ភ្នំពេញ ៖ សំណង់តូបនិងលំនៅឋានបែបអនាធិបតេយ្យនៅតាមបណ្ដោយផ្លូវរថភ្លើង និងជាប់ផ្លូវជាតិលេខ៤ផងនោះ ត្រូវបានអាជ្ញាធរខណ្ឌពោធិ៍សែនជ័យ ដឹកនាំកម្លាំងចម្រុះ ខណ្ឌចុះរុះរើចេញ បន្ទាប់ពីជូនដំណឹងជាបន្ដបន្ទាប់រួចមកនោះ ដែលសកម្មភាពនេះ ត្រូវបានធ្វើឡើងកាលពីព្រឹកថ្ងៃទី២៨ ខែសីហា ឆ្នាំ២០១៨ នៅតាមចិញ្ចើមផ្លូវជាតិលេខ៤ និង តាមផ្លូវរថភ្លើងក្នុងភូមិអង្គសង្កាត់ចោមចៅ៣ ខណ្ឌពោធិ៍សែនជ័យ។
តាមអាជ្ញាធរបានឲ្យដឹងថា កន្លងមកខាងអាជ្ញាធរបានជូនដំណឹងហើយ រាល់ពលរដ្ឋដែលសាងសង់តូប លក់ដូរនិងស្នាក់នៅជាបណ្តោះអាសន្ននៅតាមចិញ្ចើមផ្លូវជាតិលេខ៤និងប្របតាមផ្លូវរថភ្លើងដែលបង្កឲ្យបាត់បង់សណ្តាប់ធ្នាប់សាធរណៈ គ្មានច្បាប់អនុញ្ញាត នោះអាជ្ញាធរត្រូវតែហាមឃាត់និងឲ្យបញ្ឈប់សកម្មភាពសង់រោង តូប បែបនេះជាបន្ដបន្ទាប់ ក៏ប៉ុន្តែពួកគាត់នៅតែមិនស្តាប់ស្ងាត់ៗ បែរជាមានអ្នកទៅលួចសង់រោង តូប ដដែល ទើបនៅព្រឹកថ្ងៃទី២៨ ខែសីហា ឆ្នាំ២០១៨ នេះគណៈបញ្ជាការឯកភាពខណ្ឌពោធិ៍សែនជ័យ ដឹកនាំដោយលោកកែវ សុភាអភិបាលរងខណ្ឌ រួមជាមួយកម្លាំងសង្កាត់ ប៉ុស្តិ៍ចោមចៅ៣ ចុះទៅរុះរើចេញនូវសំណង់រោង តូប អ្នកលក់ដូរនៅតាមចិញ្ចើមផ្លូវ។
តាមការសង្កេតជាក់ស្ដែងប្រជាពលរដ្ឋហាក់មិនហ៊ានបញ្ចេញប្រតិកម្មតវ៉ានោះទេ ដោយសារពួកគាត់យល់ច្បាស់ថា ពួកគាត់ពិតជាបានសាងសង់សំណង់ខុសច្បាប់នោះមែន ហើយគាត់ក៏ចង់រុះរើចេញដែរប៉ុន្ដែដោយសារវល់ពេក។
ពលរដ្ឋម្នាក់បានឲ្យដឹងថា គាត់ដឹងហើយថា រោង តូប របស់គាត់សង់គ្មានច្បាប់ តែគាត់សង់គ្រាន់ជាជម្រកសម្រាប់លក់ដូរជាបណ្តោះអាសន្នតែប៉ុណ្ណោះ ហើយកន្លងមកពួកគាត់ក៏ទទួលបានសេចក្ដីជូនដំណឹងរបស់អាជ្ញាធរដែរ ដែលតម្រូវឲ្យពួកគាត់រុះរើចេញ តែគាត់ ជាប់រវល់ទើបអូសបន្លាយពេលវេលាមកដល់ថ្ងៃនេះ ហើយគាត់ក៏មិនអាក់អន់ចិត្តអ្វីដែរជាមួយអាជ្ញាធរដែលដាក់កម្លាំងចុះមករុះរើនេះដែរ ម្យ៉ាងវិញទៀតពួកគាត់ក៏ដឹងដែរថាបន្ទាប់ពីបោះឆ្នោតរួចអាជ្ញាធរត្រូវតែចាត់វិធានការក្ដៅហើយ៕
Source: Kampuchea Thmey Daily
0 Comments