សហរដ្ឋអាមេរិក នឹងជំរុញឲ្យសហគមន៍អន្តរជាតិ បន្តសម្ពាធដាក់ទណ្ឌកម្មប្រឆាំងនឹង ប្រទេសកូរ៉េខាងជើងក្នុងវេទិកាសន្តិសុខមួយនៅប្រទេសសិង្ហបុរីនាសប្តាហ៍នេះ ខណៈដែលមានក្តីព្រួយបារម្ភកាន់តែខ្លាំងថា ក្រុងព្យុងយ៉ាងបានបង្ហាញភាពរីកចម្រើនតិចតួចណាស់ឆ្ពោះទៅរកការលុបបំបាត់អាវុធនុយក្លេអ៊ែរ។
រដ្ឋមន្ត្រីការបរទេសលោក Mike Pompeo និងសមភាគីកូរ៉េខាងជើងរបស់គាត់នឹងចូលរួមការជួបជុំនេះនៅប្រទេសសិង្ហបុរីដែលជាកន្លែងប្រធានាធិបតីសហរដ្ឋអាមេរិកលោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន បានរៀបចំកិច្ចប្រជុំកំពូលជាប្រវត្តិសាស្ត្ររបស់ពួកគេកាលពីពីរខែមុន។
លោក Pompeo និងអ្នកការទូតជាន់ខ្ពស់មកពីបណ្តាប្រទេសដទៃទៀតដែលជាប់ពាក់ព័ន្ធក្នុងការព្យាយាមកាត់បន្ថយមហិច្ឆតានុយក្លេអ៊ែររបស់ក្រុងព្យុងយ៉ាងគឺនឹងពិនិត្យមើលថាតើប្រទេសកូរ៉េខាងជើងបានចាត់វិធានការជាក់ស្តែងដើម្បីបោះបង់អាវុធនុយក្លេអ៊ែររបស់ខ្លួនដែរឬទេ។
នៅឯកិច្ចពិភាក្សាជាប្រវត្តិសាស្ត្រជាមួយលោកត្រាំកាលពីខែមិថុនា លោកគីមបានចុះហត្ថលេខាលើការប្តេជ្ញាចិត្តមិនច្បាស់មួយចំពោះ “ការរំសាយអាវុធនុយក្លេអ៊ែរចេញពីឧបទ្វីបកូរ៉េ”។
ខណៈពេលដែលមានសញ្ញាតិចតូចនៃការរីកចម្រើននោះ របាយការណ៍ព័ត៌មានបានបង្ហាញថា ទីក្រុងព្យុងយ៉ាងកំពុងបន្តផលិតរ៉ុក្កែតហើយមានការព្រួយបារម្ភកាន់តែខ្លាំងឡើងថា ការអនុវត្តន៍ទណ្ឌកម្មរបស់អង្គការសហប្រជាជាតិដែលដាក់លើប្រទេសកូរ៉េខាងជើងគឺត្រូវបានបន្ធូរបន្ថយដោយរដ្ឋជាសមាជិកមួយចំនួន។
មន្ត្រីអាមេរិកម្នាក់បាននិយាយថា ក្រុងវ៉ាស៊ីនតោនមានក្តីព្រួយបារម្ភដោយសារការរំលោភបំពានរបស់កូរ៉េខាងជើងលើការដាក់ទណ្ឌកម្មរបស់អង្គការសហប្រជាជាតិដែលរួមមានទាំងការដឹកជញ្ជូនប្រេងដោយខុសច្បាប់តាមសមុទ្រផងដែរ។
មន្ត្រីរូបនេះបាននិយាយថា ការប្រមូលផ្តុំដូចជាវេទិកាតំបន់អាស៊ាននៅថ្ងៃសៅរ៍នេះគឺជាឱកាសមួយដើម្បីរំលឹកដល់ប្រទេសទាំងអស់អំពីកាតព្វកិច្ចរបស់ពួកគេក្នុងការប្រកាន់ខ្ជាប់នូវសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
វេទិកាប្រចាំឆ្នាំដែលរៀបចំដោយសមាគមប្រជាជាតិអាស៊ីអាគ្នេយ៍ (អាស៊ាន) មួយនេះគឺបានប្រមូលផ្តុំអ្នកការទូតកំពូលៗមកពីប្រទេសចំនួន២៦និងសហភាពអឺរ៉ុបសម្រាប់កិច្ចពិភាក្សាអំពីបញ្ហានយោបាយនិងសន្តិសុខនៅក្នុងតំបន់អាស៊ី - ប៉ាស៊ីហ្វិក៕ AFP
Source: Kampuchea Thmey Daily
0 Comments