ស្ទឹងត្រែង ៖ ដោយមើលឃើញភាពលំបាករបស់ប្រជាពលរដ្ឋ កាកបាទក្រហមកម្ពុជា បានយកអំណោយមនុស្សធម៌ ចែកជូនប្រជាពលរដ្ឋរងគ្រោះដោយទឹកជំនន់ទន្លេមេគង្គចំនួន ៦៧គ្រួសារ នៅក្រុងស្ទឹងត្រែង កាលព្រឹកថ្ងៃទី៣១ ខែកក្កដា ឆ្នាំ២០១៨។
កាកបាទក្រហមកម្ពុជាដឹកដោយ លោក អ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា សហការជាមួយសាខាកាកបាទក្រហមកម្ពុជា និងលោកឈាង ឡាក់ អភិបាលរងខេត្ត និងជាប្រធានសាខាកាកបាទក្រហមខេត្តបានចុះចែកជូនអំណោយមនុស្សធម៌ដល់ប្រជាពលរដ្ឋចំនួន៦៧ គ្រួសារ ដែលកំពុងជម្លៀសខ្លួនមកកាន់ទីទួលសុវត្ថិភាព ស្ថិតនៅសង្កាត់សាមគ្គី និងសង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង។
លោកឈាង ឡាក់ ប្រធានសាខាកាកបាទក្រហមខេត្តបានឲ្យដឹងថា អំណោយដែលប្រជាពលរដ្ឋទទួលបានក្នុងមួយគ្រួសារទទួលបាន អង្ករ ៣០គីឡូក្រាម មី ១កេស ត្រីខ ១យួរ ទឹកស៊ីអ៊ីវ១យួរ ទឹកត្រី១យួរ និងឃីដ ១កញ្ចប់ អំណោយទាំងនេះគឺជាអំណោយសប្បុរសធម៌របស់កាកបាទក្រហមកម្ពុជា និងសាខាកាកបាទក្រហមកម្ពុជាខេត្តផ្តល់ជូនដល់ប្រជាពលរដ្ឋទាំង៦៧ គ្រួសារ ក្នុងនោះ ប្រជាពលរដ្ឋមកពីសង្កាត់សាមគ្គី ៣៧គ្រួសារ និងសង្កាត់ស្រះឫស្សី ចំនួន ៣០ គ្រួសារ។
លោកបន្ថែមថា អំណោយដែលកាកបាទក្រហមកម្ពុជាផ្តល់ជូនប្រជាពលរដ្ឋរងគ្រោះដោយជំនន់ទឹកភ្លៀងនាពេលនេះ គឺអាចកាត់បន្ថយបាននូវទុក្ខលំបាករបស់ប្រជាពលរដ្ឋបានមួយកម្រិត និងមិនទុកឲ្យប្រជាពលរដ្ឋណារងទុកលំបាកដោយគ្រោះមហន្តរាយទឹកជំនន់នោះឡើយ។
លោកបញ្ជាក់ថា គ្រួសារដែលទទួលបានអំណោយទាំងនេះ ជាប្រជាពលរដ្ឋដែលត្រូវបានជម្លៀសកាលពីថ្ងៃទី២៧ ខែកក្កដា ឆ្នាំ២០១៨ កន្លងមកនេះ ហើយបន្ទាប់ពីទទួលបានរបាយការណ៍អំពីប្រជាពលរដ្ឋរងគ្រោះព្រោះទឹកជំនន់ សាខាកាកបាទក្រហមកម្ពុជាខេត្តបានផ្តល់របាយការណ៍នេះទៅកាន់កាកបាទក្រហមកម្ពុជា ហើយសម្តេចកិត្តិព្រឹទ្ធបណ្ឌិតបានចាត់ឲ្យ លោក អ៊ុយ សំអាត នាំយកអំណោយមកជូនប្រជាពលរដ្ឋរងគ្រោះទាំង៦៧គ្រួសារនេះតែម្តង។
លោក អ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា បាននាំមកនូវការផ្ដាំផ្ញើរសាកសួរសុខទុក្ខ ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចជាកាលសម្តេចទាំងទ្វេតែងតែគិតគូរអំពីសុខទុក្ខ របស់បងប្អូនប្រជាពលរដ្ឋនៅគ្រប់ទីកន្លែង ដោយមិនមានការប្រកាន់ ពូជសាសន៍ ពណ៌សម្បុរ និន្នាការនយោបាយ អ្វីឡើយ ហើយសម្តេចតែងតែគិតគូរជួយសង្គ្រោះប្រជាពលរដ្ឋដែលរងគ្រោះមហន្តរាយផ្សេងៗ ឲ្យបានទាន់ពេលវេលា។
លោកបានផ្តាំផ្ញើដល់ប្រជាពលរដ្ឋ ឲ្យថែរក្សាសុខភាព រស់នៅមានអនាម័យ ត្រូវបរិភោគទឹកដាំពុះ គេងក្នុងម៉ុង ពិសេសនៅក្នុងរដូវភ្លៀងធ្លាក់នេះដែលងាយនិងបង្កជាមេរោគផ្សេងៗដែលប្រជាពលរដ្ឋទាំងអស់ត្រូវតែរស់នៅប្រកបដោយអនាម័យ ហូបស្អាត ផឹកស្អាត និងរស់នៅស្អាត ជាពិសេសត្រូវប្រុងប្រយ័ត្នគ្រប់ពេលវេលាក្នុងការធ្វើដំណើរ ព្រោះក្នុងពេលទឹកជំនន់អាចនិងមានសត្វអាសិរពិសចេញមកបង្កគ្រោះថ្នាក់ដល់ខ្លួនយើង និងក្រុមគ្រួសារយើង។
សូមបញ្ជាក់ផងដែរថា ពេលនេះអាជ្ញាធរក្រុងស្ទឹងត្រែងបាននឹងកំពុងត្រៀមជម្លៀសប្រជាពលរដ្ឋក្នុងក្រុងស្ទឹងត្រែងប្រមាណ២៧៧គ្រួសារ ស្មើនឹង១១៨៨នាក់ ដែលនិងត្រូវទទួលរងគ្រោះដោយជំនន់ទឹកភ្លៀង ទៅកាន់ទីទួលសុវត្ថិភាពជាបន្តទៀត ដើម្បីសុវត្ថិភាព៕
Source: Kampuchea Thmey Daily
0 Comments