: Kampuchea Thmey Daily
0 Comments