គណៈកម្មការវិន័យរបស់សហព័ន្ធកីឡាបាល់ទាត់កម្ពុជា បានចេញលិខិតមោឃលិខិតចាស់របស់ខ្លួនចេញពីថ្ងៃទី២៦ ខែកក្កដា ឆ្នាំ២០១៨ ដែលចេញពិន័យលោក ហៅ សុជាតិ គ្រូបង្វឹករបស់ក្រុមបឹងកេត មិនឲ្យចូលរួមដឹកនាំការប្រកួតក្នុងព្រឹត្តិការណ៍បាល់ទាត់នានាដែលរៀបចំដោយសហព័ន្ធកីឡាបាល់ទាត់កម្ពុជា រយៈពេលមួយខែ និងពិន័យជាប្រាក់៥សែនរៀល ពីបទប្រើឥរិយាបថមិនសមរម្យដាក់មន្ត្រីប្រកួត ដោយរុញព្រមទាំងប្រើសម្ដីមិនសមរម្យ។
ចំណែកលិខិតថ្មីលើកទី២ របស់គណៈកម្មការវិន័យដែលចេញនៅថ្ងៃពុធ ទី០១ សីហា សប្ដាហ៍នេះ បានកែតម្រូវថា ការពិន័យគ្រូបង្គោលក្លិបបឹងកេត លោក ហៅ សុជាតិ មានសុពលភាពតែនៅក្នុងការប្រកួតពានរង្វាន់លីគកំពូលកម្ពុជា Metfone Cambodian League ប៉ុណ្ណោះ។ ការពិន័យនេះត្រូវអនុវត្តរយៈពេលមួយខែ និង ត្រូវបង់ប្រាក់៥០ម៉ឺនរៀល ហើយមានពេល៥ថ្ងៃដើម្បីប្ដឹងឧទ្ធរណ៍។
ក្រោយទទួលពិន័យតាមរយៈលិខិតដំបូង លោក ហៅ សុជាតិ បានបានទទួលស្គាល់ថា ខ្លួនពិតជាខុសមែនដែលរុញមន្ត្រីទី៤។ លោកបន្តថា «ពេលនោះខ្ញុំបានមន្ត្រីទី៤ដើរមកសម្របសម្រួលខាងខ្ញុំ បន្ទាប់ពីកីឡាករលេខ៣របស់សូលទីឡូ ទាតសាត រ៉ូហ្ស៊ីប ពីក្រោយ ហើយកីឡាករលេខ៣នោះកាលពីជើងទី១ក៏បានទាត់ពីក្រោយឲ្យ Paul Omogba របួសដែរ។ ពេលមន្ត្រីទី៤ដើរចូលមកក្បែរកន្លែងខាងក្រុមបឹងកេត អង្គុយ ខ្ញុំបានយកដៃរុញគាត់ហើយនិយាយថា ជួយមើលផង រួចមន្ត្រីទី៤បានប្រាប់ទៅអាជ្ញាកណ្ដាល ហើយអាជ្ញាកណ្ដាលមកបណ្ដេញខ្ញុំទៅខាងលើ។ ខ្ញុំមិនបានប្រតិកម្មអ្វីបន្ថែមទេ ខ្ញុំនៅស្ងៀមនិងដើរចេញតាមការបញ្ជាហើយក៏មិននិយាយអ្វីដែរ។ ខ្ញុំមិនមែនចង់គេចពីកំហុសទេ តែការពិន័យហាក់ធ្ងន់លើសពីកំហុសរបស់ខ្ញុំ»។
លោក បែ មករា អ្នកចាត់ការទូទៅរបស់ក្រុមធ្លាប់បានលើកឡើងថា «ពួកយើងទទួលស្គាល់ថា គ្រូរបស់យើងបានរុញមន្ត្រីទី៤មែន ក្រោយកីឡាករសូលទីឡូអង្គរទាត់ជើង សាត រ៉ូហ្ស៊ីប ពីក្រោយ ដោយសារតែគាត់ទ្រាំមិនបានចំពោះការសម្រេចចិត្តរបស់អាជ្ញាកណ្ដាលលើទីលានជាច្រើនលើក ប៉ុន្តែគាត់មិនបានជេរប្រមាថទេ។ គាត់គ្រាន់តែប្រាប់ឲ្យមន្ត្រីទី៤មើលហើយជួយប្រាប់អាជ្ញាកណ្ដាលផង។ ចំពោះការពិន័យលើកមុនដែលមិនឲ្យគាត់ដឹកនាំទាំងពានរង្វាន់សម្តេចតេជោ និងលីគ គឺយើងមិនសុខចិត្តទេ»។
សូមបញ្ជាក់ថា ក្នុងប្រកួតបរាជ័យលើកដំបូងរបស់បឹងកេត ពេលចាញ់ក្រសួងការពារជាតិ ២ទល់០ នៅថ្ងៃសុក្រ សប្ដាហ៍មុនក្នុងពានរង្វាន់លីគកំពូលកម្ពុជា គឺមិនមានវត្តមានរបស់លោក ហៅ សុជាតិ នៅលើទីលាននោះទេ ដោយលោក លី វ៉ាវី ដែលជាគ្រូជំនួយដើរតួរធ្វើជាគ្រូបង្វឹកជំនួសវិញ៕
Source: Kampuchea Thmey Daily
0 Comments