ភ្នំពេញ ៖ លោកសាស្ដ្រាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាលកាលពីថ្ងៃទី៣១ ខែកក្កដា ឆ្នាំ២០១៨ បានដឹក នាំក្រុមគ្រូពេទ្យ ចុះទៅពិនិត្យ និងព្យាបាលប្រជាពលរដ្ឋជិត១០០គ្រួសារ ដែលរងគ្រោះ ដោយទឹកជំនន់នៅភូមិវាលខ្សាច់ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែងដោយឥតគិតថ្លៃ ។
លោកសាស្ដ្រាចារ្យ ម៉ម ប៊ុនហេង បានណែនាំដល់ប្រជាពលរដ្ឋ ត្រូវប្រុងប្រយ័ត្នខ្ពស់ចំពោះសុវត្ថិភាពកុមារតូចៗដោយមិនត្រូវបណ្តោយឲ្យពួកគេចុះងូតទឹក ឬហែលទឹកនៅពេលទឹកជំនន់ ពេលទឹកលិចត្រូវដាក់សញ្ញាសម្គាល់ ឬដាក់បន្លាស្រាស់ នៅកន្លែងដែលមានរណ្ដៅ ឬស្រះ ហើយបន្ទាប់ពីទឹកជំនន់ ត្រូវសម្អាតគ្រប់ទីកន្លែងជុំវិញគេហដ្ឋានឲ្យមានអនាម័យល្អ ពិសេសអណ្ដូងទឹក ត្រូវតែស្ដារលាងសម្អាតចេញទាំងអស់។
លោកសាស្ត្រាចារ្យ ម៉ម ប៊ុនហេងបានមានប្រសាសន៍ថា នៅពេលដែលមានទឹកជំនន់នឹងធ្វើឲ្យមានឆ្លងជំងឺផ្សេងៗដែលបង្កឡើងដោយសារទឹកមិនស្អាត ការពុលចំណីអាហារ ជំងឺរាគ អាសន្នរោគ និងជំងឺដែលបង្កឡើងដោយភ្នាក់ងារចម្លងមួយចំនួនដូចជា គ្រុនចាញ់ គ្រុនឈាម ជំងឺរមាស់ ភ្នែកក្រហម រលាកផ្លូវដង្ហើម របួសដោយសារការប៉ះទង្គិចនឹងវត្ថុផ្សេងៗ ពស់ចឹក លង់ទឹក និងវិបត្តិផ្លូវចិត្តផងដែរ។
លោករដ្ឋមន្ត្រីបានណែនាំឲ្យប្រជាពលរដ្ឋត្រូវសម្រាន្តនៅក្នុងមុងគ្រប់ពេលដើម្បីការពារជំងឺគ្រុនឈាម គ្រុន ចាញ់និងជំងឺផ្សេងៗ ត្រូវប្រុងប្រយ័ត្នចំពើសត្វពស់ឬសត្វអសិរពិសផ្សេងៗ ត្រូវធ្វើអនាម័យបរិស្ថានជុំវិញនិងក្នុងផ្ទះ ត្រូវស្តារនិងលាងសំអាតអណ្តូងទឹកឡើងវិញមុននឹងប្រើប្រាស់និងជួសជុលនិងសាងសង់ឡើងវិញនិងត្រូវបន្ទោរបង់ក្នុងបង្គន់គ្រប់ពេល។
ជាមួយគ្នានេះដែរលោករដ្ឋមន្ត្រីក្រសួងសុខាភិបាលក៏បានណែនាំដល់ប្រជាពលរដ្ឋត្រូវចេះតាមដានពីស្ថានភាពទឹកជំនន់ដើម្បីត្រៀមរកទីទួលសុវត្តិភាពនិងស្បៀងអាហារឲ្យបានគ្រប់គ្រាន់នៅពេលមានទឹកជំនន់។
លោករដ្ឋមន្ត្រីក៏បានណែនាំចំពោះស្ត្រីមានផ្ទៃពោះត្រូវតាមដាននិងពិនិត្យផ្ទៃពោះទៅតាមការកំណត់របស់មណ្ឌលសុខភាពឬមន្ទីរពេទ្យបើស្ត្រីជិតគ្រប់ខែដល់ពេលសម្រាលត្រូវស្វែងរកកន្លែងស្នាក់នៅក្បែរមណ្ឌលសុខភាពមន្ទីរពេទ្យដែលនៅជិតបំផុត។ត្រូវនាំកូនៗទៅទទួលថ្នាំបង្ការទៅតាមការកំណត់របស់គ្រូពេទ្យនិងផ្តល់ចំណីអាហារដល់កុមារឲ្យបានត្រឹមត្រូវនិងត្រូវការពារកុមារកុំឲ្យលេងទឹក និងត្រូវចេះជួយដល់ស្ត្រី មានផ្ទៃពោះ កុមារ មនុស្សចាស់ និងជនពិការ នៅក្នុងកំឡុងពេលទឹកជំនន់។
យ៉ាងណាក៏ដោយលោកសាស្ត្រាចារ្យម៉មប៊ុនហេងបានណែនាំថាមុនពេល ក្នុងពេលនិងក្រោយពេលទឹកជំនន់ប្រសិនបើប្រជាពលរដ្ឋមានបញ្ហាសុខភាពសូមស្វែងរកការពិគ្រោះនិងពិនិត្យព្យាបាលជំងឺជាបន្ទាន់នៅប៉ុស្តិ៍សុខភាពក្បែរទីទួលសុវត្តិភាពឬមណ្ឌលសុខភាពឬមន្ទីរពេទ្យដែលនៅជិតបងបង្អូនបំផុត។
លោករដ្ឋមន្ដ្រី ម៉ម ប៊ុនហេងបានបញ្ជាក់ថា «ជានិច្ចជាកាលយើងតែងតែប្រតិបត្ដិគោលនយោបាយរបស់រាជរដ្ឋាភិបាល និងត្រៀមខ្លួនជានិច្ចក្នុងការឆ្លើយតប នឹងគ្រោះមហន្ដរាយនានា ពិសេសចុះព្យាបាលប្រជាពលរដ្ឋយើង ទៅដល់ទីតាំងរស់នៅ និងរងគ្រោះតែងម្ដង។ ក្នុងនោះយើងបានរៀបចំរួចជាស្រេច នូវឱសថ សម្ភារបរិក្ខារពេទ្យ សម្រាប់សង្គ្រោះប្រជាពលរដ្ឋ ក្នុងរដូវទឹកជំនន់នេះ » ។
លោកសាស្ដ្រាចារ្យ ម៉ម ប៊ុនហេង ក៏បានបញ្ជាក់ទៀតថា ក្រសួងសុខាភិបាល បានចេញនូវសារអប់រំសុខភាពគ្រប់រូបភាព ជូនប្រជាពលរដ្ឋ រួចរាល់ហើយ តាមរយៈការចុះផ្សព្វផ្សាយតាមប្រព័ន្ធផ្សព្វផ្សាយផ្សេងៗ ដូចជា ទូរទស្សន៍ និងសារព័ត៌ ក្រៅពីចុះទៅអប់រំដោយផ្ទាល់។
គួរបញ្ជាក់ថា បន្ទាប់ពីទទួលបានដំណឹងពីការលិចលង់ដោយទឹកជំនន់ ដែលហូរធ្លាក់ពីប្រទេសឡាវ ដោយសាររបាក់ទំនប់ Se-Pian Se Nam Noi ក្នុងខេត្ត Attapeu បានមកដល់ព្រំដែនប្រទេសកម្ពុជា កាលពីថ្ងៃទី២៥ ខែកក្កដាកន្លងទៅនេះបានបណ្តាលឲ្យលិចលង់នៅតំបន់មួយចំនួន នៅក្នុងឃុំថ្មកែវ ឃុំសន្តិភាព និងឃុំសេកុង នៃស្រុកសៀមប៉ាង ខេត្តស្ទឹងត្រែង និងបានបន្តលិចនៅភូមិឃុំមួយចំនួនទៀត រួមទាំងស្រុកថាឡាបរិវ៉ាត់ផងដែរ៕
Source: Kampuchea Thmey Daily
0 Comments