គ្រូបង្វឹក​ក្រុមព្រះ​ខ័ន​រាជ​ស្វាយរៀង ប្រកាស​កាត់​ប្រាក់ខែ​របស់ខ្លួន​ក្រោយ​ដឹកនាំ​ក្រុម​បរាជ័យ​ធ្ងន់ធ្ងរ​ក្នុង​ទឹកដី

ក្នុង​ប្រកួត​សប្ដាហ៍​ទី​១៧ នៃ​ពានរង្វាន់​លី​គ​កំពូល​កម្ពុជា Metfone Cambodian League 2018 ក្រុម​ម្ចាស់ផ្ទះ​ព្រះខ័ន​រាជ​ស្វាយរៀង បាន​ប្រកួត​ចាញ់​ក្រុម​អាស៊ី​អឺរ៉ុប​យូ​ណាយ​ធី​ត ៦​ទល់​១ ខណៈ​គ្រូបង្វឹក​លោក Conor Nestor បាន​ទទួល​ស្គាល់​និង​រ៉ាប់រង​ចំពោះ​លទ្ធផល​ទទួលរង​បរាជ័យ​យ៉ាងធ្ងន់ធ្ងរ​ក្នុង​ទឹកដី​របស់ខ្លួន​។



​យោង​តាម​ការចេញផ្សាយ​នៅលើ​វិ​ប​សាយ​ផ្លូវការ​របស់​ក្លិប​មួយ​នេះ​បាន​បញ្ជាក់ថា «​ដើម្បី​បង្ហាញ​ពី​ទំនួល​ខុសត្រូវ​គ្រូបង្វឹក​របស់​យើង​ក៏បាន​សម្រេច​កាត់​ប្រាក់ខែ​ខ្លួនឯង​ ដើម្បី​ជា​ការ​សូមទោស​ដល់​អ្នកគាំទ្រ​បាន​ទិញ​សំបុត្រ​ចូល​ទស្សនា​ការប្រកួត​ដោយ​ផ្ទាល់ ខណៈ​នឹង​រំពឹង​ថា​អ្នកគាំទ្រ​ទាំងអស់​បន្ត​រួម​ដំណើរ​ជាមួយគ្នា​សម្រាប់​ការប្រកួត​ក្រោយ​ក្នុង​ទឹកដី​ដោយ​ប៉ះ បឹងកេត នៅ​ប្រកួត​បន្ទាប់​»​។



ប្រភព​បន្ត​ថា «​ចំនួន​ទឹកប្រាក់​ដែល​បាន​កាត់​ចេញពី​គ្រូបង្វឹក​របស់​យើង​គឺ​បូកសរុប​តាម​លទ្ធផល​ជាក់ស្តែង​នៃ​អ្នក​បាន​ទិញ​សំបុត្រ​ចូល​ទស្សនា​។ ខណៈ​យើង​សូម​រក្សា​សិទ្ធិ​មិន​បង្ហាញ​ពី​ចំនួន​ទឹកប្រាក់​ជាក់លាក់​ណាមួយ​ឡើយ​»​។ លោក​Conor បាន​បង្ហាញ​ទស្សនៈ​របស់​ខ្លួន​ បរាជ័យ​ធ្ងន់ធ្ងរ​នេះ​ថា « ហេតុផល​នៃ​ការ​ចាញ់​គឺ​យើង​បាត់បង់​ឱកាស​ច្រើន​។ ពួក​យើង​ប​ញ្ជូន​បាល់​ឲ្យ​គ្នា​ចោល​រហូត និង​មាន​ទម្រង់​ការពារ​ដ៏​អាក្រក់​។ យ៉ាងណាក៏ដោយ ​ទោះបី​ពួក​យើង​មាន​គ្នា​ត្រឹម​១០​នាក់ (​កីឡាករ លី សា​រ័ត្ន ត្រូវ​ពិន័យ​កាត​ក្រហម​)​យើង​នៅតែ​បន្ត​ធ្វើ​ការ​រហូត​មានការ​បង្កើត​ឱកាស​រក​គ្រាប់​មកវិញ​»។



ក្រុមព្រះ​ខ័ន​រាជ​ស្វាយរៀង ទើបតែ​ផ្លាស់ប្តូរ​គ្រូបង្វឹក​កាលពីដើម​រដូវ​កាល ដោយ​ចុះ​កិច្ចសន្យា​១​រដូវ​កាល​ជាមួយ​លោក Conor Nestor កាន់​អាជ្ញាប័ណ្ណ​គ្រូបង្វឹក​កម្រិត UEFA A License ជំនួស​លោក សំ វ៉ាន់​ដេ​ត ដែល​ជា​គ្រូ​ចាស់​គ្រោង​នឹង​បន្ត​រៀន​វគ្គ​គ្រូបង្វឹក AFC “A” License​។ ក្រុម​នេះ​បាន​បញ្ចប់​រដូវ​កាល​ឆ្នាំ​២០១៧ របស់​ខ្លួន​កន្លងទៅ ដោយ​ឈរ​ចំណាត់ថ្នាក់​លេខ​៣ ប្រចាំ​ពានរង្វាន់​លី​គ​កំពូល​កម្ពុជា Metfone Cambodian League 2017 ដែល​មាន​សមាជិក​១២​ក្រុម ហើយ​នៅក្នុង​ពានរង្វាន់​សម្តេច​តេ​ជោ ហ៊ុន សែន វិញ​បានបញ្ចប់​រដូវ​កាល​របស់​ខ្លួន​ ដោយ​គ្រង​តំណែង​ជើងឯក​តែម្តង​៕

 

Source: Kampuchea Thmey Daily