បាត់ដំបង ៖ ស្ត្រីម្នាក់ដែលជាមុខសញ្ញាគាស់ទម្លុះទម្លាយដ៏សកម្ម ត្រូវបានម្ចាស់ផ្ទះទាន់ ពេលចូលធ្វើសកម្មភាពបម្រុងលួចយកទ្រព្យសម្បត្តិក្នុងផ្ទះ និងធ្វើការចាប់ខ្លួនប្រគល់ទៅអោយសមត្ថកិច្ច ខណៈដែលម្ចាស់ផ្ទះរវល់ចេញទៅលក់អីវ៉ាន់នៅខាងមុខផ្ទះមួយភ្លែត ត្រូវជនសង្ស័យរូបនេះគាស់បង្អួចចូលតាមចម្រឹងដែកតែម្តង។
ករណីគាស់ផ្ទះនេះដែរ គឺបានកើតឡើងនៅវេលាម៉ោង១០និង៣០នាទីព្រឹក ថ្ងៃទី៣១ ខែកក្កដា ឆ្នាំ២០១៨ ត្រង់ចំណុចភូមិសំណាញ់ ឃុំភ្នំសំពៅ ស្រុកបាណន់ ខេត្តបាត់ដំបង ដែលលំនៅឋាននេះរបស់ឈ្មោះភួង សារ៉ង ភេទស្រី អាយុ៥៣ឆ្នាំ មានមុខរបរលក់ដូរ ចំណែកជនសង្ស័យមានឈ្មោះ ភិន សុភឿន ភេទស្រី អាយុ៣៥ឆ្នាំ រស់នៅភូមិបាឡាត់ ឃុំនរា ស្រុកសង្កែ ខេត្តបាត់ដំបង។
គួរបញ្ជាក់ដែរថា កាលពីថ្ងៃទី១៩ ខែមីនា ឆ្នាំ២០១៨ វេលាម៉ោង១០និង៥០នាទីព្រឹក ស្ត្រី ដែលជាជនសង្ស័យ បានធ្វើសកម្មភាព ដោយយកឈើជ្រុងទៅគាស់ចម្រឹងបង្អួចរបស់ប្រជាពលរដ្ឋម្តងរួចមកហើយ នៅត្រង់ចំណុចក្រុមទី៤ ភូមិប្រិយ៍ចាស់ សង្កាត់ទឹកវិល ក្រុងសៀមរាប ដោយជនរងគ្រោះឈ្មោះ វ៉ាន់ ចាន់ថន ភេទប្រុស អាយុ ៤៦ ឆ្នាំ មុខរបរ គ្រូ បង្រៀន គឺបានចូលទៅក្នុងផ្ទះបម្រុងលួចទ្រព្យសម្បត្តិ តែត្រូវម្ចាស់ផ្ទះមកទាន់ហើយរាយការណ៍ ទៅសមត្ថកិច្ចប៉ុស្តិ៍យកទៅមកសាកសួរ ហើយក៏បានបញ្ជូនទៅកាន់តុលាការ ផងដែរ។
លុះនៅពេលកើតហេតុខាងលើ ស្រាប់តែលេចមុខស្ត្រីរូបនេះមកធ្វើសកម្មភាពចាស់ដដែល ដោយត្រូវបានម្ចាស់មកទាន់ដូចគ្នា ដោយពេលនេះសមត្ថកិច្ច នៃអធិការដ្ឋាន នគរបាលស្រុកបាណន់ កំពុងចាត់វិធានការតាមផ្លូវច្បាប់ ដើម្បីរុញទៅតុលាការម្តងទៀត៕
Source: Kampuchea Thmey Daily
0 Comments