ក្លិប​មួយ​មកពី​លី​គ​លំដាប់​ទី​៣​នៅ​ប្រទេស​ជប៉ុន មក​ចែករំលែក​បទពិសោធន៍​ដល់​ក្រុមយុវជន​ថ្នាល​ក្លិប​ភ្នំពេញ​ក្រោ​ន

​ក្លិប​បាល់ទាត់​ភ្នំពេញ​ក្រោ​ន បានប្រកាស​ប្រាប់​អ្នកគាំទ្រ​របស់ខ្លួន​ថា​នឹង​ចាប់​ដៃគូ​ជា​ផ្លូវការ​ជាមួយ​ក្លិប​បាល់ទាត់​Giravanz Kitakyushu ដែល​កំពុង​លេង​នៅ​លី​គ​ទី​៣ របស់​ប្រទេស​ជប៉ុន (J3-League) ដើម្បី​រៀបចំ​វគ្គ​បណ្តុះបណ្តាល​ដល់​ក្រុម​ថ្នាល​យុវជន​អាយុ​ក្រោម ១៣​ឆ្នាំ​,​អាយុ​ក្រោម ១៤​ឆ្នាំ និង​ក្រុម​អាយុ​ក្រោម​១៥​ឆ្នាំ នៅ​កីឡដ្ឋាន​RSN (​ម្តុំ​កាំ​កូ​ស៊ី​ធី​) ក្នុង​រាជធានី​ភ្នំពេញ​។

ចំណែក​ពិធី​ចុះហត្ថលេខា​ក្នុងនាម​ដៃគូ​សហការ​ជា​ផ្លូវការ​រវាង​ក្លិប​បាល់ទាត់​ភ្នំពេញ​ក្រោ​ន និង​ក្លិប​Giravanz Kitakyushu នឹង​ប្រព្រឹត្តិ​ទៅ​នៅ​ថ្ងៃ​សៅរ៍​ទី​១៨ ខែសីហា ឆ្នាំ​២០១៨ វេលា​ម៉ោង ៥:០០​នាទី​ល្ងាច​។ ចំណែក​កម្ម​វិធី​ចែករំលែក​បទពិសោធន៍​នេះ​នឹងត្រូវ​ធ្វើឡើង​រយៈពេល​បី​ថ្ងៃ​នៅ​កីឡដ្ឋាន RSN ដែល​នឹង​ចាប់ផ្តើម​ពីថ្ងៃ​ទី​១៦ រហូតដល់​ថ្ងៃទី​១៨ ខែសីហា ឆ្នាំ​២០១៨​។

ចំណែក​កាលវិភាគ​មានដូចជា នៅ​ថ្ងៃទី​១៦ ខែសីហា វេលា​ម៉ោង​៣និង០០​នាទី​រសៀល​មាន​វគ្គ​ធ្វើ​ការ​សិក្សា​ក្នុង​ថ្នាក់ និង​នៅ​ម៉ោង ៥និង៣០​នាទី​ល្ងាច មានការ​ហ្វឹកហាត់​លើ​ទីលាន​។ នៅ​ថ្ងៃទី​១៧ ខែសីហា វេលា​ម៉ោង​៥និង៣០​នាទី​រសៀល នឹងមាន​ការហ្វឹកហាត់​លើ​ទីលាន​និង​ចុងក្រោយ​នៅ​ថ្ងៃទី​១៨ វេលា​ម៉ោង ១០និង០០​នាទី​ព្រឹក មានការ​ហ្វឹកហាត់​លើ​ទីលាន ខណៈដែល​នៅ​ម៉ោង​៤និង០០​នាទី ល្ងាច​មានការ​ប្រកួត​មិត្តភាព​រវាង​ក្រុមយុវជន​អាយុ​ក្រោម​១៥​ឆ្នាំ នៃ​ក្លឹប​បាល់ទាត់​ភ្នំពេញ​ក្រោ​ន និង​ក្រុម GFA របស់​ប្រទេស​សិង្ហ​បុរី​។



ក្លិប​បាល់ទាត់ Giravanz Kitakyushu មាន​មូលដ្ឋាន​នៅ​ទីក្រុង Kitakyushu នៃ​ប្រទេស​ជប៉ុន និង​ជាទី​ក្រុង​ដែល​មាន​ចំណងមិត្តភាព​ជាមួយ​រាជធានី​ភ្នំពេញ ហើយ​ចំពោះ​គោលបំណង​នៃ​ការ​ចាប់​ដៃគូ​គ្នា​នេះ​គឺ​ដើម្បី​បង្កើត​កម្មវិធី​ផ្លាស់ប្តូរ​បទពិសោធន៍​គ្នា​ដើម្បី​អភិវឌ្ឍន៍​ក្រុម​ឈុត​ធំ​នៃ​ក្រុម​ទាំងពីរ ក៏ដូចជា​បង្កើត​កម្មវិធី​ផ្លាស់ប្តូរ​បទពិសោធន៍​គ្នា​ ទាំង​ក្រុម​យុវជន​ថ្នាល ក្រុម​សហគមន៍ និង​ក្រុម​គ្រូបង្វឹក ព្រមទាំង​ដើម្បី​សហការ​គ្នា​ទៅវិញទៅមក​រួមទាំង​ការលើកកម្ពស់ និង​ពង្រីក​ការផ្លាស់ប្តូរ​វប្បធម៌​សេដ្ឋកិច្ច​សម្រាប់​ទីក្រុង​ទាំងពីរ​ដោយ​ក្លឹប GIRAVANZ KITAKYUSHU តំណាង​ឲ្យ​ទីក្រុង Kitakyushu និង​ក្លិបភ្នំពេញក្រោន​ តំណាង​ឲ្យ​ទីក្រុង​រាជធានីភ្នំពេញ ផ្ទាល់តែម្តង៕

  

Source: Kampuchea Thmey Daily