ឃីម បូរ៉ា អ្នកប្រដាល់ក្លិបរស្មភូមិគាបខេត្តបន្ទាយមានជ័យ និង ផុន ផាន់ណា អ្នកប្រដាល់ក្លិបខ្លារខិនមានរិទ្ធ ពួកគេទាំងពីរនាក់នេះ ត្រូវគេផ្គូអោយជួបប្រកួតជាមួយអ្នកប្រដាល់ថៃនិងបារាំងនៅលើសង្វៀនGanzberg របស់SEA-TV នាយប់ថ្ងៃសៅរ៍ទី០៤ ខែសីហា ឆ្នាំ២០១៨នេះ។
ឃីម បូរ៉ា អ្នកប្រដាល់ជើងខ្លាំង នឹងត្រូវគេផ្គូឲ្យជួបជាមួយអ្នកប្រដាល់ជើងខ្លាំងមកពីប្រទេសថៃឈ្មោះSoun Tepheap ។ នេះជាគូប្រកួតដ៍អស្ចារ្យមួយ ព្រោះថា គេទាំងពីរនាក់នេះ សុទ្ធតែវាយខ្លាំងដូចគ្នា។
Soun Tepheap ជាមានខ្សែក្រវាត់បីឯណោះ ។ គេធ្លាប់មកប្រកួតនៅកម្ពុជាច្រើនលើកហើយកន្លងមក ។ក្នុងនោះ Soun Tepheap ធ្លាប់វាយឈ្នះមាស ច័ន្ទមានដោយពិន្ទុ ឈ្នះស៊ឹម វណ្ណដេត ក្នុងទឹកទី៤ ឈ្នះគង់ សំបូរក្នុងទឹកទី៤ ចាញ់សូត្រ ប៊ុនធីដោយពិន្ទុ ឈ្នះយ៉េន ឌីណា ដោយពិន្ទុ និងចុងក្រោយគេជួបជាមួយចាន់ សំអាត តែមិនប្រកាសលទ្ធផល ។
ដូច្នេះគេជឿថា ការជួបគ្នារវាងឃីម បូរ៉ា និង Soun Tepheap អ្នកប្រដាល់ទាំងពីរ សុទ្ធតែចង់ផ្តួលគ្នាទៅវិញទៅមក ។
ឃីម បូរ៉ា ជើងខ្លាំងរបស់កម្ពុជានេះ គេទើបតែផ្តួលយកឈ្នះអ្នកប្រដាល់ថៃឈ្មោះ Phat Chhayak Phum ក្នុងទឹកទី២ កាលពីថ្ងៃទី០២មិថុនា២០១៨កន្លងមកនេះ ។
Soun Tepheap ដែលជាគូរបស់ឃីម បូរ៉ានេះ ជាជើងខ្លាំងទម្ងន់៦០គីឡូក្រាមប្រចាំនៅស្រុកថៃ។ មកប្រកួតលើកចុងក្រោយរបស់ Soun Tepheap គឺគេជួបចាន់ សំអាត ក្លិបអន្លង់វែង តែមិនប្រកាសលទ្ធផល ។ ឆ្លងកាត់ការប្រកួត៨៨លើក Soun Tepheap វាយឈ្នះ៧៥លើក ចាញ់១២លើក និងស្មើ០១លើក។
ឃីម បូរ៉ា គេមានប្រវត្តិប្រកួតចំនួន១០៧លើក ឈ្នះ៧៨លើក និងចាញ់២៧លើក និងស្មើ០២លើក ។ បូរ៉ា គេមានថ្វីកែងនិងជង្គង់ល្អណាស់ តែយ៉ាងណាការឈ្នះចាញ់រវាងឃីម បូរ៉ា និង Soun Tepheap នេះ ពុំមាននរណាហ៊ានទាយមុនថាអ្នកណាឈ្នះនោះទេ ? ។
ចំពោះ ផុន ផាន់ណា អតីតអ្នកប្រដាល់ជើងខ្លាំងកម្ពុជានៃក្លិបខ្លារខិនមានរិទ្ធ នឹងត្រូវឡើងប្រកួតសាកកណ្តាប់ដៃជាមួយអ្នកប្រដាល់ជនជាតិបារាំងឈ្មោះNaser ដោយប្រកួតគ្នាក្នុងប្រភេទទម្ងន់៧១ គីឡូក្រាម។
ផុនផាន់ណា អតីតជើងខ្លាំងរបស់កម្ពុជានេះ គេប្រកួតលើកចុងក្រោយនេះ វាយចាញ់អ្នកប្រដាល់បារាំងJulienដោយពិន្ទុ នាចុងខែកុម្ភះឆ្នាំ២០១៨កន្លងមកនោះ ។
កាលពី៤ឆ្នាំមុន ផាន់ណា គេជាអ្នកប្រដាល់ជើងខ្លាំងរបស់កម្ពុជាយើង គេមានប្រវត្តិប្រកួត៩៣លើក ឈ្នះ៦៨លើក ចាញ់២២លើក និងស្មើ០៣លើក ហើយធ្លាប់ផ្តួលអ្នកប្រដាល់បរទេសអស់ច្រើននាក់មកហើយ។
ផាន់ណា និងNaser អ្នកប្រដាល់បារាំងនេះ គឺអាចស៊ីសងគ្នាបាន ព្រោះផាន់ណាគេមានបទពិសោធន៍ច្រើនក្នុងការប្រកួត ហើយគេក៏មានកលល្បិចសំរាប់ទប់ទល់ជាមួយអ្នកប្រដាល់បារាំងនេះដែរ។
Naser ធ្លាប់មកប្រកួតម្តងពីរដងហើយនៅកម្ពុជា ដែលការមកប្រកួតលើកចុងក្រោយរបស់គេនោះ គឺវាយស្មើជាមួយហេងវិឆ័យ កាលពីថ្ងៃទី១៤កក្កដា២០១៨កន្លងមកនេះ ។ អ្នកប្រដាល់បារាំងរូបនេះ មានប្រវត្តិប្រកួតចំនួន២៩លើក ឈ្នះ១៧លើក ចាញ់១១លើក និងស្មើ០១លើក ។
ទោះជាយ៉ាងណា សំរាប់ការជួបគ្នារវាងអ្នកប្រដាល់បារាំងNaser និង ផុន ផាន់ណានេះ គឺមិនអាចទស្សន៍ទាយមុនថា នរណាជាអ្នកឈ្នះនោះទេ។ ចាំមើលផុនផាន់ណា អាចយកឈ្នះNaser បានឬអត់?៕
Source: Kampuchea Thmey Daily
0 Comments