នាយករដ្ឋមន្ត្រីថៃលោក ប្រាយុទ្ធ ចាន់អូចា បាននិយាយកាលពីថ្ងៃអង្គារថា ប្រទេសថៃបានស្នើឲ្យចក្រភពអង់គ្លេសធ្វើបត្យាប័នអតីតនាយករដ្ឋមន្ត្រីលោកស្រី យីងឡាក់ ស៊ីណាវ៉ាត្រា ដែលត្រូវបានផ្តួលរំលំនៅក្នុងរដ្ឋប្រហារមួយកាលពីឆ្នាំ២០១៤ហើយត្រូវបានកាត់ទោសដោយកំបាំងមុខឲ្យជាប់ពន្ធនាគារពីបទធ្វេសប្រហែស។
លោកស្រី យីងឡាក់ បានភៀសខ្លួនចេញពីប្រទេសកាលពីខែសីហាឆ្នាំមុនដើម្បីគេចពីការជាប់ពន្ធនាគារលើគម្រោងឧបត្ថម្ភធនស្រូវអង្កដែលបង្កការខាតបង់ទឹកប្រាក់រាប់ពាន់លានដុល្លារ។ ទោះបីជាយ៉ាងណាក៏ដោយ លោកស្រីបានបដិសេធការធ្វើខុសហើយនិយាយថា ការកាត់ទោសនោះគឺជាការជំរុញផ្នែកនយោបាយ។
វីដេអូមួយដែលបង្ហោះលើ Instagram កាលពីថ្ងៃសៅរ៍បានបង្ហាញថា លោកស្រីយីងឡាក់និយាយថា លោកស្រីកំពុងរស់នៅក្នុងសង្កាត់ Covent Garden នៃតំបន់ West End ក្នុងទីក្រុងឡុងដ៍។
តុលាការកំពូលបានផ្តន្ទាទោសលោកស្រីដោយកំបាំងមុខឲ្យជាប់ពន្ធនាគាររយៈពេល៥ឆ្នាំកាលពីខែកញ្ញាឆ្នាំមុន។
លោកប្រាយុទ្ធបាននិយាយថា សំណើនេះគឺជានីតិវិធីចាំបាច់រវាងប្រទេសទាំងពីរដែលមានសន្ធិសញ្ញាបត្យាប័នដែលបានចុះហត្ថលេខានៅក្នុងឆ្នាំ១៩១១។
លោកប្រាយុទ្ធបានថ្លែងថា “យើងមិនអាចទៅចាប់ខ្លួនមនុស្សនៅបរទេសបានទេដូច្នេះវាអាស្រ័យលើប្រទេសនោះដើម្បីចាប់ខ្លួននិងបញ្ជូនលោកស្រីមកឲ្យពួកយើង”។
គួរបញ្ជាក់ថា លោកស្រីយីងឡាក់និងបងប្រុសរបស់លោកស្រីគឺអតីតនាយករដ្ឋមន្ត្រីលោកថាក់ស៊ីនស៊ីណាវ៉ាត្រាគឺជាបុគ្គលសំខាន់នៃការតស៊ូអំណាចដែលបានគ្របដណ្តប់នយោបាយរបស់ប្រទេសថៃអស់រយៈពេលជាងមួយទសវត្ស។
ទោះបីជាយ៉ាងណាក៏ដោយ វាមិនច្បាស់ភ្លាមៗទេថាតើហេតុអ្វីបានជារដ្ឋាភិបាលរង់ចាំរហូតមកដល់ពេលនេះទើបស្វែងរកការធ្វើបត្យាប័នរបស់លោកស្រីយីងឡាក់ឬថាតើប្រទេសអង់គ្លេសនឹងឆ្លើយតបមកវិញយ៉ាងណា៕ REUTERS
Source: Kampuchea Thmey Daily
0 Comments