នគរបាល​ ចាប់​ជនជាតិ​ចិន​៣​នាក់ ​ករណី​ប្លន់​អាជីវករ​ប្ដូរ​ប្រាក់

សៀមរាប ​៖ ​កក្រើក​ខេត្តសៀមរាប​ឯណេះ​វិញ​ហើយ ជន​ជាតិចិន​ប្រដាប់​ដោយ​អាវុធខ្លី​ចំនួន​៣​នាក់​បានធ្វើ​សកម្ម​ប្លន់​អាជីវករ​ប្តូរ​ប្រាក់ តែ​មិនបាន​សម្រេច ដោយសារ​ជនរងគ្រោះ​បាន​ស្រែក​ឆោឡោ​ផ្អើល​ដល់​សមត្ថកិច្ច​ ខណៈនោះ កម្លាំង​សមត្ថកិច្ច​បាន​តាម​ប្រមាញ់​រហូត​ចាប់ខ្លួន​ជនល្មើស​បាន​ដោយ​ជោគជ័យ។

ហេតុការណ៍​នេះ​ កើតឡើង​នៅ​វេលា​ម៉ោង​១៩​និង​២០​នាទី​ ថ្ងៃទី​១៤​ ខែសីហា ​ឆ្នាំ​២០១៨​ ត្រង់​ចំណុច​មុខ​ផ្ទះ​ជនរងគ្រោះ ស្ថិត​ក្នុងភូមិ​អូរ​តា​ប្រាក់ ឃុំ​ពួក ស្រុក​ពួក ខេត្តសៀមរាប។

អធិការ​នគរបាល​ស្រុក​ពួក លោក​វរសេនីយ៍ឯក ទេព ពុំសែន បាន​ឲ្យ​ដឹង​នៅ​ព្រឹក​ថ្ងៃទី​១៦​នេះ​ថា ​នៅ​ថ្ងៃ​កើតហេតុ​ខាងលើ ជនរងគ្រោះ ១.​ឈ្មោះ តៅ សុភា ភេទ​ស្រី អាយុ​៤៤​ឆ្នាំ​។ ​២.​ឈ្មោះ ជូ រចនា ភេទ​ស្រី អាយ​២៦​ឆ្នាំ ។​ទី​៣​ឈ្មោះ ឌឹ​ម វិជ្ជា​រ៉ា ភេទ​ប្រុស អាយុ​២៦​ឆ្នាំ និង​កូនតូច​ម្នាក់ ជិះ​ឡាន​១​គ្រឿង ម៉ាក​កា​មរី ពណ៌​.​ស ស្លាក​លេខ​ភ្នំពេញ 2AH. 9660 បើកបរ​ដោយ ឌឹ​ម វិជ្ជា​រ៉ា បើក​ចេញពី​ប្រកប​របរ​លក់​មាស​ប្តូរប្រាក់ ក្នុង​ក្រុង​សៀមរាប ត្រឡប់មកផ្ទះ​របស់​ពួកគាត់​វិញ​(​ភូមិ​ឃុំ​កើតហេតុ​)

លុះ​បើក​មកដល់​មុខ​របង​ផ្ទះ​ ជនរងគ្រោះ​ទី​១​ឈ្មោះ តៅ សុភា បាន​ចុះ​ពី​ឡាន​ផ្នែក​ខាងក្រោយ​ម្នាក់ឯង​ដើម្បី​បើកទ្វារ​របង​ចូល ស្រាប់តែ​ឃើញ​មាន​ក្រុម​ជនសង្ស័យ​មិន​ស្គាល់មុខ​៣​នាក់ មាន​ពាក់​ម៉ាស់​បិទមុខ​ជិត ភេទ​ប្រុស អាយុ​ប្រហែល​៣០​ឆ្នាំ​ជាង មាឌធំ​ខ្ពស់ ស្លៀកពាក់​ស៊ីវិល មិន​ច្បាស់​ភិនភាគ បាន​ដើរ​ចេញពី​ដុប​ព្រៃ​ផ្នែក​ខាងកើត​អែប​ផ្លូវ​នោះ សំដៅ​មក​ឡាន​គាត់ ភ្លាមនោះ​មាន​ម្នាក់​ស្ទុះ​មក​វាយ​លើ​គាត់​ដោយ​វត្ថុ​រឹង​ចំក្បាល​បណ្តាល​ឲ្យ​គាត់​រងរបួស តែ​គេ​មិនបាន​និយាយ​អ្វី​ទេ ហើយ​គាត់​លើកដៃ​ប្រតាយប្រតប់​ទៅ​មនុស្ស​នោះ​វិញ និង​បាន​ស្រែក​រក​អ្នកជិតខាង​ជួយ។ ចំណែក​គ្នា​គេ​ម្នាក់​នាក់​ទៀត​ បាន​វាយ​បំបែក​កញ្ចក់​ឡាន​បែក​ផ្នែក​ខាងស្តាំ បណ្តាល​ឲ្យ​មុត​កូត​ស្បែក​កែងដៃ​ស្តាំ​ជនរងគ្រោះ​ទី​២​ឈ្មោះ ជូ រចនា ដែល​អង្គុយ​ក្នុងនោះ បំណង​រក​ទ្រព្យសម្បត្តិ​មាន​តម្លៃ ដោយ​ជនរងគ្រោះ​ស្រែក​ខ្លាំង ផ្អើល​អ្នកជិតខាង ក្រុម​ជនសង្ស័យ​ទាំង​នោះ​បាន​រត់​គេច​ខ្លួន​ទៅ​ទិសខាងកើត​ឆ្លងស្ទឹង​បាត់។

លោក​បន្តថា ក្រោយពី​ទទួលបាន​សេចក្តីរាយការណ៍ កម្លាំង​យើង​ចុះ​ដល់​កន្លែងកើតហេតុ ត្រួត​ពិនិត្យឃើញ​ឡាន​របស់​ជនរងគ្រោះ​(​ធុន​ខាងលើ​)​មាន​បែក​កញ្ចក់​ខាងស្តាំ និង​ឃើញ​មាន​វត្ថុតាង​; គ្រាប់កាំភ្លើង​១​គ្រាប់ , បង់​កាំភ្លើង​១ មាន​៨​គ្រាប់ នៅ​ដី​ជិត​របង​ផ្ទះ​ជនរងគ្រោះ​និង​ដំបង​ទីប​ដែក​១​មូល ប្រវែង​៧៩​ស​.​ម នៅ​ចំ​រ៉ា​ក់​មាត់​ស្ទឹង​ខាងកើត​កន្លែងកើតហេតុ។

បន្ទាប់មក​​កម្លាំង​នគរបាល រួមទាំង​ប្រជា​ការពារ និង​PM ធ្វើការ​រុករក​តាម​ក្រុម​ជនសង្ស័យ​ក្នុង​មូលដ្ឋាន​នោះ បានឃើញ​មាន​គ្រាប់កាំភ្លើង​១​គ្រាប់​ទៀត នៅ​ផ្លូវ​បេតុង​ក្នុងភូមិ​ប្រយុទ្ធ ឃុំ​,​ស្រុក​ពួក ដែល​នៅ​ទិសខាងកើត​កន្លែងកើតហេតុ​ប្រហែល​១៥០​ម៉ែត្រ។ បន្ទាប់​មក​ទៀត ​ឃើញ​មាន​ឡាន​១​គ្រឿង ម៉ាក​ស្តា​រិច ស៊េរី​ឆ្នាំ​២០០៤ ពណ៌​ទឹកប្រាក់ គ្មាន​ស្លាក​លេខ ក្នុង​ឡាន​នោះ ​មាន​ដាក់​ម៉ូតូ​១​គ្រឿង​ទៀត ហុងដា​ឌ្រី​ម ពណ៌​ខ្មៅ គ្មាន​ស្លាក​លេខ ស៊េរី​ឆ្នាំ​២០១៦ ទុកចោល​នៅមុខ​ខ្លោងទ្វារ​សាលាបឋមសិក្សា​ទៀ​បាញ់​គំរូ ភូមិ​ប្រយុទ្ធ ឃុំ​ស្រុក​ពួក ចាក់សោ​ជាប់​ហើយ​ស្ទូច​យកមក​រក្សាទុក​នៅ​អធិការដ្ឋាន​នប​ពួក។

លោក​បន្ត​ថា កម្លាំង​សមត្ថកិច្ច​តាម​រក​ជនសង្ស័យ​បន្ត​ទៀត​នៅ​ម៉ោង​១​និង​២០​នាទី​រំលង​អធ្រាត្រ​រហូត​ម៉ោង​៤​ថ្ងៃទី​១៥​ ខែសីហា​ ឆ្នាំ​២០១៨ ​កម្លាំង​នគរបាល​ឃាត់​បាន​ជនសង្ស័យ​ចំនួន​៣​នាក់។ ម្នាក់​ចាប់ នៅ​ចំណុច​មុខ​សាលា​វិទ្យាល័យ​ពួក ឈ្មោះ​Le xiaosi ភេទ​ប្រុស អាយុ​៣៨​ឆ្នាំ​ជនជាតិ​ចិន បន្ទាប់មក​ឃាត់​បាន​ម្នាក់ទៀត នៅ​ខាងកើត​ជាប់​សាលាបឋមសិក្សា​ទៀ​បាញ់​គំរូ ឈ្មោះ​Hu Ming chaa ភេទ​ប្រុស អាយុ​៤៣​ឆ្នាំ ចំណែក​ជាតិចិន និង​ជនសង្ស័យ​ទី​៣​ឃាត់​បាន​នៅក្បែរ​វត្ត​ធម្ម​យុទ្ធ​ឈ្មោះ​ Lhang yong sheng ភេទ​ប្រុស អាយុ​៤៨​ឆ្នាំ ជនជាតិ​ចិន។

លោក​បញ្ជាក់​ថា ករណី​នេះ​ លោក​បាន​សហការ​​ជាមួយ​កម្លាំង​ផែន​អន្តោប្រវេសន៍ ការិយាល័យ​កណ្តាល​ព្រហ្មទណ្ឌ​នៃ​ស្នងការដ្ឋាន​នគរបាល​ខេត្តសៀមរាប ដើម្បី​បន្ត​នីតិវិធី៕



​

Source: Kampuchea Thmey Daily