ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា បានអះអាងថា រហូតមកដល់ពេលនេះ មានពាក្យបណ្ដឹង២៥២៥បណ្ដឹង ដែលភាគច្រើនជាបណ្ដឹងរបស់គណបក្សសម្ព័ន្ធដើម្បីប្រជាធិបតេយ្យ (LDP) ទាក់ទងទៅរឿងគំនូសសញ្ញាគាំទ្រគណបក្ស ហើយក្នុងនោះ គណៈកម្មការបោះឆ្នោតថ្នាក់ឃុំ សង្កាត់ បានដោះស្រាយខ្លះហើយ ប៉ុន្តែLDP មិនទទួលយក ហើយប្តឹងបន្ត។
លោកហង្ស ពុទ្ធា បានថ្លែងប្រាប់កម្ពុជាថ្មី កាលពីរសៀលថ្ងៃទី០១ ខែសីហា យ៉ាងនេះថា “ឥឡូវមកដល់ពេលនេះ មាន២៥២៥បណ្ដឹងហើយ ក្នុងនោះគ្រាន់តែបណ្ដឹងរបស់គណបក្សសម្ព័ន្ធដើម្បីប្រជាធិបតេយ្យ (LDP) មានចំនួន២៤៩១បណ្ដឹង ហើយបណ្ដឹងនេះទាក់ទងទៅរឿងដដែល គឺគាត់មិនទទួលយកការរាប់សន្លឹកឆ្នោត ដែលមានសញ្ញាផ្សេងក្រៅពីគូសធីក (✔) ហើយបណ្ដឹងនេះដូចគ្នាទាំងអស់ ក្នុងមួយខេត្តៗ មានរាប់រយបណ្ដឹង ហើយបណ្ដឹងផ្សេងៗមានតែចំនួន៣៤ប៉ុណ្ណោះ”។
ឆ្លើយតបសំណួរថា មានគណបក្សណាខ្លះបានដាក់ពាក្យបណ្តឹងដែរ ? លោក ហង្ស ពុទ្ធា អះអាងថា “ពេលនេះខ្ញុំទទួលតែរបាយការណ៍ មិនទាន់ដឹងច្បាស់ថា មានគណបក្សណាប្តឹងខ្លះទេ ដោយមានតែចំនួនតួរលេខប៉ុណ្ណោះ ហើយស្ថិតនៅក្នុងចំណាត់ការថ្នាក់ឃុំ សង្កាត់”។ ទាក់ទងបណ្ដឹងទាំងអស់នេះ លោក លោក ហង្ស ពុទ្ធា បានអះអាងថា នៅថ្នាក់ឃុំ សង្កាត់ បានដោះស្រាយចំនួន១៥៩បណ្ដឹងហើយ ប៉ុន្តែអ្នកប្ដឹងមិនសុខចិត្ត និងបានប្ដឹងបន្តមកថ្នាក់ខេត្តទៀត តែមិនបណ្តឹងនេះ មិនទាន់ឡើងមកដល់ គ.ជ.ប នៅឡើយទេ។
តាមលោក ហង្ស ពុទ្ធា ការប្រកាសលទ្ធផលមាន៤ដំណាក់កាល គឺនៅពេលរាប់សន្លឹកឆ្នោតតាមការិយាល័យ គឺបានបិទផ្សាយភ្លាមៗ នៅនឹងកន្លែង ហៅថា លទ្ធផលបឋម ហើយលទ្ធផលបណ្ដោះអាសន្ន នឹងប្រកាសនៅថ្ងៃទី១១ ខែសីហា ខាងមុខ ហើយបើគ្មានបណ្ដឹងទេ នៅថ្ងៃទី១៥ ខែសីហា គ.ជ.ប នឹងប្រកាសលទ្ធផលផ្លូវការតែម្ដង គឺ គ.ជ.ប នឹងរៀបចំប្រកាសពីអាសនៈ និងបេក្ខជនរបស់គណបក្សនយោបាយ ដែលបានជាប់ឆ្នោត តែបើមានបណ្ដឹង នឹងដោះស្រាយរហូតដល់ថ្ងៃទី១០ ខែកញ្ញា ទើបអាចប្រកាសលទ្ធផលផ្លូវការបាន។
លោក ហង្ស ពុទ្ធា បានអះអាងដែរថា ការប្ដឹងនេះ គឺជាសិទ្ធិរបស់គាត់ ហើយបើដោះស្រាយរួចគាត់មិនសុខចិត្ត គាត់អាចប្ដឹងឡើងទៅក្រុមប្រឹក្សាធម្មនុញ្ញទៀត ដូច្នេះធ្វើអោយពេលវេលានៃការប្រកាសលទ្ធផលផ្លូវការកាន់តែអូសបន្លាយ ហើយក្នុងនាម គ.ជ.ប នឹងគោរពតាមច្បាប់។ លោកបញ្ជាក់ថា ការប្តឹងនេះ ត្រូវតាមនីតិវិធីនៃការប្ដឹង តែតាមច្បាប់ គាត់បកស្រាយច្បាប់មិនបានត្រឹមត្រូវទេ ហើយរឿងនេះ គ.ជ.ប ក៏បានពន្យល់ច្រើនដងមកហើយ ទាំងជាលាយលក្ខណ៍អក្សរ និងប្រជុំផ្ទាល់ ដោយគណបក្សចំនួន១៩ បានយល់ព្រម ដោយឡែកគណបក្សសម្ព័ន្ធដើម្បីប្រជាធិបតេយ្យមួយ មិនទទួលយក ដូច្នេះ គ.ជ.ប មានតែធ្វើតាមលក្ខខណ្ឌច្បាប់ គឺទទួលយកបណ្ដឹងនោះយកមកដោះស្រាយ។ ទោះជាយ៉ាងណា លោក ហង្ស ពុទ្ធា បានអះអាងថា ការដោះស្រាយរបស់ គ.ជ.ប នៅតែដដែល។
ទាក់ទងបញ្ហានេះដែរ លោក ហង្ស ពុទ្ធា បានបញ្ជាក់ថា ចំពោះគំនូសសញ្ញាគាំទ្រគណបក្សនេះ គ.ជ.ប ធ្លាប់បានពិចារណាតាំងពីមុនមានបណ្ដឹង ឬការទាមទារមកម្ល៉េះ ដែលចង់ឲ្យមានការប្រើត្រាធីកតែម្ដង ប៉ុន្តែលោកបានអះអាងថា បើប្រើត្រានៅតែមានបញ្ហាដដែល ប្រសិនបើមិនទទួលយកនីតិវិធី។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ បានប្រព្រឹត្តិទៅកាលពីថ្ងៃទី២៩ ខែកក្កដា ឆ្នាំ២០១៨ ដោយមានគណបក្សនយោបាយចំនួន២០ បានចូលរួម ហើយជាលទ្ធផល មានប្រជាពលរដ្ឋកម្ពុជាបានអញ្ជើញទៅបោះឆ្នោតចំនួន៦.៩៤៦.១៦៤នាក់ ដែលស្មើនឹង៨២,៨៩ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប៨.៣៨០.២១៧នាក់។
ក្រោយការបោះឆ្នោតភ្លាម អ្នកសង្កេតការណ៍ជាតិ អន្តរជាតិបានវាយតម្លៃថា ដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៦ បានបញ្ចប់ក្រោមបរិយាកាសល្អ រលូន ត្រឹមត្រូវ សេរី និងយុត្តិធម៌ និងមានការគោរពច្បាប់ គោរពសិទ្ធិមនុស្ស គ្មានការបង្ខិតបង្ខំ គ្មានហិង្សា គ្មានការភ័យខ្លាច គ្មានការលក់ដូរសន្លឹកឆ្នោត ស្ងប់ស្ងាត់ មានសណ្ដាប់ធ្នាប់ល្អ។
បញ្ហាគំនូសសញ្ញាគាំទ្រគណបក្សនេះ គណបក្សសម្ព័ន្ធដើម្បីប្រជាធិបតេយ្យ (LDP) ធ្លាប់បានទាមទារឲ្យប្រើសញ្ញាធីក (✔) ឬសញ្ញាប្រហាក់ប្រហែលនៅលើសន្លឹកឆ្នោត ហើយសញ្ញាផ្សេងពីនេះមិនទទួលយកទេ ដោយបានលើកឡើងថា LDP ចង់ឲ្យប្រើសញ្ញាធីក (✔) ឬសញ្ញាប្រហាក់ប្រហែល តែយ៉ាងណាត្រូវគូសនៅលើប្រអប់បួនជ្រុងទ្រវែងតូច ហើយបើសញ្ញាអីក៏យក នៅកន្លែងណាក៏យក វាអាចបញ្ជាក់ពីអត្តសញ្ញាណរបស់អ្នកបោះឆ្នោត និងធ្វើឲ្យបាត់គោលការណ៍សំងាត់នៃការបោះឆ្នោត៕
Source: Kampuchea Thmey Daily
0 Comments