បាត់ដំបង ៖ ទីតាំងស្តុក អេតចាយដ៏ធំមួយកន្លែង ត្រូវបានអគ្គិភ័យឆាបឆេះគ្មានសល់ទាំងរំលងអធ្រាត្រ បង្កការភ្ញាក់ផ្អើលយ៉ាងខ្លាំងដល់ប្រជាពលរដ្ឋ ដែលនៅក្បែរខាងផងដែរ ប៉ុន្តែអណ្ដាតភ្លើងនេះ មិនបានរាលដាលទៅដល់ផ្ទះអ្នកជិតខាងឡើយ ដោយសារតែមានការអន្តរាគមន៍បានទាន់ពេលវេលាពីសំណាក់រថយន្ត បង្ការ ពន្លត់អគ្គីភ័យ របស់ស្នងការដ្ឋាន នគរបាលខេត្ត បាត់ដំបង។
ហេតុការណ៍នេះ បានកើតឡើង នៅវេលាម៉ោង ១១ និង ៣០ នាទី យប់ ថ្ងៃទី១៤ ខែសីហា ឆ្នាំ២០១៨ នៅចំណុចឃ្លាំងស្តុកអេតចាយ មួយកន្លែង ស្ថិតក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដែលឃ្លាំងស្តុកអេតចាយនេះមានទំហំ ២០ x ៨ ម៉ែត្រ ធ្វើអំពីដែក ប្រក់ស័ង្កសី ជារបស់ជនរងគ្រោះឈ្មោះ ទ្រី សុភារឹទ្ធ ភេទស្រី អាយុ ២៨ ឆ្នាំ។
តាមការអះអាងពីម្ចាស់ទីតាំងក៏ដូចជាប្រជាពលរដ្ឋ នៅជិតខាង បាននិយាយថា ការឆាបឆេះនេះ ទំនងជាបណ្តាលមកពីការឆ្លងចរន្តអគ្គិសនី ទើបកើតមានរឿងហេតុបែបនេះ ហើយម្យ៉ាងទៀតដោយសារតែទីតាំងនេះសុទ្ធតែអេតចាយ ដូច្នេះធ្វើអោយអណ្តាតភ្លើង ងាយនឹងឆេះជាទីបំផុត បានជាលឿនបែបនេះ។
ដោយឡែក លោក រៀម សារ៉េត នាយរងការិយាល័យ បង្ការ ពន្លត់អគ្គិភ័យ នៃស្នងការដ្ឋាននគរបាលខេត្ត បានបញ្ជាក់ថា ការចុះប្រតិបត្តិការនេះ គឺបានប្រើប្រាស់កម្លាំងសរុបចំនួន១៥ រូប រថយន្តចំនួន ៣ គ្រឿង និងប្រើប្រាស់ទឹកអស់ ៦ ធុង និងដោយមានការសហការពីកម្លាំង កងរាជអាវុធហត្ថក្រុង សមត្ថកិច្ច ក៏ដូចជាលោកអភិបាលក្រុងផងដែរ ទើបអាចទប់ស្កាត់នូវការរាលដាលនេះបាន ដោយបានបញ្ចប់នៅម៉ោង ជិត ២ រំលងអធ្រាត្រ ប៉ុន្តែអគ្គិភ័យនេះ មិនបានបង្កអោយមានការប៉ះពាល់ដល់អាយុជីវិតមនុស្ស ហើយក៏មិនបានបំផ្លាញនូវទ្រព្យសម្បត្តិនៅក្នុងផ្ទះឡើយ៕
Source: Kampuchea Thmey Daily
0 Comments