ភ្នំពេញ ៖ ប្រមុខរាជរដ្ឋាភិបាលកម្ពុជា បានសម្រេចផ្តល់តួនាទីប្រធានប្រតិភូនៃគណបក្សនីមួយៗដែលចូលរួមក្នុង“ឧត្តមក្រុមប្រឹក្សាពិគ្រោះនិងផ្តល់យោបល់” មានឋានៈស្មើទេសរដ្ឋមន្ត្រីនិងជាទីប្រឹក្សារបស់រាជរដ្ឋាភិបាល,ចំណែកសមាជិកមានឋានៈស្មើនឹងរដ្ឋមន្ត្រី ចំណែកអ្នកដែលធ្វើការនៅក្នុងលេខាធិការដ្ឋាននេះក៏ទទួលបានឋានៈស្មើនឹងអនុរដ្ឋលេខាធិការផងដែរ។
ការផ្តល់ឋានៈនេះ គឺដើម្បីផ្តល់សិទ្ធិអំណាចឲ្យសមាជិកនៃ"ឧត្តមក្រុមប្រឹក្សាពិគ្រោះនិងផ្តល់យោបល់" មានលទ្ធភាពក្នុងការបំពេញការងាររបស់ខ្លួនប្រកប ដោយប្រសិទ្ធភាព។
នៅព្រឹកថ្ងៃទី២១ ខែសីហានេះ សម្តេចតេជោ ហ៊ុន សែន បានជួបប្រធាននិងតំណាងមកពីគណបក្សចំនួន១៦ ក្នុងចំណោមគណបក្សទាំង២០ ដែលបានចូលរួមប្រកួតប្រជែងក្នុងការបោះឆ្នោតនាអាណត្តិទី៦នេះ នៅវិមានសន្តិភាព។ សម្តេចតេជោ ហ៊ុន សែន ប្រមុខរដ្ឋាភិបាលបង្កើតវេទិកានេះឡើងដើម្បីជួបផ្ទាល់និងផ្តល់ឱកាសឲ្យតំណាងគណបក្សនយោបាយដែលមានឆន្ទៈចូលរួមកសាងជាតិអាចបញ្ចេញយោបល់អំពីបញ្ហាប្រទេសជាតិ។
លោក ឈឹម ផលវរុណ ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ឲ្យដឹងថា គណបក្សទាំងអស់ ដែលបានចូលរួមបានគាំទ្រនូវទស្សនទានដែលបានលើកឡើងដោយសម្ដេចតេជោ ហ៊ុន សែន ក្នុងបង្កើតវេទិកាពិគ្រោះយោបល់រវាងគណបក្សនយោបាយនៅក្រៅសភានិងរាជរដ្ឋាភិបាល។
សម្ដេចបានស្នើដាក់ឈ្មោះជា“ឧត្តមក្រុមប្រឹក្សាពិគ្រោះនិងផ្ដល់យោបល់ ”។ នៅក្នុងកិច្ចប្រជុំនោះ បានពិភាក្សាគ្នាដោយផ្ដល់នូវគំនិតក្នុងការបង្កើតឡើងនូវ“ឧត្តមក្រុមប្រឹក្សាពិគ្រោះនិងផ្ដល់យោបល់” ដែលលទ្ធផលបានបង្ហាញនូវចំណុចសំខាន់រួមមាន៖ ចំណុចធំទី១-និយាយអំពីលក្ខណៈនៃការបង្កើតឬឋានៈផ្លូវច្បាប់នៃឧត្ដមក្រុមប្រឹក្សាពិគ្រោះយោបល់នេះដែលត្រូវបង្កើតឡើងដោយព្រះរាជក្រឹត្យដែលព្រះរាជាក្រឹត្យ។ សេចក្តីព្រាងព្រះរាជក្រឹត្យនេះ ត្រូវបានសម្តេចតេជោ ហ៊ុន សែន ផ្តល់ជូនលោក ឈឹម ផលវរុណ ជាប្រធានដឹកនាំធ្វើសេចក្តីព្រាងព្រះរាជក្រឹត្យនេះ។ បន្ទាប់ពីរៀបចំសេចក្តីព្រាងព្រះរាជក្រឹត្យនេះរួច ប្រគល់ជូនដល់លោក ប៊ិន ឈិន ឧបនាយករដ្ឋមន្ត្រីដើម្បីកោះប្រជុំតំណាងគណបក្សទាំងអស់ពិនិត្យទៅលើខ្លឹមសារនៃព្រះរាជក្រឹត្យនោះ រួចប្រគល់ជូនសម្តេចតេជោនាយករដ្ឋមន្ត្រីសម្រេច មុនបញ្ជូនទៅសុំព្រះហស្ថលេខាពីព្រះមហាក្សត្រ។
“ឧត្តមក្រុមប្រឹក្សាពិគ្រោះនិងផ្ដល់យោបល់” មានភារកិច្ចទី១-គោលដៅកំណត់និងផ្ដល់មតិទៅលើ ដំណើរការនិងការរៀបចំគោលនយោបាយរបស់រាជរដ្ឋាភិបាលមុននឹងដាក់ចូលគណៈរដ្ឋមន្ត្រីសម្រេចអ្វី មួយគឺកិច្ចការនេះត្រូវឆ្លងការពិគ្រោះនិងផ្ដល់យោបល់នៅក្នុង “ឧត្តមក្រុមប្រឹក្សាពិគ្រោះនិងផ្តល់យោបល់”សិន រួចហើយទើបបញ្ជូនទៅក្នុងកិច្ចប្រជុំគណៈរដ្ឋមន្ត្រីថា ត្រូវទទួលយក ឬមិនទទួលយកនោះ។ទី២-ឧត្តមក្រុមប្រឹក្សានេះមានភារកិច្ចផ្ដួចផ្ដើមគំនិតធ្វើសេចក្តីព្រាងច្បាប់ស្នើមករដ្ឋាភិបាល ដើម្បីឲ្យរដ្ឋាភិបាលពិនិត្យសម្រេចថា តើនឹងទទួលយកឬមិនទទួលយក។ មួយទៀត សមាជិកក្រុមប្រឹក្សាមានតួនាទីផ្ដល់យោបល់ទៅលើសេចក្តីព្រាងច្បាប់និងព្រះរាជក្រឹត្យរបស់រាជរដ្ឋាភិបាលឬក្រសួងនានា។ទី៣-សមាជិកក្រុមប្រឹក្សានេះអាចផ្តល់អនុសាសន៍កែលម្អលើដំណើរការអនុវត្តនូវគោលនយោបាយ និងការអនុវត្តច្បាប់ ឬ ព្រះរាជក្រឹត្យទាំងអស់របស់រាជរដ្ឋាភិបាល និងនៅថ្នាក់ជាតិ និងថ្នាក់ក្រោមជាតិ។
រាជរដ្ឋាភិបាលស្វាគមន៍គ្រប់អ្វីទាំងអស់ដែលសមាជិកក្រុមប្រឹក្សាបានរកឃើញនូវភាពអសកម្ម ដូចជាការបំពានអំណាច ការប្រព្រឹត្តអំពើពុករលួយ ដោយឈរលើការពិត។
ជាមួយគ្នានេះដែរ រាជរដ្ឋាភិបាលក៏ត្រូវទទួលយកនូវអ្វីដែលជាភស្តុតាងនិងការពិតដែលមិនត្រូវធ្វើឲ្យប៉ះពាល់ដល់ផលប្រយោជន៍ប្រជាជន។ ជាពិសេសទៀតនោះ សម្តេចតេជោ ហ៊ុនសែនបានអនុញ្ញាតឲ្យប្រធានគណបក្សអាចដាក់ជូននូវលិខិតនានាដោយផ្ទាល់ទៅកាន់នាយករដ្ឋមន្ត្រីតែម្ដងដោយមិនចាំបាច់ឆ្លងកាត់អ្នកណាឡើយ។ ជាមួយនេះសមាជិកក្រុមប្រឹក្សាក៏អាចផ្ដល់យោបល់ទៅក្រសួងស្ថាប័នរបស់រដ្ឋណាមួយពាក់ព័ន្ធទៅគោលនយោបាយរបស់រាជរដ្ឋាភិបាល។
ចំណុចធំទី២-ការរៀបចំសមាសភាព និងការរៀបចំយន្តការដំណើការ “ឧត្តមក្រុមប្រឹក្សាពិគ្រោះនិងផ្ដល់យោបល់ ”ដែលមាន៦ចំណុច៖ ទី១-សមាសភាពមកពីគណបក្សទាំងអស់ដែលបានចូលរួមបោះឆ្នោតនីតិកាលទី ៦ ។ ការចូលរួមរបស់គណបក្សគឺឈរលើគោលការណ៍ស្ម័គ្រចិត្ត។ គណបក្សដែលចង់ចូលរួមនៅពេលក្រោយទៀតក៏បាន។ ក៏ប៉ុន្ដែដើម្បីកុំឲ្យមានការចេញចូល ដោយស្រួលនោះក៏ទាមទារឲ្យមានការយល់ព្រមពីនាយករដ្ឋមន្ត្រីផងដែរ។ ទី២-សមាសភាពគណបក្សនីមួយៗត្រូវបញ្ជូនប្រតិភូរបស់ខ្លួនពីររូបចូលទៅក្នុង “ឧត្តមក្រុមប្រឹក្សាពិគ្រោះនិងផ្តល់យោបល់” ដែលជាទូទៅជាប្រធានគណបក្ស និង អនុប្រធានគណបក្ស ឬ អគ្គលេខាធិការ ។ ក៏ប៉ុន្តែវាអាចមានករណីខ្លះប្រធានគណបក្សនោះបញ្ជូនប្រតិភូមកចូល រួមដូចនេះទើបយើងប្រើពាក្យប្រតិភូខណ្ឌ។ ក្នុងចំណោមប្រតិភូទាំងពីរនាក់នេះ មានម្នាក់ជាប្រធានប្រតិភូដែលត្រូវមានឋានៈស្មើទេសរដ្ឋមន្ត្រី និងអនុប្រធានប្រតិភូ មានឋានៈស្មើនឹងរដ្ឋមន្ត្រី និងមានប្រាក់ខែជាកញ្ចប់ថវិកាជាតិនៅក្នុងទីស្ដីការគណៈរដ្ឋមន្ត្រី។ ទី៣-អំពីការដឹកនាំ “ឧត្តមក្រុមប្រឹក្សាពិគ្រោះនិងផ្ដល់យោបល់ ” អនុវត្តតាមលំដាប់លេខរៀងនៃសន្លឹកឆ្នោត ដោយការប្ដូរវេនគ្នាមួយខែម្តង។ ទី៤-ក្រុមប្រឹក្សាត្រូវមានលេខាធិការដ្ឋានជាជំនួយការ ដែលប្រើប្រាស់មន្ត្រីនៅក្នុងទីស្តីការគណរដ្ឋមន្ត្រី និងមន្ត្រីមកពីគណបក្សនីមួយៗដើម្បីធ្វើការងារនេះផងដែរ។ មន្ត្រីដែលមកពីគណបក្សនានាធ្វើការនៅក្នុងលេខាធិការដ្ឋាននេះនឹងត្រូវតែងតាំងដោយព្រះរាជក្រឹត្យដែលមានឋានៈស្មើនឹងអនុរដ្ឋលេខាធិការដើម្បីងាយស្រួលជាតំណែងនយោបាយដែលអាចទទួលបាននូវប្រាក់បៀវត្សរ៍និងប្រាក់បេសកកម្មផ្សេងៗផងដែរ។ ទី៥- កន្លែងប្រជុំរបស់ឧត្តមក្រុមប្រឹក្សានេះគឺយកនៅវិមានសន្តិភាព ហើយលេខាធិការរដ្ឋានក៏ស្ថិតនៅក្នុងវិមានសន្តិភាពនេះដែរ និងថវិកាចំណាយទាំងអស់របស់ឧត្តមក្រុមប្រឹក្សានេះគឺស្ថិតនៅក្រោមទីស្តីការគណៈរដ្ឋមន្ត្រី ។ទី៦-កិច្ចដំណើរការរបស់ក្រុមប្រឹក្សានេះគឺប្រជុំរៀងរាល់មួយខែម្ដង ដែលមានប្រធានប្តូរវេន ជាអ្នកកោះប្រជុំ។ ឧត្តមក្រុមប្រឹក្សានឹងជួបប្រជុំជាមួយសម្តេចតេជោ ហ៊ុន សែន នាយករដ្ឋមន្ត្រីរាល់ ៦ ខែម្ដង។ “ឧត្តមក្រុមប្រឹក្សាពិគ្រោះនិងផ្ដល់យោបល់ ”មានអាណត្តិស្មើនឹងអាណត្តិរបស់រាជ រដ្ឋាភិបាលនីតិកាលទី៦ ដែរ។
លោក ឈឹម ផលវរុណ បានបញ្ជាក់ថា ព្រះរាជក្រឹត្យនឹងពុំបាននិយាយទៅដល់ការកំណត់ទោសទណ្ឌចំពោះសមាជិកធ្វើខុសនោះទេ ។ យើងមានតែការលើកទឹកចិត្តដល់គណបក្សដែលមាននិន្នាការខុស ៗគ្នា ដែលបានចូលរួមអភិវឌ្ឍន៍និងកាត់បន្ថយភាពអសកម្ម ដូចជាការរំលោភទៅលើប្រជាពលរដ្ឋអំពើពុករលួយ។ គណបក្សទាំង ១៦ បានគាំទ្រនិងចូលរួមនៅក្នុងចំណុចខាងលើ លើកលែងតែគណបក្សលោក លន់ ឫទ្ធិ ដែលគាត់ត្រូវយកចំណុចនេះទៅពិភាក្សាជាមួយនឹងក្រុមប្រឹក្សារបស់គណបក្សគាត់សិន។
“ឧត្តមក្រុមប្រឹក្សាពិគ្រោះនិងផ្ដល់យោបល់ ” គឺជាយន្តការ ប្រជាធិបតេយ្យ ដែលបង្កើតឡើងដោយខ្មែរ ដោយស្របទៅនឹងបរិបទរបស់ជាតិខ្លួន។ ដូចនេះការបង្កើតយន្តការនេះ គឺជារសជាតិរបស់ប្រជាធិបតេយ្យរបស់កម្ពុជា ដែលស្របទៅនឹងស្ថានការណ៍របស់កម្ពុជា។ កាលពីសង្គមរាស្ត្រនិយមយើងមានយន្តការប្រមូលផ្ដុំ១ ស្រដៀងគ្នានេះដែរ។ តែយន្តការប្រជាធិបតេយ្យនៅពេលនេះ ខុសពីសង្គមរាស្ត្រនិយមដោយពេលនេះ ពុំបានរំលាយគណបក្សណាមួយឡើយ គឺគណបក្សទី១៦ គេនៅមានអត្តសញ្ញាណនិងសិទ្ធិរបស់ខ្លួនយ៉ាងពេញលេញក្នុងការសម្រេចអ្វីមួយ ហើយគេចូលរួមដោយមានគំនិតជាខ្មែរដោយមិនចំណុះឲ្យគំនិតបរទេស។
លោក ឈឹម ផលវរុណ លើកឡើងថា ដើម្បីសម្រួលដល់ការធ្វើកិច្ចការរបស់សមាជិកក្រុមប្រឹក្សាជាមួយចៅហ្វាយខេត្តនិងរដ្ឋមន្ត្រី សម្ដេចតេជោ ហ៊ុន សែន បានផ្តល់បន្ថែមនូវតួនាទីឲ្យប្រធានប្រតិភូនៃគណបក្សនីមួយៗមានតួនាទីបន្ថែមមួយទៀតជាទីប្រឹក្សារបស់រាជរដ្ឋាភិបាលដើម្បីងាយពួកគាត់ចេញចូលជួបជាមួយនឹងចៅហ្វាយខេត្ត និងរដ្ឋមន្ត្រីបាន ដើម្បីធានានូវប្រសិទ្ធភាពនៃ“ឧត្តមក្រុមប្រឹក្សាពិគ្រោះនិងផ្ដល់យោបល់ ”។
លោក ឈឹម ផលវរុណ បានបន្ថែមថា ស្ថាប័ន“ឧត្តមក្រុមប្រឹក្សាពិគ្រោះនិងផ្ដល់យោបល់ ” នេះអាចបង្កើតឡើងនៅពេលដែលព្រះរាជក្រឹត្យត្រូវធ្វើរួចរាល់ ដែលយើងត្រូវការពេលវេលាខ្លះដើម្បីតាក់តែងឲ្យស្របទៅរដ្ឋធម្មនុញ្ញ ។
នៅក្នុងឱកាសនោះ សម្ដេចតេជោនាយករដ្ឋមន្ត្រីក៏បានសន្យាថា ប្រសិនជាសម្តេចនៅតែធ្វើជានាយករដ្ឋមន្ត្រី “ឧត្តមក្រុមប្រឹក្សាពិគ្រោះនិងផ្ដល់យោបល់ ”ក៏នៅតែរក្សាទុករហូត។
ការសម្រេចនេះ ត្រូវបានគាំទ្រដោយគណបក្សដែលចូលរួមទាំងអស់ លើកលែងតែគណបក្សខ្មែរសាធារណរដ្ឋរបស់ លោក លន់ ឬទី្ធ ដែលបានស្នើសុំពេលវេលាក្នុងការប្រជុំពិភាក្សាជាមួយថ្នាក់ដឹកនាំគណបក្សសិន។
គួរបញ្ជាក់ថា គណបក្សនយោបាយ ដែលចូលរួមកិច្ចពិគ្រោះយោបល់ខាងលើនេះ រួមមានដូចជា៖១.គណបក្សខ្មែររួបរួមជាតិ, ២. គណបក្សពន្លឺថ្មី, ៣ . គណបក្សសញ្ជាតិកម្ពុជា,៤. គណបក្សខ្មែរក្រោក,៥.គណបក្សសំបុកឃ្មុំសង្គមប្រជាធិបតេយ្យ,៦.គណបក្សសាធារណរដ្ឋប្រជាធិបតេយ្យ,៧.គណបក្សសាធារណរដ្ឋខ្មែរ,៨.គណបក្សរស្មីខេមរា,៩. គណបក្សហ៊្វុនស៊ិនប៉ិច, ១០.គណបក្សខ្មែរអភិវឌ្ឍសេដ្ឋកិច្ច, ១១.គណបក្សយុវជនកម្ពុជា ,១២. គណបក្សធម្មាធិបតេយ្យ, ១៣ .គណបក្សឆន្ទៈខ្មែរ,១៤.គណបក្សជនជាតិដើមប្រជាធិបតេយ្យកម្ពុជា,១៥.គណបក្សខ្មែរតែមួយ និង ១៦.គណបក្ស ប្រជាជនកម្ពុជា។
គណបក្សដែលមិនចូលរួមមាន ១.គណបក្សមាតុភូមិយើង, ២.គណបក្សប្រជាធិបតេយ្យមូលដ្ឋាន, ៣.គណបក្សសម្ព័ន្ធដើម្បីប្រជាធិបតេយ្យ និងទី៤.គណបក្សខ្មែរឈប់ក្រ៕
Source: Kampuchea Thmey Daily
0 Comments