ភ្នំពេញ ៖ នៅព្រឹកថ្ងៃទី១ ខែសីហានេះ ភ្នាក់ងារកម្ពុជាថ្មី បាននាំយកថវិកាពីសប្បុរសជននៅច្បារអំពៅផ្តល់ក្រុមគ្រួសារក្មេងប្រុសអាយុ៨ឆ្នាំដែលបានរងរបួសដោយសាររថយន្តសណ្តោងកុងតឺន័រកិនបណ្តាលឲ្យដាច់ជើងម្ខាងត្រឹមភ្លៅនិងម្រាមដៃ៣ទៀត។
ដោយសារតែសប្បុរសជនលោកបានមើលឃើញនិងស្តាប់សំដីក្មេងប្រុសឈ្មោះវណ្ណា ចាន់វោសិទ្ធអាយុ៨ឆ្នាំបាននិយាយសួរទៅឪពុក ខណៈដែលក្មេងប្រុសកំពុងតែធ្វើការសង្គ្រោះនៅមន្ទីរពេទ្យជោរៃប្រទេសវៀតណាមក្នុងក្តីរន្ធត់ថា ប៉ាៗតើពេលណាទៅទើបគ្រូពេទ្យយកជើងម្ខាងនិងម្រាមដៃមកដាក់ឲ្យខ្ញុំវិញ ព្រោះខ្ញុំត្រូវការដើរពិសេសខ្ញុំត្រូវចូលរួមប្រកួតបាល់ទាត់ប្រចាំសាលាផង។
យោងតាមការរៀបរាប់របស់លោកឈុន វណ្ណា អាយុ៤២ឆ្នាំបច្ចុប្បន្នរស់នៅភូមិស្រះកែវ ឃុំវិហារលួង ស្រុកពញាឮ ខេត្តកណ្តាល ដែលត្រូវជាឪពុកបង្កើតក្មេងប្រុសរងគ្រោះបានឲ្យដឹងថា កូនប្រុសរបស់លោក ត្រូវរថយន្តសណ្តោងកុងតឺន័រ បានបើកទៅបុកកូនប្រុសរបស់លោក ខណៈដែលកូនប្រុសលោកបានចេញពីរៀន ក្នុងសាលាបឋមសិក្សាសម្តេចព្រះរាជអគ្គមហេសីនរោត្តមមុនីនាថសីហនុ ដែលស្ថិតនៅតាមបណ្តោយផ្លូវជាតិលេខ៥ ក្បែរផ្ទះក្មេងប្រុសរងគ្រោះតែម្តង។
លោកបន្តថា ហេតុការណ៍បានកើតឡើងនៅថ្ងៃទី១៣ ខែកក្កដា ឆ្នាំ២០១៨ ខណៈពេលដែលកូនរបស់គាត់ពាក់មួកគណបក្សប្រជាជនកម្ពុជាទៀតផង។ ក្នុងពេលកើតហេតុ ថ្វីត្បិតតែក្មេងប្រុសវណ្ណា ចាន់វិសិទ្ធ ស្ថិតនៅក្រោមកង់រថយន្ត ដែលកៀបគេជាប់ក៏ដោយ ក៏គេស្រវាយកមួកគណបក្សប្រជាជនកម្ពុជាមកពាក់ដើម្បីបង្ហាញពីភាពស្រឡាញ់គណបក្សប្រជាជនកម្ពុជា ហើយចំថ្ងៃដែលក្បួនគណបក្សប្រជាជនកម្ពុជាបានដង្ហែក្បួនដល់ចំណុច ដែលក្មេងប្រុសវិសិទ្ធកំពុងជួបគ្រោះថ្នាក់ទៀតផង។
ឪពុកក្មេងប្រុសបានបញ្ជាក់ទាំងសំឡេងក្តុកក្តួលថា មកដល់ថ្ងៃនេះកូនរបស់របស់ត្រូវបានគ្រូពេទ្យធ្វើការវះកាត់ចំនួន៣ដង ដែលលើកចុងក្រោយគ្រូពេទ្យបានសម្រេចចិត្តកាត់ជើងឆ្វេងវិសិទ្ធដល់គល់ភ្លៅ និងកាត់ម្រាមដៃអស់៣ទៀតផង។ លោកបន្តថាកាលពីគ្រោះថ្នាក់ភ្លាមៗក្រុមគ្រួសាររបស់លោកបានបញ្ជូនវិសិទ្ធទៅធ្វើការសង្គ្រោះនៅមន្ទីរពេទ្យគុន្ធបុប្ផានៅក្រុងភ្នំពេញ ប៉ុន្តែលោកបានសោកស្តាយនៅពេលទៅដល់មន្ទីរពេទ្យគ្រូពេទ្យហាក់មិនសូវយកចិត្តទុកដាក់ទុកឲ្យមេរោគរាលដាលដល់រូបរាងកាយក្មេងប្រុសវិសិទ្ធ ហើយអាការៈរោគកាន់តែធ្ងន់ធ្ងរ ទើបក្រុមគ្រួសារចិត្តដឹកយកទៅធ្វើការសង្គ្រោះនៅមន្ទីរពេទ្យវៀតណាម ដែលទីបំផុតគ្រូពេទ្យបានសម្រេចចិត្តកាត់ជើងឆ្វេងដល់គល់ភ្លៅ និងកាត់ម្រាមដៃអស់៣ទៀតផង។
ឪពុកបង្កើតក្មេងប្រុសរងគ្រោះបានសំដែងការអរគុណដល់សប្បុរសជនជាច្រើនទាំងក្នុងនិងក្រៅប្រទេសពិសេសថ្នាក់ដឹកនាំគណបក្សប្រជាជនកម្ពុជាលោកបានផ្តល់ថវិកាជួយដល់ក្មេងប្រុសវិសិទ្ធរហូតបានទៅព្យាបាលនៅប្រទេសវៀតណាម ហើយមកដល់ថ្ងៃនេះកូនប្រុសរបស់លោកនៅរស់រានមានជីវិត ប៉ុន្តែត្រូវក្លាយទៅជាជនពិការអស់មួយជីវិត៕
Source: Kampuchea Thmey Daily
0 Comments