លួច​រថយន្ត​ពី​ក្រុងភ្នំពេញ មក​លក់​នៅ​ខេត្ត​ប៉ៃលិន ត្រូវ​ជាប់អន្ទាក់​សមត្ថកិច្ច

ប៉ៃលិន​ ៖​ ជនសង្ស័យ​ម្នាក់ ត្រូវបាន​កម្លាំង​សមត្ថកិច្ច​ប៉ុស្តិ៍​រដ្ឋបាល​ឃុំ​ស្ទឹង​កាច់ ធ្វើការ​ឃាត់​ខ្លួន បន្ទាប់ពី​ទទួល​ពាក្យ​បណ្តឹង​ពី​ជនរងគ្រោះ ក្នុងករណី​លួច​រថយន្ត​ពី​ក្រុងភ្នំពេញ មក​លក់​នៅ​ខេត្ត​ប៉ៃលិន ក្នុង​តម្លៃ​១០៥០០​ដុល្លា។

ការឃាត់​ខ្លូន​ជនសង្ស័យ​នេះដែរ​គឺធ្វើឡើង​កាលពី​វេលា​ម៉ោង​១៨ និង​៣០​នាទី​ព្រលប់​ថ្ងៃ​អង្គារ​ ០៣​កើត ខែ​ស្រាពណ៍ ឆ្នាំច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី​១៤ ខែសីហា ឆ្នាំ​២០១៨ ស្ថិតក្នុង​ភូមិ​ផ្សារ​ព្រំ ឃុំ​ស្ទឹង​កាច់ ស្រុក​សាលា​ក្រៅ ខេត្ត​ប៉ៃលិន។

ជនរងគ្រោះ​មាន​ឈ្មោះ សេង សំណាង ភេទ​ស្រី អាយុ​៤៩​ឆ្នាំ មុខរបរ​មេផ្ទះ​ ជនជាតិ​ខ្មែរ ​មាន​ទីលំនៅ​បច្ចុប្បន្ន​រស់នៅ​រាជធានី​ភ្នំពេញ ដោយ​បាត់​រថយន្ត​មួយ​គ្រឿង​ម៉ាក​ HIGH LANDER ពណ៌ ​ទឹកប្រាក់ ពាក់​ស្លាក​លេខ ភ្នំពេញ 2AV-2138 កាលពី​ថ្ងៃទី​០៨ ខែសីហា ឆ្នាំ​២០១៨ កន្លងទៅ។​ចំណែក​ជនសង្ស័យ​ឈ្មោះ តាន់ វណ្ណ​ថន ភេទ​ប្រុស អាយុ​៤១​ឆ្នាំ មានមុខ​របរ និង​ទីលំនៅ មិន​ពិតប្រាកដ។​

លោក ស៊ឹម សុផល នាយ​ប៉ុស្តិ៍​រដ្ឋបាល​ឃុំ​ស្ទឹង​កាច់ បាន​ឲ្យ​ដឹងថា ​៖ ក្រោយពី​ទទួល​ពាក្យបណ្តឹង​ពី​ជនរងគ្រោះ​ឈ្មោះ សេង សំណាង ភេទ​ស្រី អាយុ ៤៩​ឆ្នាំ មុខរបរ មេផ្ទះ ជនជាតិខ្មែរ ទីលំនៅ​បច្ចុប្បន្ន​រស់នៅ​រាជធានី​ភ្នំពេញ ថា​ បាត់​រថយន្ត​មួយគ្រឿង​ម៉ាក HIGH LANDER កាលពី​ថ្ងៃទី​០៨ ខែសីហា ឆ្នាំ​២០១៨​កន្លងទៅ និង​ដោយមាន​តម្រុយ​ខ្លះៗ​ថា រថយន្ត​ជនរងគ្រោះ ត្រូវបាន​គេ​ប្រទះឃើញ​នៅ​ភូមិ​ផ្សារ​ព្រំ លោក​ក៏​ដឹង​នាំ​កម្លាំង ចុះ​ស្រាវជ្រាវ នៅ​ចំណុច​ផ្ទះ​ឈ្មោះ ឈាវ រដ្ឋា ស្ថិតនៅ​ក្នុងភូមិ​ផ្សារ​ព្រំ​ជើង ឃុំ​ស្ទឹង​កាច់ ស្រុក​សាលា​ក្រៅ។

លោក​បន្តទៀតថា ​៖ បន្ទាប់ពី​ឃើញ​រថយន្ត​ជនរងគ្រោះ សមត្ថកិច្ច​ជំនាញ ក៏​សួរនាំ​រក​អ្នកលក់ រហូត​ឈានដល់​ការឃាត់​ខ្លួន​ជនសង្ស័យ​ខាងលើ នៅ​ចំណុច​មុខ​កាស៊ីណូ​(​ជី​អ៊ឹម​) ជាប់​ច្រកទ្វារ​អន្តរជាតិ​ព្រំ ខេត្ត​ប៉ៃលិន។

លោក បាន​បន្តទៀតថា ​៖​ រថយន្ត​របស់​ជនរ​ង​គ្រោះ មាន​បំពាក់​ប្រព័ន្ធ​GPS ងាយស្រួល​ក្នុងការ​តាមដាន ទើប​ដឹងថា​មាននៅ​ខេត្ត​ប៉ៃលិន​។ ​​បើតាម​ជនសង្ស័យ បានបញ្ជាក់​ប្រាប់​សមត្ថ​កិច្ច​ថា រថយន្ត​ដែល​ជនសង្ស័យ​លក់​គឺ​ក្នុងតម្លៃ​១០៥០០​ដុល្លា ។​
​
បច្ចុប្បន្ន​ជនសង្ស័យ រួមទាំង​វត្ថុតាង ត្រូវបាន​នាំយកមក​អធិការដ្ឋាន​នគរបាល​ស្រុក​សាលា​ក្រៅ ដើម្បី​ចាត់ការ​បន្ត ទៅតាម​នីតិវិធី ផងដែរ៕



​

Source: Kampuchea Thmey Daily