ភ្នំពេញ ៖ តារាចម្រៀងម្ចាស់បទ វាសនាបុប្ផាស្វាយរៀងកញ្ញាសួស វីហ្សា ថ្មីៗនេះ បានធ្វើមហាជនមានការចាប់អារម្មណ៍ និងលើកសរសើរស្ទើរគ្រប់គ្នា បន្ទាប់បានដឹង និងឃើញអំពីសកម្មភាពចិត្តធម៌របស់តារាស្រីរូបនេះ ចំពោះលោកយាយវ័យចំណាស់ដ៏កម្សត់ម្នាក់ ដែលប្រកបរបរអង្គុយលក់កន្ត្រកនឹងចាប់ក្រដាសនៅតាមចិញ្ចើមផ្លូវនៃកម្ដៅថ្ងៃក្តៅខ្លាំង។
តាមរយៈសកម្មភាពចិត្តធម៌របស់តារាចម្រៀងកញ្ញា សួស វីហ្សា នាពេលនេះ បាននិងកំពុង ធ្វើឲ្យអ្នកគាំទ្រជាច្រើនបង្ហាញការលើកសរសើររួមជាមួយការបន្តចែករំលែកដំណឹងដ៏គួរឲ្យចាប់អារម្មណ៍និងអាចនិយាយបានថា ជាគំរូល្អសម្រាប់ប្រជាពលរដ្ឋដ៏ដូចជាអ្នកសិល្បៈរួមអាជីពឯទៀត។
បញ្ចេញសំណេរភ្ជាប់ជាមួយរូបភាពលោកយាយវ័យចំណាស់រូបនោះកញ្ញា សួស វីហ្សា បានលើកឡើងថា អាណិតណាស់ លោកយាយម្នាក់អង្គុយលក់កន្ត្រក និងចាបក្រដាសហាលក្តៅនៅភ្លើងស្តុបផ្លូវភ្លោះអូរឬស្សី ។ខ្ ញុំសួរគាត់ថាលោកយាយហត់អត់ ហេវអត់ គាត់ថាហត់ណាស់ ហេវណាស់ចៅអើយ ឮហើយចង់ស្រក់ទឹកភ្នែក។
តារាចម្រៀងស្រីកញ្ញា សួស វីហ្សា បានបន្ថែមទៀតថា ខ្ញុំក៏ប្រាប់គាត់ថាអញ្ចឹងខ្ញុំទិញទាំងអស់លោកយាយអញ្ជើញទៅផ្ទះសម្រាកចុះ ខ្ញុំជូនលុយគាត់ គាត់អរណាស់ គាត់ឱបខ្ញុំ ។ ទាំងនេះមិនមែនអួតឬទាក់ទាញចំណាប់អារម្មណ៍អីទេ ហើយក៏មិនចង់ល្បីដែរ តែគ្រាន់តែចង់ចែករំលែកដល់បងប្អូនយើងថា គួរធ្វើអំពើល្អជាមួយមនុស្សចាស់ៗ ដែលគាត់ពិបាកវេទនាតាមដងផ្លូវជាពិសេសកុមារអនាថា ដើរតាមផ្លូវបើឃើញពួកគាត់សូមជួយគាត់ផងទៅ ទោះតិចក្តីច្រើនក្តីចាំថា អំពើល្អមិនសាបសូន្យទេ។
ចាប់អារម្មណ៍មកក្រឡេកមើលពីទីផ្សារសិល្បៈរបស់តារាចម្រៀងស្រីកញ្ញា សួស វីហ្សា ឃើញថាបច្ចុប្បន្នគឺកាន់តែមានការញញឹកច្រើនតាមរយៈការចេញច្រៀងនៅតាមបណ្តាកម្មវិធីប្រគំតន្ត្រីនានា។ មិនតែប៉ុណ្ណោះពេលនេះក៏អាចចាត់ទុកថាជាឱកាសដ៏ល្អចំពោះតារាស្រីកញ្ញា សួស វីហ្សា ក្នុងការកើបប្រាក់ពីវិស័យសិល្បៈផងដែរ៕
Source: Kampuchea Thmey Daily
0 Comments