ភ្នំពេញ ៖ នេះពុំមែនជាករណីថ្មី ដែលទើបកើតមានចំពោះតារាសម្តែងស្រីរាងតូចច្រឡឹងកញ្ញា ណាក់ ស្រីណាតែម្នាក់នោះទេ ខណៈកន្លងមកតែងមានតារាប្រុស-ស្រីរបស់ខ្មែរមួយចំនួនរួចមកហើយ ធ្លាប់ទម្លាយ និង និយាយលើកឡើងអំពីផលលំបាក បន្ទាប់ពីបញ្ចប់ការថតសម្តែងភាពយន្ត តែងតែត្រូវបានអ្នកដឹកនាំសម្តែង ឬ ផលិតករនិងម្ចាស់ផលិតកម្មខ្លះមិនព្រមផ្តល់សំណងថ្លៃកម្លាំងញើសឈាមនៃការថតរឿង។
ចំពោះករណីនេះ បច្ចុប្បន្នឃើញថា កំពុងបង្កឲ្យមានភាពលំបាក និងរិះគន់ជាសាធារណៈពីសំណាក់សាមីខ្លួន។ ពិសេសវាក៏ជារឿងដ៏អាម៉ាស់ផងដែរសម្រាប់ការដាច់ចិត្តទម្លាយដោយចំៗលើភាគីម្ចាស់ផលិតកម្មឬបុគ្គលដែលមានភាពពាក់ព័ន្ធលើរឿងរ៉ាវទាំងនេះ។
ជាក់ស្តែងតារាស្រីកញ្ញា ណាក់ ស្រីណា ដោយសារអស់ភាពអត់ទ្រាំមុននេះ នាងបានប្រកាសដោយបើកចំហលើករណីផលិតកម្មមហាហង្សដែលមានលោក អ៊ិន សុភិន ជាថៅកែកំពុងតែជំពាក់លុយថ្លៃថតរបស់នាងមានរយៈពេលជិត១ឆ្នាំមកហើយនោះ។
ផ្អែកតាមការសម្រង់សម្តីរបស់តារាស្រីកញ្ញា ណាក់ ស្រីណា បានរៀបរាប់ថា សូមកុំបំបាក់ទឹកចិត្តសិល្បករខ្មែរ ហើយបង្វែរទៅលើកស្ទួយគេ។ មរតកចុកឈាម គឺជារឿងដំបូង ដែលខ្ញុំថតឲ្យផលិតកម្មមហាហង្ស ដែលជាផលិតកម្មដ៏ល្បីនៅកម្ពុជាពេលនោះពួកយើងបានបំពេញការងារ ដោយកម្លាំងញើសឈាម និងក៏បានថតចប់រួចរាល់ តាមការសន្យាជិតមួយឆ្នាំហើយ។
តារាសម្តែង ណាក់ ស្រីណា បានបន្ថែមទៀតថា ប៉ុន្តែគិតមកដល់ពេលនេះស្ថានភាពលុយកាក់របស់ខ្ញុំគឺស្ងប់ស្ងាត់ខ្លាំងណាស់ ហាក់គ្មានអ្នកអើពើសោះ។ ជាចុងក្រោយខ្ញុំសង្ឃឹមថា ក្រុមហ៊ុននឹងមានដំណោះស្រាយល្អសម្រាប់ខ្ញុំ និងមិនឲ្យខ្ញុំរង់ចាំយូរបន្តទៀត។ កញ្ញា ណាក់ ស្រីណា នាព្រឹកថ្ងៃទី០៨ ខែសីហា ឆ្នាំ២០១៨មិនអាចសុំការសួរនាំបន្ថែមបានទេលើករណីមួយនេះ។
ដោយឡែកលោក អ៊ិន សុភិន ដែលត្រូវបានមហាជនស្គាល់គ្រប់គ្នាជាម្ចាស់ផលិតកម្មមហាហង្សកំពុងមានភាពលេចធ្លោលើវិស័យភាពយន្តខ្មែរកម្ពុជា នៅព្រឹកថ្ងៃដដែលនេះក៏មិនអាចធ្វើការទំនាក់ទំនងដើម្បីសុំការបំភ្លឺចំពោះរឿងរ៉ាវដ៏រសើបខាងលើនេះបាននៅឡើយដែរ៕
Source: Kampuchea Thmey Daily
0 Comments