យកភាពស្គាល់គ្នាធ្វើដើមទុន ឆបោកប្រាក់បានហើយ ជិះម៉ូតូរត់គេច ជាប់អន្ទាក់ប៉ូលិស
ភ្នំពេញ ៖ ជនសង្ស័យម្នាក់ ត្រូវបានកម្លាំងផ្នែកព្រហ្មទណ្ឌ នៃអធិការដ្ឋានខណ្ឌទួលគោក រាជធានីភ្នំពេញធ្វើការឃាត់ខ្លួនជាក់ស្ដែងពីបទ ឆបោក (យកលុយចំនួន៣០០$ សហរដ្ឋអាមេរិក ) និងប្រើប្រាស់ដោយខុសច្បាប់នូវសារធាតុញៀន ក្រោយពីជនសង្ស័យម្នាក់នេះយកភាពស្គាល់គ្នាធ្វើជាដើមទុន ឆបោកប្រាក់គេបានជាច្រើនរយដុល្លារនោះ។
ជនសង្ស័យត្រូវបានឃាត់ខ្លួន កាលពីថ្ងៃអង្គារ ៣រោច ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ខែសីហា ឆ្នាំ២០១៨ វេលាម៉ោងប្រហែល ១៥និង៤០នាទី នៅចំណុចលើផ្លូវលេខ២៦១ កែងផ្លូវ លេខ២៣០ ក្រុមទី១៣ ភូមិ៤ សង្កាត់ បឹងសាឡាង ខណ្ឌទួលគោក រាជធានីភ្នំពេញ ពោលគឺបន្ទាប់ពីបើកម៉ូតូរត់គេចពីចំណុចមុខផ្ទះលេខ២E ផ្លូវលេខ២៤៧ ក្រុមទី៧ ភូមិ២ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ កាលពីថ្ងៃទី១៤ ខែសីហា ឆ្នាំ២០១៨ វេលាម៉ោងប្រហែល ១៥និង៣០ នាទី។
ជនរងគ្រោះ ត្រូវបានស្គាល់ឈ្មោះ តាំង សុខរិទ្ធី ភេទប្រុស អាយុ២៥ឆ្នាំ ជនជាតិខ្មែរ មុខរបរ ទិញ-លក់ម៉ូតូ ស្នាក់នៅផ្ទះជួល ផ្លូវលេខ៦៦៤ សង្កាត់បឹងសាឡាង ខណ្ឌទួលគោក រាជធានីភ្នំពេញ បាត់បង់សម្ភារៈមាន ប្រាក់ដុល្លារចំនួន៣០០$ (បីរយដុល្លារសហរដ្ឋអាមេរិក )។
ប្រភពពីសមត្ថកិច្ច បានឲ្យដឹងថា ជនសង្ស័យ ឈ្មោះ សេង អ៊ីលីន ហៅ លីន ភេទប្រុស អាយុ២២ឆ្នាំ ជនជាតិខ្មែរ មុខរបរ ជាងជួសជុលទូរស័ព្ទដៃ ស្នាក់នៅផ្ទះជួល ផ្លូវសឡា ភូមិទ្រា២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ ជាមួយគ្នានេះ សមត្ថកិច្ចបានចាប់យកវត្ថុតាង ម៉ូតូមួយគ្រឿងម៉ាក Honda C110 ស៊េរី 2012 ពណ៌ខ្មៅ (សង់ប៊ិច ) ពាក់ស្លាកលេខ ភ្នំពេញ 1BS- 1644 ដែលមានលេខតួនិងលេខម៉ាស៊ីន: 8015602 , ទូរស័ព្ទដៃមួយគ្រឿងម៉ាក Nokia 101 ពណ៌ខ្មៅ ប្រើស៊ីមលេខ 0964999905 , ប្រាក់ដុល្លារចំនួន35$ (សាមសិបប្រាំដុល្លារសហរដ្ឋអាមេរិក )។
មន្ត្រីប៉ូលិសបន្តថា នៅថ្ងៃទី១៤ ខែសីហា ឆ្នាំ២០១៨ វេលាម៉ោងប្រហែល ១៥និង៣០នាទី ជនរងគ្រោះឈ្មោះ តាំង សុខរិទ្ធី ភេទប្រុស អាយុ២៥ឆ្នាំ ជនជាតិខ្មែរ កំពុងលក់ម៉ូតូនៅតូប លើផ្លូវលេខ១៨៦ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ ស្រាប់តែមានជនសង្ស័យឈ្មោះ សេង អ៊ីលីន ហៅ លីន ភេទប្រុស អាយុ២២ឆ្នាំ ជនជាតិខ្មែរ ដែលជាម៉ូយធ្លាប់លក់ម៉ូតូឲ្យជនរងគ្រោះមួយដង បានមកជួបនឹងជនរងគ្រោះរួចហើយជនសង្ស័យបាននិយាយជាមួយជនរងគ្រោះថា ចង់លក់ម៉ូតូមួយគ្រឿងម៉ាក Honda C110 ស៊េរី 2012 ពណ៌ខ្មៅ ពាក់ស្លាកលេខ ភ្នំពេញ 1BS-1644 ដែលបញ្ចាំនៅហាងបញ្ចាំ ឃ្លាំងរំសេវ យកមកលក់ឲ្យជនរងគ្រោះ ដោយជនសង្ស័យឈ្មោះ សេងអ៊ីលីន បាននិយាយឲ្យជនរងគ្រោះឲ្យលុយមកឲ្យខ្លួនចំនួន៣០០$ (បីរយដុល្លារសហរដ្ឋអាមេរិក) សិនចាំលស់ម៉ូតូពីហាងបញ្ចាំហើយបានយកម៉ូតូនេះយកមកលក់ឲ្យជនរងគ្រោះវិញ ក្នុងតម្លៃ៥៥០$ (ប្រាំរយហាសិបដុល្លារសហរដ្ឋអាមេរិក ) មានទាំងប័ណ្ណសំគាល់យានយន្តម៉ូតូនេះផង ដោយសារតែម៉ូយធ្លាប់លក់ម៉ូតូមកឲ្យខ្លួន ជនរងគ្រោះក៏យល់ព្រមឲ្យលុយទៅជនសង្ស័យឈ្មោះ សេងអ៊ីលីន ចំនួន៣០០$ (បីរយដុល្លារសហរដ្ឋអាមេរិក) ហើយជនរងគ្រោះ ក៏ដឹកជនសង្ស័យទៅលស់ម៉ូតូជាមួយគ្នានៅហាងបញ្ចាំ ផ្លូវលេខ២៤៧ ក្រុម ទី៧ ភូមិ២ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ លុះពេលទៅដល់ហាងបញ្ចាំជនរងគ្រោះបានឈប់ចាំជនសង្ស័យនៅលើម៉ូតូ ហួសកន្លែងបញ្ចាំបានប្រហែល ២ម៉ែត្រ លុះពេលជនសង្ស័យឈ្មោះ សេង អ៊ីលីន ហៅ លីន លស់ម៉ូតូបានហើយ (ម៉ូតូសង់ប៊ិច ស៊េរី2012 ខាងលើ ) ស្រាប់តែជនសង្ស័យឈ្មោះ សេង អ៊ីលីន បានជិះម៉ូតូគេចខ្លួន ភ្លាមនោះជនរងគ្រោះក៏ជិះម៉ូតូដេញតាមពីក្រោយ រហូតមកដល់ចំណុចផ្លូវលេខ២៦១ កែងផ្លូវលេខ២៣០ ក្រុមទី១៣ ភូមិ៤ សង្កាត់ បឹងសាឡាង ខណ្ឌទួលគោក រាជធានីភ្នំពេញ ក៏ឃាត់ខ្លួនជនសង្ស័យឈ្មោះ សេង អ៊ីលីន បានរួចយកមកប្រគល់ឲ្យសមត្ថកិច្ចអធិការដ្ឋាននគរបាលខណ្ឌទួលគោក ចាត់ការតាមនីតិវិធីច្បាប់តែម្ដង។
បន្ទាប់ពីឃាត់ខ្លួនជនសង្ស័យឈ្មោះ សេង អ៊ីលីន ហៅ លីន សមត្ថកិច្ចបានយកទឹកនោមជនសង្ស័យរូប នេះមកធ្វើតេស្ដស្វែងរកសារធាតុញៀនក្នុងទឹកនោម ជាលទ្ធផល មានភាព វិជ្ជមាន។
បច្ចុប្បន្នជនសង្ស័យឈ្មោះ សេង អ៊ីលីន ហៅ លីន កំពុងឃាត់ខ្លួនជាបណ្ដោះអាសន្ន នៅអធិការដ្ឋាន នគរបាលខណ្ឌទួលគោក ដើម្បីធ្វើការ សាកសួរ កសាងសំណុំរឿង និងបញ្ជូនជនសង្ស័យទៅសាលាដំបូង រាជធានីភ្នំពេញ ចាត់ការតាមនីតិវិធីច្បាប់៕
Source: Kampuchea Thmey Daily
0 Comments